暑假都就快完，但呢套看似卡通片嘅《屈機起格命》就偏偏喺 20號先上，但原來並無原因。身為 90後嘅小編就可以好坦白咁同大家講，只喺覺得佢喺一套爛笑片啦！
《屈機起格命》喺由一套 2010年命為「PIXELS」嘅法國短片改編，但後嚟被 Sony Pictures Entertainment 用嚟做咗電影靈感。本來將經典街機遊戲 －《大蜈蚣》、《食鬼》、《Donkey Kong》等融入真人生活中會喺人條好橋，必定可以引起七、八十後機迷共鳴。奈何除大蜈蚣、食鬼同 Donkey Kong 可以由 8-bit 變 3D ，出咗幾幕外，大部份經典角色，例如 MARIO、藍精靈等都唔洗一秒就被殺，變番一堆方塊，確實有種意猶未盡嘅感覺。
講到劇情真喺可以用捉到鹿唔識脫角嚟形容，令大好嘅題材論為悶場。首先，套戲一開頭講到小時候嘅 Adam Sandler 同一班細路點樣迷上街機同參加世界大賽開始，本來七、八十後機迷見到咁多街機，D 回憶應該番番晒嚟，但偏偏主角同火爆嘅口水位太多，打機時候又太少，令個頭開得唔夠好，悶到連幾時轉番去現代我都唔知。去到現代，原來當年世界遊戲大賽嘅映像被太空總署送到上太空，估唔到被外星人誤以為喺宣戰，仲跟足遊戲規則咁攻打地球。本來如果一場接一場咁打應該幾刺激好睇，但就唔知點解打贏完大蜈蚣慶功一次、打贏完食鬼又慶功一次。明明知道未打完，都唔知慶祝 D 乜，拖慢晒個節奏。仲有，本來第三場用 Mini cooper 化身嘅小鬼喺紐約追擊巨型邪惡食鬼好有打機 Feel，喺停車場 10秒倒車都好刺激，但最後一戰竟然嚟個反高潮，仲以為外星人邀請佢地上太空船會有更精彩嘅嘢睇，點知大部份畫面都喺得 Adam Sandler 喺度打木筒。咁不如留番喺地面嚟個七、八十後機迷上陣打 PIXELS 仲好。
以為 Adam Sandler 嘅戲唔講劇情都可以睇下笑位，咁就錯啦！戲入面大部份笑位都喺人物之間嘅對話，除非好熟政治人物同外國藝人，唔喺好難笑得出。仲要同一個 gag 抽幾次水，講嚟講去都喺笑總統 Kevin James 唔識深嘅字，女主角 Van Patten 用 BB杯飲酒同 Adam Sandler 唔刷牙。我覺得最搞笑個幕已經喺由相似演員模仿嘅《食鬼》之父「岩谷徹」同邪惡食鬼交流，可惜個段預告一早出晒街了。
呢套戲嘅對象本來就唔喺未打過街機嘅 90後小編，所以期望都唔太高，撇除我睇唔明點解《大蜈蚣》一戰有兩關，其他得一關，點解佢地會預知自己喺小鬼整定 D Mini cooper 外，最後一戰真喺掀唔起高潮，白白浪費咗咁浩大嘅場景同特別嘅題材，所以當佢喺一套爛笑片睇就好了。
評分： 5/10
