Categories: 手提電話重點消息

5 分鐘睇盡 Nexus 5X / 6P 7 大重點

2015-09-30

Published by

Edward

Google 剛剛舉行發佈會，終於宣佈推出今年的全新 Nexus 手機，而且更是首次來個「雙響炮」，一次過推出 Nexus 5X 及 Nexus 6P。究竟兩部全新「親生仔」有咩特別？而家就等 Edward 同大家總結一下。

一）一體化機身！6P 採用全金屬

首先今次兩部 Nexus 同上代一樣，都係採用一體化機身，而當中 Nexus 6P 更採用全鋁金屬機身，相比上代手感應該更加好。

▲Nexus 6P 採用全鋁金屬一體化機身，並有 3 款顏色俾大家選擇。

▲至於 Nexus 5X 雖然並非採用金屬機身，但同樣係一體化設計，亦有 3 種顏色選擇。

二）機背內置指紋辨識 Nexus Imprint

另外，今次兩部 Nexus 均內建 Nexus Imprint 指紋辨識功能，而且有別於其他擁有指紋辨識嘅手機，Nexus 5X 同埋 6P 嘅 Nexus Imprint 指紋辨識器位於機背銀圈中間位置，基本上大家拿住手機食指一般擺放嘅位置，應該比係 Home 鍵嘅指紋辨識器更好用。另外，據 Google 表示呢個 Nexus Imprint 指紋辨識器，當使用一段時間後，辨識速度可達到少於 600ms，而且辨識不能嘅機率亦頗低，變相大家基本上係一放手指上去熒幕就立即可以解鎖。當然 Nexus Imprint 能支援 Android Pay，不過係香港就用唔到了。

▲支援指紋辨識功能，Google 叫做 Nexus Imprint，位置係機背金屬圈位置。

▲食指很自然會放係該位置，咁就可以輕鬆解鎖，亦支援進行 Android Pay 付款，可惜香港暫時未支援。

相關文章:

【教學】「ImageFX」Google AI 繪圖工具教學免費使用、一鍵生成旅行／食物圖片

Google 推出 Chrome 付費版為企業提供額外網絡保安功能

Google AI 修圖功能全面開放 iPhone 及 Android 手機都可用到

三）更大 pixels 吸光更多

此外，Nexus 5X 及 6P 均採用了 1,230 萬像素全新鏡頭，而最特別並非像素，而係它每一個像素嘅體積都達到 1.55 µm，相比上代 Nexus 6 只有 1.12 µm，甚至 iPhone 6s Plus 只有 1.22 µm 都要大得多！雖然相比 HTC 當年嘅 UltraPixel 相機達到 2 µm 仍然細得多，但相信已經比唔少手機都要好。像素面積大有咩好處？最簡單係影相，尤其是進行低光攝影個時可以吸更多光，令大家唔洗開閃光燈，都可以有清晰漂亮而且具有現場氣氛嘅相片。

▲採用擁有更大像素面積嘅新鏡頭。

▲與上代 Nexus 6 及現在熱賣嘅 iPhone 6s Plus 比較像素面積。

▲比較日落後 23 分鐘及 37 分鐘嘅拍攝效果，由左至右分別係 Nexus 6、iPhone 6s Plus 及 Nexus 6P。

▲zoom 近睇可見最右方 6P 確實擁有低光環境下拍攝出更清晰更光相片嘅表現。

另外值得一提嘅係，兩機主鏡頭均採用鐳射輔助對焦功能，加快對焦速度。此外，Nexus 6P 前置鏡頭都升級至 800 萬像素，而 Nexus 5X 就具備 500 萬像素，而兩部 Nexus 嘅前置鏡頭，像素面積都有 1.4 µm，令大家係較暗環境影 selfie 都唔會影到口黑面黑。

▲同 LG 手機一樣，支援鐳射輔助對焦功能，加快對焦速度。

Google 亦係 Nexus 5X 及 6P 加入全新影相拍片功能，例如：兩機均可支援 4K 30fps 影片拍攝，亦支援 Slo-Mo 慢動作影片拍攝。

▲新機均支援 Slo-Mo 慢動作影片拍攝。

▲亦支援連拍數張並由系統自動從中選取最靚的相片儲存。

四）轉用 USB Type-C 插槽

另外，今年全新 Nexus 5X 及 6P，均採用了今年流行嘅 USB Type-C 插槽，另外亦支援快速充電功能，只需充電 10 分鐘就可以使用 7 小時（Nexus 6P）/ 3.8 小時（Nexus 5X）。睇來大家以往嘅 Micro USB 線，睇來要榮休了。

五）熒幕一部 2K 一部 FHD

至於熒幕解像度方面，旗艦級嘅 Nexus 6P 採用 5.7 吋 AMOLED 熒幕，而且解像度亦有 2,560 x 1,440 2K，據 Google 官方表示，雖然 6P 擁有 5.7 吋熒幕，但實際機身闊度比 5.5 吋手機更窄！至於次一級嘅 Nexus 5X 就採用了 5.2 吋 1080p 普通 LCD 熒幕。

六）內建 Sensor Hub 感應動作更靈敏

此外，Nexus 5X 及 6P 均內建了全新嘅 Sensor Hub，內藏多個感應器之餘，還可感應不同動作及手勢，亦十分慳電。有了呢個 Sensor Hub，可以令手機更智能，例如：係關熒狀態下拿起手機，熒幕會自動顯示時間、有無新訊息等資料。

▲內建全新 Sensor Hub。

▲拿起手機關閉的熒幕會以低亮度顯示時間或其他必要資訊。

相關文章:

【教學】「ImageFX」Google AI 繪圖工具教學免費使用、一鍵生成旅行／食物圖片

Google 推出 Chrome 付費版為企業提供額外網絡保安功能

Google AI 修圖功能全面開放 iPhone 及 Android 手機都可用到

七）預載 Android 6.0 香港推出無期

另外，Nexus 5X 及 6P 既然係最新「親生仔」，自然會預載最新嘅 Android 6.0 Marshmallow 作業系統。售價方面，Nexus 5X 售價為 US$379（16GB，約 HK$2,956）及 US$429（32GB，約 HK$3,346）；而 Nexus 6P 售價為 US$499（32GB，約 HK$3,892）、US$549（64GB，約 HK$4,282）及 US$629（128GB，約 HK$4,906），比起舊年推出 Nexus 6 真係平好多！