而家有好多網站都鍾意開一個有關工作貼士的欄目（我地係其中一個？），放好多不同名人/成功人士/作家的工作建議，俾大家 模仿 參考，等你可以更上一層樓，先唔講個啲建議係咪真係用得著，小編自己幫大家篩選的時候都有過濾一下，有時係因為文化差異，有時係佢地的工作性質令建議唔夠大眾化，所以千祈唔好盲目盡信網上的資料呀！今次揀左幾個小編都覺得極受質疑的工作建議出黎，講下佢地的問題。
小編睇過唔少建議，都有提及過呢樣，叫人返工第一時間唔好 check Email。小編做過幾份工，從來都做唔到呢個建議，當然我唔係老闆級一晚有幾百萬個 Email send 入黎，第二朝要嘥好多時間都 check 唔晒個種，但一晚可以發生好多野，返去唔睇左先就好似呃緊自己冇事發生咁。而且我深信有唔少朋友的公司涉及跨國業務，你朝早唔睇，就唔知個客/海外分公司搞緊咩，咁點得呢？
其實小編就覺得返到去最好就 check 左 Email 先，如果 Email 入面的問題好易解決到，例如只需答 Yes/No，問你 Approval，交俾同事 Follow Up，咁就拿拿臨覆左先都冇問題，但如果又要 chur 你一大輪時間又做 research 又盛，你就將佢 mark 返做「未讀」，排程，遲啲先再搞。
其實小編覺得返到去睇一睇 Email 先反而可以慳到大家時間，更可以調整工作順序，反而唔睇可能仲會 Miss 左啲重要訊息。
你以為咁做好醒，做完最難個啲，其他個啲就好快搞掂。咁諗就錯了！想當年考試，老師都教你要做左易個啲攞分先啦，難個啲留返最後先鬥架嘛。如果一開始就用晒啲精力做難個樣，之後易個啲都做得愈來愈慢，仲可能 end-up 乜都做唔好。
寧願做好啲簡單又快可以搞掂嘅先，當做個熱身，做順左就得心應手啦！另外，你亦可以嘗試將大的工作斬件，逐少逐少咁完成，有成功感之餘又可以加速完成！
其實整 To-do List 係好事黎嘅，小編都有整開，寫低最重要個幾項工作，提醒自己要完成。但千祈唔係事無大小都寫晒上去，咁樣只會愈整愈長，仲會錯 focus。
點算好？
一、你可以分開幾個 list：例如你負責幾個 Projects，就按 Project 內容分工，切忌撈亂只按時間順序。
二、只寫重要大項：太細碎的步驟就唔好寫落去，除非你真係會唔記得，因為 To-do list 的作用係提醒，唔係 Guideline 呀！
現實世界入面根本唔會容許你只專心做一件事，Mulitasking 無論係工作定生活都係必須要的能力。而且好多公司都係想要身兼多職的同事，尤其你自己創業，要同時照顧同事、客、工作… 一大堆，有咩可能只專心做一件事？反而好好訓練自己 multitasking 的能力，先可以令你做好你份工！
Multitasking 的意思其實並唔係要你劈開個腦，同時講電話又打 Email （雖然小編成日都係咁…），而係做得好 A Project 的時候又唔會令 B Project 落後軌道，照顧到多方面的需要。Train 大你嘅 capacity ，令自己進入狀態，先係重要呀！
來源：Forbes
unwire.hk 一直都有報道生活科技，亦有採訪科技創新企業。我們希望透過成立共享工作間 Unwire Space 推動一下香港創業文化的發展。 UNWIRE Space 就位於我們編輯室旁，一個結合新媒體宣傳力的共享工作間就是我們與眾不同的 unwire.space 了。
