邊個係 Eric Chan？之唔係議員葉劉淑儀個 Facebook Admin 囉！葉太就犀利啦，近排個個都睇實佢個 Facebook：有大腸睇，仲有疑似 P 圖睇添！
個日大腸照出完兩個鐘左右，大腸突然消失，事關張相上面有葉太的身份證編號，仲俾人查冊成功添。身為前保安局局長的葉太理應責無旁貸，偏偏佢就推左位 Eric Chan 出黎祭旗，網民當然懶理你係 Ben Chu，Joe Yeung，定係 Albert Yip 啦，個專頁個名義係葉太嘅，問題一定係佢身上啦。即使大家都心知肚明個專頁唔係由葉太自己出 Feed，都唔會鬧 Admin，因為某程度上 Admin 只係一個傳聲筒，將「主角」想講嘅野放上專頁。
但事實係咪咁呢？Facebook Admin 係咪只係一個傳聲筒咁簡單呢？小妹自己都係咁易有管理緊幾個 Page，當然同名人扯唔上甚麼關係，但係我就覺得 Admin 的身份唔係咁簡單喇。Admin 可以同時係經理人、數據分析師、秘書、公關、Sales、記者、CS、同埋「主角」等。
Facebook 專頁簡單來說就係一間公司，你將你想人地知道嘅野放上去公諸於世，給自己塑造形象，Sell 自己，俾氹自己踩，然後處理邀約、查詢、危機，仲要適時睇下專頁的數據資料，邊個 Post 多人睇可以谷行啲，有冇人 Like / Comment / Share 自己啲 posts，點樣出 Post 先多人睇，使唔使出個花生 Post 俾人睇下… 做 Admin 真係一啲都唔易，一個 / 一 team 人要處理咁多野，人工應該都要幾可觀至得。
到而家為止，雖然 Facebook 有老年化的趨勢（即係用戶平均年齡大左），但 in general 都算係一個後生的社群，有自己一套的溝通方式，食花生同抽水就係好好的例子s。上左年紀的名人想係後生仔之中有 SAY，加入呢個社群係好值得鼓勵的，但真係要搵個識得網絡語言嘅 Admin 做幽靈寫手（Ghostwriter），唔係求其搵個人講高登語言，搞到好似政府新聞網咁變成幕後黑手。
其實好的 Admin 都有唔少，唔理個政治傾向黎講，夏千福、田大哥、大嘥鬼就做得唔錯，Eric Chan，FYI ！ 😛
相關文章:
青少年社交媒體使用趨勢調查 Youtube 位列榜首 近半受訪者長期在線 針對 Meta 不再與傳媒續約 澳洲政府宣佈實施科技企業新聞稅 Facebook 關鍵數據改為觀看次數 取代原先的曝光數
分享到 :
最新影片
