今次 Apple 推出 iPhone 6s / 6s Plus，就破天荒首次引入最多顏色，除本身嘅太空灰、銀色同埋金色之外，仲首次加入玫瑰金色。究竟邊部最多人 like？我哋就召集咗 unwire 同事們同埋 unwire 之友來講民意調查，睇下係咪真係玫瑰金最多女仔 like？
玫瑰金組
▲阿魚：我真係幾 like 呢隻玫瑰金，因為隻色真係幾靚，女仔用啱哂！
▲Doris：如果換機梗係買玫瑰金啦，咁樣出到去人哋先知道我換咗新機㗎嘛！
▲Bowl：玫瑰金真係超靚，我已經訂咗大機（iPhone 6s Plus）啦！不過好似今次部機比上一代厚少少喎……（編按：厚咗 0.2mm 咋喎，咁都 feel 到？！Bowl：真係 feel 到喎！路人甲：呢啲真係平時摸慣 0.0Xmm 嘢嘅人先會 feel 到！完！）
▲Erie：女仔用呢部玫瑰金都真係幾靚，同埋幾易襯衫同埋襯哂我嘅手指甲，yeah！
總票數：4 票！
總括來講，揀得玫瑰金嘅都係女同事，可見玫瑰金真係深得女仔鍾愛！
金色組
▲Steven：我鍾意金色多啲，因為一來高貴啲，二來金色 cool 得來有少少 warm，感覺好舒服。加上好多咩金像獎呀、金球獎呀都係金色，感覺係權力嘅象徵！（群眾起哄：果然土豪揀土豪金 LoL！）
總票數：1 票！
Steven 果然係管理階層人士，揀著 iPhone 都要揀著部權力象徵嘅金色。但可惜，管理階層永遠係人數比較少嘅，所以金色嘛，得 1 票！
銀色組
▲艾露貓：我鍾意銀色多啲喎，一來男人梗係用銀色啦，二來銀色比較淺色，望落 sharp 同醒神好多。
▲Rayman：我用開太空灰色 iPhone，來緊真係想轉用銀色，感覺好靚！至於金色同玫瑰金色，太女仔啦，一定唔會揀！
▲Elliot：4 隻色放埋一齊，最鍾意都係銀色，其次就係太空灰。其實無乜點解，直覺。不過新 iPhone 手感真係幾正，令我諗番起自己部 iPad mini 2，因為手感真係好似。
總票數：3 票
清一色男生，可以見到銀色都係男生向為主，唔知各位男 wire 民又同唔同意呢？
太空灰組
▲Jasmine：我好唔鍾意其他顏色機有條白邊，好礙眼；太空灰條邊都係灰色，感覺一體啲靚啲，所以我揀佢！
▲Denise：我都揀太空灰，因為感覺佢係最唔似 iPhone 嘅 iPhone！（編按：好玄……）
▲蘿文：我都揀太空灰（編按：喂喂喂，你之前明明揀銀色㗎喎！蘿文：而家變心唔俾呀？），因為低調得來好型，有種神秘感透出來！
總票數：3 票！
玫瑰金純女性向，銀色就純男性向，至於太空灰就明顯中性好多，男女都有支持者。而且鍾意得都係因為佢夠低調同埋無咗條白邊，感覺比較一體化。睇來太空灰真係適合平時做人比較低調嘅用家哦！
影片版本 （請耐心等候 Loading)
總結：玫瑰金驚險跑出！金色得 1 票太意外
整體來講，今次 Apple 推出玫瑰金色 iPhone 6s / 6s Plus，似乎押中了，因為鍾意得嘅都係女生，而大家都知道女性市場係一個無底深潭！女士們一旦鍾意一樣嘢，就點都會諗辦法入手！所以從我哋 unwire 同事同埋 unwire 之友嘅民意調查得知，睇來來緊街上們真係會有唔少女仔拿住部玫瑰金色 iPhone 用啦。不過令 Edward 比較意外嘅，係舊年先有嘅金色 iPhone，今年竟然得一個支持者！實在太令人感到意外了。唔知各位 wire 民，你哋諗法會唔會同我哋同事同埋 unwire 之友一樣呢？不妨留言講下大家想買邊一部？
