今日 OnePlus 係北京發佈了全新的 OnePlus X 智能手機，售價只係 1,599 人民幣，算係 OnePlus 首部 2 千蚊人仔以下的手機。究竟用落感覺如何？而家就等 Edward 同大家分享一下。
金屬邊玻璃背手感唔錯
其實一睇，Edward 感覺呢部 OnePlus X 真係同 iPhone 4 系列有啲似，因為都係用金屬機邊，而機面機背就採用強化玻璃。當然，OnePlus X 確比 iPhone 4 大，因為佢始終用上 5 吋熒幕；另外金屬邊框根據 OnePlus 所講稱為「阿爾勒紋理」，其實只係 14 行紋理，Edward 拿在手上，確實無 iPhone 4 滑滑金屬邊個種易跣手嘅問題，加上手機只係 5 吋熒幕，邊框又算幼，所以單手操控手感算係唔錯。不過大家要記住，如果想買 OnePlus X，千祈唔好買基礎版（雖然都未知香港會唔會出基礎版），因為呢個版本係無阿爾勒紋理，又得 2GB RAM，但同普通版差價都係 1 舊水人仔，唔值得咁樣慳。
▲OnePlus X 機邊採用官方聲稱為「亞爾勒紋理」的花紋，都幾靚之餘手感都唔錯，亦有助防止跣手。
▲單手操控完全無問題。
▲熒幕底部設有輕觸式按鍵，左至右分別為返回、主頁及程式切換鍵，但筆者就覺得按鍵嘅背光燈太暗了，有時真係開咗都唔係好睇得到。
▲同 iPhone 6s Plus 比較，明顯見到 OnePlus X 細咗成個碼。
▲OnePlus X（左）厚度來講比 iPhone 6s Plus（右）仲要薄！
▲同 OnePlus 2 比，OnePlus X 一樣亦一截。
至於機背及機面玻璃，亦唔似 iPhone 4 咁採用平面玻璃，而係近日中國手機廠商頗多採用的 2.5D 玻璃，更是底面均採用呢款玻璃，這令筆者拿 OnePlus X 係手上時，無一種界手的感覺。
▲底面都係採用 2.5D 玻璃，摸落用落都唔覺有界手感覺。
陶瓷機背變鏡面但易痴指紋
另外，今次 OnePlus 推出嘅 X，唔止有強化玻璃機背版本，仲有一款陶瓷版，而呢種陶瓷並非一般陶瓷，而係官方聲稱的鋯寶石陶瓷。據官方表示，呢種陶瓷是硬度上僅比藍寶石低，不過就比 Gorilla 強化玻璃高好多（藍寶石玻璃硬度為 9H，鋯寶石陶瓷硬度為 8.5H，Gorilla 強化玻璃為 5 – 6H），聽落好似好勁，但其實大家日常生活都接觸到呢樣陶瓷，但唔係用係手機，而係用係廚房用具，個樣就係陶瓷刀。大家都知道陶瓷刀真係比一般刀硬淨，而且唔易崩，所以呢種物料用係手機機背，理論上又真係可以加強手機耐用程度嘅。
▲左邊為陶瓷版，右邊為普通版，可見陶瓷版採用鏡面設計，而玻璃的普通版就無咁反光。
不過問題就在於：陶瓷版嘅 OnePlus X，其實同 Sony 部 Xperia Z5 Premium 一樣，都係採用鏡面設計，無錯係可以令到手機睇落更加高貴，但問題係極易痴上手指指紋，對於有潔癖的用家來講，一係就隨身帶備塊抹布隨時清潔，一係就建議大家寧願買普通版（採用強化玻璃機背）嘅版本啦。
▲陶瓷版真係拿來照鏡都得！
▲但缺點係好易痴手指膜。
相關文章:
【實試】xAI Grok 2 開放免 VPN 香港任用 生成圖逼真 + 名人 / IP角色都可生成 Elon Musk：決定自己用 xAI 做遊戲 遊戲產業被大企業箝制 日本 Twitter 迴避與 X Japan 撞名 最終公司新名改為 X Corp. Japan
熒幕質素不錯可視角度高
至於熒幕方面，OnePlus X 採用 5 吋 1080p Super AMOLED 熒幕，相比一般 TFT LCD 熒幕，黑位顯示確實較實淨（OLED 熒幕天生優勢~~），色彩亦算自然，可視角度都幾高，作為一部入門機，我諗大家都唔會苛求有 2K 解像度熒幕掛（事實上旗艦嘅 OnePlus 2 都無 2K 啦），所以對於一般用家來講，應該收貨㗎啦。
▲熒幕採用 Super AMOLED 1080p，質素算唔錯，無明顯偏色之餘，顯示細字都好清晰。
▲Super AMOLED 材質熒幕好處除咗亮度好足夠，仲有就係黑位好實，而且 OnePlus X 的熒幕色水都算自然，唔覺好味精。
▲另一個 Super AMOLED 熒幕嘅好處，就係可視角度都幾高，側面睇都唔覺熒幕變暗或者變色。
相機加 ISOCELL 感光元件可惜無 OIS
至於相機方面，OnePlus X 採用 1,300 萬像素主鏡頭，亦採用全新 Samsung 的 ISOCELL 感光元件，加上 F/2.2 光圈、雙 ISP 影像處理器及 PDAF 相位對焦技術，對焦速度達到 0.2 秒，老實講唔算突出，但都足夠一般人使用，影出來嘅相片質素都算幾好，輕微油畫化但可接受，唯一係影暗位方面表現差啲啲，不過一部千零蚊嘅手機，都算係咁啦。筆者唯一覺得可惜嘅就係不設 OIS 光學防手震，令影夜景或者係較暗環境下影相，會容易因為手震而影到鬆郁矇嘅相片。所以各位 wire 民，用 OnePlus X 係較暗環境下影相，就要記住搵嘢穩定住對手先好影啦。
▲主鏡頭為 1,300 萬像素，而且採用 ISOCELL 感光元件。
▲影出來的相片，唔講真係唔知係出自一部兩千蚊人仔唔洗嘅入門機上。
▲不過 100% 放大相片，仍然係有少許油畫化現象，但屬於可接受範圍。
▲但缺點就係無內建 OIS 光學防手震，係較暗地方影相（筆者測試時已開始入黑）會容易手震。
至於前置鏡頭，就同好多時下手機一樣，都有 800 萬像素，光圈為 F/2.4，並有 84 度自拍角度，筆者試過質素都算唔錯，就算加上美顏功能，相片都只係有輕微油畫化情況，可以接受。
▲自拍鏡頭有 800 萬，而且有 84 度廣角，都算唔錯。
▲100% 放大前置鏡頭拍攝的自拍照，同樣有輕微油畫化現象，但一樣係可接受程度。
用番舊規格少許失望
至於硬件方面，今次 OnePlus X 就反其道而行，好多新中國品牌為咗避開 Qualcomm Snapdragon 810 處理器嘅過熱問題，就改用 MTK 嘅 Helio X10 / X10 Turbo 處理器，但 OnePlus 就係 X 上面改用舊年旗艦手機嘅 Qualcomm Snapdragon 801 處理器！當然，無可否認呢粒處理器係暫時 Qualcomm 旗艦處理器入面最穩定嘅一枚，省電效果 OK 之餘，亦無過熱問題。但大家又是否願意用過時科技？呢個就真係睇用家個人意願啦。筆者就覺得可以千零蚊買到舊年要成 5、6 千蚊先買到嘅手機所用嘅處理器機款，唔敢話超抵，但都唔係過份啦，係咪？仲要部機都有 3GB RAM，用安兔兔評測都有超過 4 萬分，對於一般用家來講，就算要拿來打機，都夠用啦。
▲只採用 Qualcomm Snapdragon 801 處理器，屬於舊年旗艦規格，但兩千蚊人仔唔洗買到，OK 啦！
▲安兔兔評測入面獲得 41,266 分，只係比 Samsung Galaxy Note 4 差少少，都算唔錯。不過以性價比來講就不及 Zenfone 2 了，但如果計埋設計同造工，OnePlus X 其實都有力一鬥。
▲OnePlus X 用番舊有嘅 Micro USB 插槽，大家啲舊線可以用得番了！
▲支援雙卡雙待功能，不過未知是否雙 4G。另外亦支援 microSD 記憶卡擴充容量。
▲具備多項高階功能，當中包括支援 OTG！
▲另外亦有多種手勢操控。
▲當中筆者最鍾意就係呢個三指擷取熒幕手勢，只要放 3 隻手指係熒幕上面，向上再向下推一下就可以擷取熒幕，比 Samsung 手機嘅手掌滑動擷取熒幕嘅功能成功率更高同好用。
總結：平價機又靚靚地無投訴
整體來講，OnePlus 嘅手機作為中國品牌，其實一直以來係香港手機用家口中口碑都算唔錯，由 One、到 2，到今次嘅 X，可以見到 OnePlus 係手機質量、造工、設計各方面，確實如佢哋口號所言：Never Settled，次次都算去得幾盡。今次部 OnePlus X，雖然好似係用「過期科技」，但筆者成日都覺得，作為一般用家來講，買手機最緊要係 3 大元素：靚、使用時間長、同埋用得順暢，OnePlus X 最少符合兩樣：入門機來講算幾靚（雖然有少少向 iPhone 4 系列致敬嘅感覺），同埋整體使用都好順暢，加上用埋 801 處理器，最少用落理論上唔會有「鑊」先！
至於使用時間，由於試玩時間有限，筆者真係試唔得咁詳細，不過官方聲稱佢只有 2,525mAh 容量電池，而且無得換電，雖然聲稱擁有 9 小時連續播放音樂或 11 小時 30 分以 Wi-Fi 瀏覽網頁，以及 326 小時待機時間，但以筆者試玩過舊年採用相同處理器嘅手機經驗所知，呢個時間有機會打個 8 折甚至更低，要用上一日應該難度較大。但呢樣只係筆者猜測，係咪真係咁？真係要真機上手長時間試玩過先知，但無可否認，電量係筆者對 OnePlus X 最感憂慮嘅一點，其他項目，真係已經無乜可以挑剔或投訴了。
售價：1,499 元人民幣（約 HK$1,828）（基礎版；2GB RAM + 無阿爾勒紋理）；1,599 元人民幣（約 HK$1,949）（普通版；3GB RAM + 有阿爾勒紋理）；待定（陶瓷版）
查詢：OnePlus（https://oneplus.net/hk/x）
相關文章:
【實試】xAI Grok 2 開放免 VPN 香港任用 生成圖逼真 + 名人 / IP角色都可生成 Elon Musk：決定自己用 xAI 做遊戲 遊戲產業被大企業箝制 日本 Twitter 迴避與 X Japan 撞名 最終公司新名改為 X Corp. Japan
分享到 :
最新影片
