如果講起主打保安功能的智能手機，相信好多人都會第一時間諗起 BlackBerry。不過 Priv 下星期先至推出，如果大家等唔切，其實都有另一個選擇。今日 1o1o 就聯同 Silent Circle 合作係香港推出主打高加密程度的 Android 智能手機 Blackphone 2。究竟好唔好用？而家就等 Edward 同大家分享一下。
手感算唔錯機背易痴指紋
先講講 Blackphone 2 嘅手感啦。基本上部機都算做得唔錯，手感來講唔算極好但都唔差，5.5 吋熒幕手機筆者單手操控都尚算容易。另外機身設計都算幾 elegant，成部機採用全黑色設計，而機背就採用玻璃物料，睇落又真係幾靚，唯一缺點係玻璃機背易痴指膜，有潔癖用家要留意了。
▲單手操控都算容易。
▲不過唔好揸得太緊，因為熒幕邊位好容易會誤觸，變成好似上圖咁變咗入咗去介面設定度。
▲機背採用強化玻璃物料，睇落係幾靚嘅。
▲不過問題係幾易痴指膜。
主打加密防竊聽
Android 智能手機無疑係市面上最受歡迎的智能手機平台，但保安功能一齊為用家所垢病，雖然 Android 6.0 係呢方面係有所加強，但係都唔係部部都而家用得到。Blackphone 2 手機本身就已經內建加密晶片，比一般 Android 手機係加密程度上已經稍勝一籌。此外，它亦採用以 Android 為基礎開發的 Silent OS，配合內建程式，已經可以做到為通話加密、甚至可以設定向對方傳送短訊多久後自動銷燬，情節猶如大家睇《007》咁。但至於手機採用多高程度的加密系統？官方就未有明言，但筆者估計應該最少都有 128-bit encryption 程度先可以叫做「保安手機」吧？
▲介面同一般採用原生 Android OS 嘅手機差唔多。
▲有內建 Play Store，不過設定或進入時都要輸入密碼，果然係著重保安功能嘅機款。
▲Silent OS 係建基於 Android 5.1.1 開發的作業系統。
另外要留意的是，如果要做到加密通話或互傳短訊，需要雙方均使用 Silent Phone 呢隻 APP 先可以做到，如果係 Blackphone 2 就會係預載於內，如果係其他手機，筆者見到 iPhone 嘅 App Store 同埋 Android 嘅 Play Store 都有得免費下載，唔洗大家局住一定要用佢部手機，都算值得一讚嘅。
▲使用內建 Silent Phone 程式，就可以與其他人進行加密通話或加密以短訊聯絡。
▲有極多仔細功能俾大家選擇。
▲最特別係用佢來傳短訊俾其他人，傳出後大家會見到有個火焰符號係短訊旁，而下旁有一個時間，代表幾多分鐘（m）/ 小時（hr）/ 日（d）之後短訊會自動銷燬。大家如即時按下短訊旁火焰圖示，亦可以即時銷燬短訊。
▲銷燬後唔止自己部手機唔見咗條短訊，對方手機一樣會被遙距銷燬，保安性能幾高。
▲Blackphone 2 公司亦已認證咗部分 APPS，係可以配合 Blackphone 2 嘅 Silent Circle 功能使用，大家可以係 Silent Store 度下載。
設 4 獨立「房」分隔內容
Blackphone 2 嘅另一項獨特功能，就係 Spaces。簡單來講，就係將手機的儲存空間，好似劃「劏房」咁間開最多 4 個獨立空間，而 4 個獨立空間均有自己的儲存位置，中間完全隔開唔會 share 任何數據檔案，就連 APP 都唔會 share 來用，例如：你係 owner 嘅空間下載咗一隻 APP 使用，係另一個叫做 Work 嘅空間，要用番呢隻 APP 就需要重新下載登記使用。呢種做法好處係大家唔洗驚因為被竊聽手機內資料而同時使用幾部電話，而且就算一個戶口不慎被竊聽，竊聽者都唔會睇到其他空間內的資料，設計上都幾好。而且禁個制，就可以係唔同空間之間切換，用落都算係幾方便。
▲Blackphone 2 最多可建立 4 個互相隔開嘅空間（Spaces），唔同空間之間嘅資料係唔會互通嘅，以保障個人私隱不被洩漏。
▲用家可設定唔同 Spaces 各自用乜嘢 APPS。
▲另外有好多仔細設定，例如：你是否讓該空間用戶安裝軟件？是否容許安裝並未被 Play Store 認證的 APPS？呢啲統統都可以由管理員設定，儼然設定一部電腦的保安系統一樣。
▲亦可以設定是否容許唔同空間打電話、傳短訊等，另外就連擷取熒幕都可以禁止，配合埋 Silent Phone 軟件同其他人互傳短訊溝通，就唔驚被人 cap 咗 screen，將機密資料洩漏出去，對於一部手機幾個人用嘅公司客來講好有用。
▲最特別係可以設定唔同 APPS 入面嘅權限，仔細程度可媲美 Android 6.0 Marshmallow 內建的權限設定。
▲另外，唔同 Space 之間係互相間開兼獨立嘅。例如：筆者係 Owner 空間入面影咗一張相片。
▲然後拉下狀態欄並選擇另一個之前設定好嘅公司（Company）空間，再點按 Switch Space，就唔洗 boot 機都可以轉去另一空間使用。
▲當進入該空間時，就睇唔到頭先張相了。據官方表示，劃分空間係採用動態形式，即係手機會按唔同空間嘅使用率去間去，唔會平均分配，算係幾彈性。
▲另外如果要轉去另一空間，係需要輸入密碼，以保障私隱不被洩漏。
▲Blackphone 2 仲有隨機 PIN 數字鍵盤功能，如果開咗佢，每次顯示密碼鍵盤時，數字排列順序都會唔同，咁樣就算人哋睇到你禁邊個位，但只要唔知實際密碼係咩數字，都係入唔到去。
既然加密點解唔加生物認證？
其實講起 Blackphone 2 係保安手機，相信好多人（包括筆者在內）第一時間都諗起咩指紋辨識、虹膜辨識等生物認證加密功能，但唔好意思，呢部 Blackphone 2 係任～何～生～物～認～證～功～能～都～無！作為一部保安功能強的手機，但解鎖同加密都只係靠密碼或者圖案，係連 Nexus 或者部分入門手機都有指紋辨識嘅年代，真係唔係太接受得到……
▲完全無任何生物認證功能，呢樣係筆者最不解嘅部分：既然都做咗部高保安功能手機出來，點解唔做全套？
▲只係得密碼功能，雖然官方都加咗唔少其他輔助功能去加強手機保安，但筆者用落，感覺好似都唔係好安全咁……
▲官方好強調嘅遙距洗機功能，其實其他平台都有啦……老老實實！
總結：6 千幾買安全？抵唔抵見仁見智！
整體來講，Blackphone 2 呢部手機可以話係為保安而生，所以好多功能都放係加強手機保安性能上面，因此雖然部機賣到成 $6,498，但係硬件規格上只屬於一部中階 Android 4G 手機（採用 Qualcomm Snapdragon 615 處理器、3GB RAM、32GB 內置儲存空間、5.5 吋 FullHD 熒幕等）。睇番而家嘅 market，同樣以保安性能著稱，亦係採用 Android 作業系統嘅 BlackBerry Priv，剛剛開價都係 $6,488，比佢仲要平 $10 但係規格強好多（起碼係用 Qualcomm Snapdragon 808 處理器、有 2K QHD 熒幕同埋有實體 qwerty 鍵盤）。係咪值得買 Blackphone 2？定係等多等入手 BlackBerry Priv 更好？真係見仁見智了。至少在筆者角度來睇，暫時都係比較睇好 Priv 多啲啲。
售價：$6,498
查詢：1o1o（2888 1010）
