以往 Moto X 系列每年只出一機，但今年一來就兩部：分別係 Moto X Style 及 Moto X Play。Moto X Style 屬於旗艦機，而 Moto X Play 就屬於中階機。Moto X Play 採用 5.5 吋 1080p 熒幕，高達 2,100 萬像素 F/2.0 主鏡頭、500 萬像素前置鏡頭及支援最高 128GB microSD 記憶卡擴充儲存空間。作業系統方面預載了 Android 5.1.1 Lollipop，只屬中階的 Moto X Play 竟有高達 3,630mAh 容量電池！官方更稱可使用足足兩日，係咪真呀？以下文章有籮文幫你試！
開箱竟然無耳機？
開箱可以見到原來盒入面係無附送耳機嘅！一來節省成本，讓大家用更合理嘅價錢買到手機，二來相信大家都有自己嘅耳機，真係多謝晒 Motorola 支持環保囉……
▲一開箱可以見到原來箱入面係無附送耳機，真係多謝晒 Motorola 支持環保。
多款顏色任揀！不過無香港份…
Moto X Play 背蓋有好多款顏色可供選擇，不過香港暫時未有行貨，而水貨就未必有齊咁多款你揀啦。背蓋可以拆開，但只係 for 你用黎換顏色，係冇得換電嘅！依個背蓋有仿皮嘅膠質質感，令手機唔會跣手。講真，離遠望，機背有啲似 LG G4 。背蓋嘅紋路 Pattern 有啲車軚紋，俾籮文一種老套又俗套嘅感覺，或者白色會好啲掛。
▲仿皮嘅膠背蓋，令手機唔會跣手。
▲背蓋可以拆開，但只係俾你用黎換顏色，係冇得換電。
▲機底有 USB 位。
▲左側有開關及音量制。
▲機頂有耳機孔， Sim 卡及 SD 卡槽，要用隨機附送的卡槽工具打開。
▲打開便可見 Sim 卡及 SD 卡槽。
相關文章:
【評測】moto Razr 50 / 50 Ultra 開箱評測 外屏可作主力屏幕使用
熒幕雖唔算大但睇片一流
用手機睇片唔係淨只要個芒靚，對喇叭都一定要好聲！依一點 Moto X Play 就做得好好勒。Moto X Play 有 5.5 吋熒幕，唔算好大，不過解像度都有 1080p FullHD，大約有 403ppi 嘅像素密度，拎到幾埋睇都唔易睇到起格，依個價位黎講係超值。最爽就係聲音方面，有立體聲嘅前置喇叭，睇片時聲音直接傳入耳仔， 唔似得其他手機，喇叭喺機背或者機底，要用手兜返啲聲出黎。籮文試過的確 Moto X Play 嘅前置喇叭係非常正，首先音量開到最大都唔會拆，睇電影時聲音更有立體感，直頭分得到音效喺戲入面邊個方位發出。
▲ Moto X Play 有 5.5吋 Mon，唔算係好大。
▲解像度都有 1080p FullHD，大約有 403ppi 嘅像素密度，拎到幾埋睇都唔易睇到起格，依個價位黎講係超值。
▲ 籮文試過的確 Moto X Play 嘅前置喇叭係非常正，首先音量開到最大都唔會拆，睇電影時聲音更有立體感，直頭分得到音效喺戲入面邊個方位發出。
主打影相超高像素
Moto X Play 後鏡有 2,100 萬像素，可以影到 5,248 x 3,936 嘅相片，影出黎嘅相 Zoom 到大一大黎睇都唔會起格。不過要影相靚就唔係淨係講像素嘅，亦都需要唔同方面配合，就例如 Moto X Play 嘅 F/2.0 光圈，採光度唔錯，低光環境影出黎都唔會太暗。不過可惜嘅係無光學防震，只有軟件防震，效果唔太理想，莫講係一邊行一邊影，就算籮文企定定黎影都係會濛，唔通我對手真係咁震？
▲相機介面好簡潔，一指操控。
▲旺角街頭巧遇柏力芝！不過逆光下，暗位有雜訊出現。
▲只要滑動對焦框框入面碌柄就可以較光度。
▲較暗時，銀行招牌線條更清?，較光時，就可以影到後面樓宇。
▲係時候發揮一下高解像嘅用處…
▲放大可以見到貓貓行緊 Cat walk 都清晰影到。
超大電池夠你用兩日？
超大嘅 3,650mAh 電池，官方資料就話用到兩日，事實上籮文試過，用黎睇下片影下相跑下分，最後係用到一日半左右，不過要留意返，咁大嘅電池，用得耐亦都叉得耐！Moto X Play 有 2GB RAM，有 16GB / 32GB ROM 容量可供選擇，不過都係嗰句：香港冇行貨，水貨有冇得你揀就要視乎店鋪啦！
▲5%都仲用到粒半鐘，真係長命之選
籮文：「除咗影相，特別推介用黎睇片！」
超大電池係真嘅，不過用唔用到兩日就視乎用量。籮文認為正常使用都用到一日半，算係好好架啦！影相方面，Moto X Play 就教大家一個道理：高像素唔代表靚，而且因為防震麻麻，像素高高影出黎都係好易濛。所以籮文依部機嘅賣點就係有唔錯嘅芒同埋前置喇叭，睇片享受升級！
售價：$2,695
查詢：Expansys（2405 8071）
相關文章:
【評測】moto Razr 50 / 50 Ultra 開箱評測 外屏可作主力屏幕使用
分享到 :
最新影片
