籮文又玩日系手機！今次依部 Sharp AQUOS PAD SH-05G 除咗貫徹日本機常見嘅超幼邊框同防水功能，仲係全球最輕薄嘅 7 吋 Android 平板手機，以上提及嘅特點，SH-05G 仲配置 Snapdragon810處理器！實際用落係點就要繼續睇落去啦！
感覺似加大版 Xperia Z Ultra
SH-05G 號稱全球最輕薄嘅 7 吋 Android 平板，籮文都期待咗好耐，一揸上手，感覺跟 Sony Xperia Z Ultra 的重量差不多之餘，手感亦相近。不過 SXZU 是 6.4 吋熒幕，而 SH-05G 是 7 吋熒幕喔 ! 但可惜 SH-05G 始終係一部平板手機，機身較闊，無辦法實現單手操控。官方資料話 SH-05G 有窄邊框嘅設計，而事實上籮文就唔覺得單單睇個邊框係未算超幼，或者廠方有意留返一定嘅邊框俾依部 7吋大 Mon 機，以避免用家誤觸螢幕。機身厚度只有 8mm 嘅 SH-05G 比 Aquos Crystal 或者 Aquos Xx 都要薄，我試過自己條牛仔褲後袋都僅僅可以放到。
▲7 吋 SH-05G V.S. 5.5 吋LG G4
▲7吋機黎講，邊框都算幾幼
▲音量制及開關制於機身右側
▲機身下方為 USB位。可見 SH-05G 有幾薄切
▲機頂為耳機位，此圖則可見 SH-05G 之闊度係幾難揸，籮文隻手都唔算細，不過單手揸機確實幾吃力
▲左側上方有一個亮邊，有 Notification 時會發光
IGZO 螢幕 好光 好 Sharp！ 16:10 螢幕娛樂為主
SH-05G 螢幕解析度有 1,200 x 1,920，比例係於手機上比較少見嘅 16:10，睇 16:9 嘅影片時上下就會有黑邊，籮文就覺得 16:10 好唔 Friendly，做返1,080 x 1,920未好囉，好彩 SH-05G 機身係黑色，能夠稍為隱藏黑邊，無咁礙眼。SH-05G 用咗 Sharp 自家研發嘅 IGZO 螢幕，亮度比一般使用 AMOLED 、 IPS 等手機更高，色彩亦好鮮豔。
▲SH-05G 配合 IGZO 螢幕，繼承 Sharp 的優良血統，顏色表現夠鮮，光度亦十分足夠
▲睇片有上下兩條黑邊實為在所難免
▲16:10 比例嘅螢幕，用黎瀏覽電腦版網頁比傳統手機螢幕更加方便更加一覽無遺。
▲螢幕像素密度雖然唔高，但睇文字亦十分清?，無論睇依莉詩整餅或者睇籮文講手機，都唔會見到文字有起格問題。
上手即 Unlock 防偷窺用唔洗 Mon 貼
SH-05G 作為一部日本機，唔少得一啲得意功能，就好似 EDGEST Effect 功能，螢幕解鎖或者有來電打入時螢幕邊框就會有幻彩效果，同埋 Magic Grip 功能，用家只要手握到機邊就可解鎖螢幕，唔再需要雙手一齊解 Lock 。而籮文覺得最特別嘅係一個叫做 Veilview 嘅功能，令用家喺正中央先可以清楚睇到手機嘅畫面，如果喺側面望就睇唔到，防偷窺 Mon 貼都慳返！
▲只要開咗 Veilview 功能，基本上冇影響正面睇畫面。
▲但喺側面睇，只會睇到好靚嘅圖案！
▲仲有幾款圖案任君選擇，依款就好似保密度較低喎，近睇都可以睇得到少少畫面，文字就難以閱讀，不過唔好諗住用黎 Full Screen 睇某啲相片或者影片，我話你知，你隔離啲人實睇到。
全球第二部平板用上 Snapdragon 810 效果如何？
SH-05G 係全球第二部平板用上 Snapdragon 810 處理器， 試用時未有發現過熱問題，即使跑分時亦只係機背近底部位置暖暖地，可見 Sharp 於 SH-05G 散熱方面做得唔錯。用上 Snapdragon 810，但跑分表現未算突出，次於 LG G3。用上 Snapdragon 810 及 7 吋 Mon 但電量只得 3,900 mAh，幸好有 Energy Save 模式，選項亦好多，即使開咗 Energy Save 亦唔會影響體驗。籮文用左 3 個鐘左右，無開 Energy Save，螢幕亮度開到最光，當中有跑過分，上過 YouTube，電量由八十幾跌到四十幾，效能尚算 OK，正常使用應該用到 1.5 – 2 天。
▲規格一覽
▲用上 Snapdragon 810，但跑分表現未算突出，次於 LG G3
▲電量只得 3,900 mAh，幸好有 Energy Save 模式
相機麻麻地 只及網上分享用途
配置800萬主鏡頭，210萬前鏡，好明顯影相唔係 SH-05G 嘅強項，但影出黎都唔係好差，顏色有足夠飽和度，細緻度亦合格，惟自家的 SH Camera app 各地用家都有回報 Lag 機問題，建議下載 Google Camera 代替。拍片方面拍到 1080p 30 FPS，算係唔錯。
▲拍照可選用 Sharp 自家的 SH Camera 或 Google 的 Google Camera
▲前鏡位置機底，用慣非日系手機嘅朋友就要習慣下啦
▲測試相片：光暗分明，即使天空光位亦層次感，不會光茫茫一塊。
▲測試相片：放大後細節未覺油畫化
▲測試相片：飽和度好足夠，顏色同牌子名一樣，Sharp！
▲測試相片：200萬像前鏡就真係非常麻麻，籮文塊面都尚算清楚，油畫化仲可以當美肌功能添，不過從籮文隻貓 營多 啲毛毛就可以見到油畫化十分嚴重，冇晒細節。
籮文：好輕好薄 副機平板之選
如果當手機用嘅話，SH-05G 同我個頭差唔多大，咁大部，單手用唔到係好唔方便嘅一件事。相反，用黎當平板用，7吋 Mon 用黎搭車睇片睇電子書都一流，有 Snapdragon 810，打機睇片都好順，最正就係佢夠輕夠薄，放入袋拎出街都好方便。
查詢：三禾電氣 23740618(旺角) 23740718 (銅鑼灣)
分享到 :
最新影片
