哈囉喂就黎到，啲恐怖大片亦都陸陸續續上畫啦；UA 亦都趁住 30週年推出左「萬聖節月」，一眾嘩鬼跳出螢幕，同你扮鬼扮馬。比你捉到佢地，同佢地影 Selfie 仲會有小禮物送番比你，將相 up 上 Facebook 或者 Instagram ，更有機會嬴得戲飛。鍾意睇戲既你唔係放過呢次機會啊嘛？
既然係哈囉喂，當然就有唔少恐怖片上映啦；而剛剛上映既港產片《死開啲啦》就率先打響頭炮。小編就同其他 UA 會員一齊搶先睇優先場，老老豆豆小編正式睇戲前，睇個 trailer 都唔知成套戲想講乜，「懶恐怖」咁但又唔恐怖，以為又會係爛戲；不過比想像中好得多啵：佢係一套恐怖喜劇，仲要係一套男女老幼都岩睇既恐怖喜劇，笑位控制得幾好之餘而且幾有內涵㗎（不過又係講地產霸權咁囉），而且比 trailer 更唔恐怖，所以岩晒啲新手睇既 BB 級恐怖片。但若然你唔怕恐怖啲的話，黎緊 10 月 22 日上既《書中自有魔怪谷》；而如果你想打大佬，就一定唔可以錯過連小編都好期待既，係 15 號上既《血色莊園》啦！
其實一開始睇到 UA 段片（請按此），小編以為係一班嘩鬼會係睇睇下戲既時候衝入黎嚇觀眾（雖然諗返轉頭，都幾騷擾睇戲），但原來只係戲院大堂到設自拍區比觀眾同各位嘩鬼一齊影相咋 sosad （一啲都唔恐怖囉）。不過唔緊要，因為比你捉到佢地影相的話，你就可以憑「捉鬼照」換糖或者搞鬼貼紙㗎啦；而且只要係「搞乜鬼自拍區」同一眾嘩鬼以最搞鬼表情影相，將相 upload 上 Facebook 或者 Instagram ，兼 hashtag #UA30halloween （記得記得設定公開！），每星期 UA 就會送返 2 張戲飛比 5 個最搞鬼觀眾。
小編提提大家，四個嘩鬼並唔會長期係各個戲院大堂坐定定等大家黎捉，想捉鬼都要講 timing ，記得留意番以下個時間表，係個段時間既指定戲院捉鬼啦！
| 日期 | 戲院 | 時段 |
| 10/10(六) | UA Cine Moko | 下午4時 – 8時 |
| 11/10(日) | UA太古城中心 | 中午12時30分 – 下午4時30分 |
| 16/10(五) | UA Cine Times | 下午6時 – 10時 |
| 17/10(六) | UA iSQUARE | 下午4時 – 8時 |
| 18/10(日) | UA Megabox | 下午4時 – 8時 |
| 23/10(五) | UA沙田 | 下午6時 – 7時30分 |
| UA屯門市廣場 | 下午8時30分 – 10時 | |
| 24/10(六) | UA Cine Times | 下午4時 – 8時 |
| 25/10(日) | UA太古城中心 | 下午4時 – 8時 |
| 30/10(五) | UA iSQUARE | 下午6時 – 10時 |
| 31/10(六) | UA Cine Moko | 下午4時 – 8時 |
