又到畢業季節，係時候諗下送咩禮物俾朋友。如果買花同公仔好似唔太實際，影完相之後就唔會再用。今日我依莉詩就去咗海港城 LOG-ON 揀禮物，睇下我點將份禮物變得更有個性，更有心思啦！
海港城 LOG-ON 最近搬遠咗，不過就設立咗個專區，入面有各種機械同專人教導製作個人化禮品，等你揀啱心水之後即刻包裝埋，慳時間又有心思。
要個人化莫過於刻名上禮物，等簡單的一支筆、一個座枱相架成為專屬於收禮物嘅人。呢度嘅法國頂級雕刻機能夠係玻璃、金屬或塑膠等多款不同物料上雕刻心意句子、名字、圖案，甚至相片等，打造一份充滿個人品味之禮品。
▲ 因為雕刻喺唔同物件上都有唔同效果，所以就最好揀 D 已經測試成功嘅產品做為雕刻。
▲ 負責人話愈平面嘅產品雕出嚟虔果就愈好，好似呢 D USB集線器就可以雕到好多特別圖案。
▲ 只要揀好 $300 以上嘅產品，再設計好自己想刻 D 咩就會有專人幫你刻上去，整個過程只需要 5-10 分鐘，非常快。
▲ 我最後就揀咗呢支筆做男朋友嘅畢業禮物啦！用自己嘅私家筆簽名係咪型 D 先。
除咗係玻璃、金屬或塑膠等物料雕刻外，如果想送皮革質品的話都可以用皮革壓印機親手壓上心意字句同圖案，令銀包、卡片套等皮革禮物變得與別不同。
▲ 就咁送支筆好似太單調，見熊熊嘅圍裙可以插到支筆落去，於是我就揀埋隻可以刻字嘅熊襯埋啦！
依家咁興用帆布袋，送個親手設計嘅布袋俾朋友或者自己都一樣咁有特色。呢度有好多唔同大細、款式嘅袋選擇，而且仲可以買埋唔同嘅裝飾貼紙、圖案或繡花章等，即時用熱壓熨機熨上去，為布袋成為獨一無二嘅禮物。
▲ 純色布袋就好似塊畫布咁，有好大發揮空間。
▲ 望住咁多裝飾貼紙、圖案同繡花章真係三心兩意。
▲ 揀好晒，諗埋擺位，就可以熨上去，非常簡單。
只係整熨貼怕清得耐都可以親手設計番個襟章扣上布袋，咁就更加有特色啦！又或者整個襟章扣係禮物上，一樣可以令包裝錦上添花架！
▲ 如果唔想自己畫，呢度都有一好多精美嘅圖案俾係揀，簡單畫少少嘢就可以製作到有個人特色嘅襟章。
▲ 係設計好嘅圖案上面加少少字就已經可以好唔同。
揀好禮物當然要加番張心意卡等人知道你嘅心意啦！呢度揀完心意卡之後可以即刻係印仔區蓋印仔同試筆區到畫公仔，一次過搞掂，唔洗怕屋企無顏色筆寫卡。
▲ 印仔區有超多印仔你揀，想點蓋都得，好鬼過癮。
▲ 蓋 D 印仔係卡到就唔洗怕張卡太多空白位唔知寫咩好啦！
▲ 試筆區同樣有超多筆俾你試，唔怕買咗番去先覺支筆唔好寫。
▲ 仲可以跟住本簿畫公仔，我畫嘅鴨仔係咪好得意呢？
禮物同卡都揀掂，係時候將禮物扮靚靚。包得靚 D 拆禮物都開心 D 嘛。呢度有好多花紙、包裝袋同絲帶可以揀，已經仲有專人幫你包，咁就唔洗手乸手唔成世。
▲ 唔同風格嘅花紙、包裝袋都有，隨時可以令份禮物提升到令一層次。
▲ 膠紙亦有好多選擇，真係眼花撩亂。
▲ 呢部標籤機好特別，因為佢可以印絲帶，而且圖案、中、英、日文都難唔得佢。
▲ D 圖案好得意架！除咗花，仲有動物同文具等等。
▲ 估唔到連條絲帶都可以咁有心思，收禮物個個一定會鍾意！
▲ 呢度有好多特別嘅包裝方法，絕對唔係平時包正方形咁簡單架！
▲ 將所有準備好嘅嘢交俾佢，佢就會係 15-30分鐘之內幫你設計好最啱份禮物嘅包裝方法，令禮物睇落高級咗好多。
要揀畢業禮物，我就覺得實用 D 比較好，始終都開始出嚟做嘢，唔再係小朋友嘛，但就咁買件禮物又好似太 hea ，最好就可以刻埋名啦。而呢度可以一條龍搞掂晒揀禮物、刻名、整心意卡同包禮物嘅過程，真係勁方便，慳時間之餘人地又覺得你好有心思。不過對有選擇困難症嘅我都有 D 煩惱，因為每樣嘢都太多選擇啦！
