全新嘅 iPhone 6s / 6s Plus，都已經同大家介紹咗唔少新功能。但可能各位 wire 民都有一個疑問：新機雖然係設計同按鍵、插槽、喇叭位都同舊機一樣，但新機比舊嘅 iPhone 6 / 6 Plus 畢竟厚咗 0.2mm，究竟舊嘅配件係新機上面仲用唔用到？而家就等 Edward 拿來幾件舊配件，同大家分享一下啦。
首先為大家測試嘅，就係普通保護套。當然如果大家舊機用緊嘅係好緊身嘅保護套（即係係手機拆落來都會爛個種），咁就唔好期望用得番啦。只要唔係太貼身嘅話，一般都可以用到，尤其是軟身個種保護殼 / 套就更加。筆者就拿來 Pure.Gear Slim Shell for iPhone 6，套係 iPhone 6s 上面測試一下，睇下效果會係點？
▲今次用來測試嘅就係呢款保護殼。
▲盒上寫明係為 iPhone 6 而設嘅，並非 iPhone 6s。
▲究竟套上新機之後會係點呢？為咗證明係新機，筆者用咗玫瑰金色 iPhone 6s 來測試。
▲完全 tight fit，無問題！
▲左右兩側按鍵位完全啱位。
▲機底 3.5mm 耳機插孔、Lightning 插槽同喇叭位都完全無遮蓋。
▲鏡頭位都完全無影響，開孔位完全正確。
測試一大家可以睇到，筆者用呢款保護套，基本上係 iPhone 6s 上面用完全係無問題。但當然，為咗安全起見，Edward 都建議大家買咗新機後，先試試舊機殼 / 套用唔用得番，用得番就唔洗哂錢買過新又環保啲，真係用唔番先買新殼 / 套啦。
係測試二，Edward 就搵來大品牌嘅三防機殼來同大家試試。呢款三防機殼，都係為 iPhone 6 而設嘅（其實 6s 啱啱先出，市面都唔會咁快有三防殼賣啦）。究竟係 iPhone 6s 上又用唔用得著？而家就同大家試試。
▲Edward 試嘅就係呢款三防殼。
▲拆開三防殼，iPhone 6s 成功放入無問題。
▲套上背蓋，完全 tight fit！
▲兩側按鍵都一樣用得到無問題。
▲機底兩個保護蓋打開，3.5mm 耳機插孔同 Lightning 插槽都 fit 哂位。
三防殼一般開孔位比一般保護殼要更精準，畢竟如果位置唔夠精準，確有可能出現入水情況。不過機殼內厚度一般都唔會預咁實，因為如果太實要取出就比較麻煩。所以放入 iPhone 6s，一般都唔會有太大問題。所以用幾百甚至千幾蚊買嘅舊三防機殼，大家就唔洗擔心用唔番啦。
除咗機殼之外，相信有另一樣配件大家好擔心用唔用到嘅，就係強化玻璃保護貼。好多人話如果 iPhone 6s / 6s Plus 上面用上強化玻璃保護貼，3D Touch 功能會失去功能，做唔到 Peek、Pop 等功能。但究竟實情係咪咁？Edward 就用上為 iPhone 6 Plus 而設嘅 Armorz 0.2mm 強化玻璃保護貼，貼係 iPhone 6s Plus 上面，睇下 3D Touch 各項功能係咪仲用到？
▲呢款就係筆者測試嘅 Armorz Stealth Extreme Lite 強化玻璃保護貼。
▲大家可以睇到係專為 iPhone 6 Plus 而設嘅。
▲貼上 iPhone 6s Plus 機身，基本上無問題。
▲用唔到 3D Touch 功能？唔係喎！一樣用到無問題！
測試三大家可以見到，就算係專為舊機而設嘅強化玻璃保護貼，係 iPhone 6s / 6s Plus 上面都一樣用得番，而且亦無影響 3D Touch 功能，大家可以放心了。另外筆者提提大家，我唔擔保每一款保護貼都唔影響 3D Touch 功能，根據 Apple 官方表示，只要選用嘅係擁有「Made for iPhone（MFi）」認證，一般來講都唔會對 3D Touch 功能有影響。所以大家無論係用新貼定舊貼，都要記住呢一點啦。
人工智能脫衣程式 強制從 App Store 下架 Apple 被批反應緩慢 中國手機市場競爭激烈 iPhone 從銷量首位直接跌至第五 Apple 推出開源生成式 AI OpenELM 有 4 種版本 + 可在手機上運行
