鵝肝馬卡龍係咩味？依莉詩親試 À La Bakery 麵包店

見到一粒粒糖果色系又可販嘅馬卡龍，女士們就算怕佢太甜太痴牙都好，總會忍唔住方一粒入口。亦因為咁，我依莉詩就不知天高地厚，放咗粒鵝肝馬卡龍入口，大家又估下佢係咩味呢？

 

話說由資深電視人蔡和平開設嘅 À LA BAKERY 法式麵包店最近係尖沙咀 The ONE 開咗間分店，仲特別推出咗四大天皇馬卡龍，包括松露鵝肝馬卡龍、無花果鵝肝馬卡龍、白香檳馬卡龍 同 玫瑰香檳馬卡龍。咁特別就更係要試下啦！

▲ 松露鵝肝馬卡龍、無花果鵝肝馬卡龍 $23/粒

小食評：鵝肝馬卡龍唔會話太甜、太粉或者痴牙，做到內脆外軟嘅口感。而 2款入面我比較鍾意食無花果鵝肝馬卡龍 ，鵝肝味鹹鹹香香，有 D 似鹹蛋黃嘅味，配埋唔太甜嘅馬卡龍，味道層次好豐富，雖然無花果味唔太出，不過食落有少少粒粒，雙重口感。而松露鵝肝馬卡龍無無花果鵝肝馬卡龍咁鹹，松露味亦唔太突出，不過都幾特別。

 

▲ 白香檳馬卡龍、玫瑰香檳馬卡龍 $23/粒

小食評：香檳馬卡龍比較煙靭，食落有少少酒香，唔會過甜，食多幾粒都無問題。

▲ 各款口味馬卡龍 $18-25

除咗四大天皇外，仲其他 8款口味，如開心果、橙花玫瑰味等。買埋個禮盒裝送禮就啱晒啦！

▲ 原來依家常見、外表光滑嘅馬卡龍 (右) 並未係最傳統法國風味，最原始嘅馬卡龍 (左) 外表粗糙比較似曲奇。

▲ Artisan Macarons $25/粒

小食評：原始版馬卡龍外表粗糙唔太靚仔，不過味道比較香濃，有 D 似杏仁餅。

▲ 除咗馬卡龍，À LA BAKERY  仲有牛角包、長法包、蝴蝶酥、軟包等售賣。特別的是，麵包所以前期製作都係法國整，飛到香港，師傅只係負責放入焗爐，可謂原汁原味嘅法式風味。

 

▲ 原味牛角包 $15

小食評：牛角包成日都食，而呢度嘅牛角包特別鬆軟，而且唔油膩，用嚟做早餐應該唔錯。

▲ 限量版牛角包 $25

生日送蛋糕好似太老土，不如試下用牛角包傳情。只要係 2日前訂，師傅就會用白朱古力寫幫你上字句。收到個咁特別嘅牛角包係味好窩心先？

▲ 細蝴蝶酥 $55/包、大蝴蝶酥 $20/塊

小食評：蝴蝶酥以傳統手藝製造，入口香脆鬆化，唔太甜，番工嘅時候當零食食都幾好。

 

依莉詩：「又鹹又甜好新奇！」

À La Bakery 尖沙咀店唔似總店咁有位坐，反而似一間普通麵包鋪，主打天然、無添加，中高定價，OL番工經過可以買個包食，唔怕太油膩。而馬卡龍方面，相信都係送禮嘅多，鵝肝同香檳味就夠晒特別，又鹹又甜好新奇！

 

À La Bakery 尖沙咀店

九龍尖沙咀彌敦道100號​ ​The ONE​ ​地面​ ​GA05​ ​號舖
電話: 277 999 77

分享到 :

最新影片