之前 HKT 推出電子錢包 Tap&Go，唔止方便而家又有唔少優惠，係 759 阿信屋購物仲搞過兩次半價，引來唔少人試用。可能唔少公司見到呢個市場大有可為，所以都踴躍欲試。最近就有一間名為 TnG 的公司又推出電子錢包，唔止公司名擺明好似 Tap&Go 簡寫，介面都同 Tap&Go 有 7、8 分相似，功能亦相若，亦同樣係同 759 阿信屋搞優惠，不過就係增值 $100 送 $100！咁抵，究竟好唔好用？信唔信得過？Edward 今朝就親身試過，而家就同大家分享下啦。
安裝篇
首先第一步就梗係要裝番個 APP 先啦。同 Tap&Go 唔同，TnG 一開波就已經可以支援 Android 同埋 iOS 兩個系統，大家只要係 App Store（iOS）或者 Play Store（Android）輸入 TnG 呢個關鍵字，然後就會搵到「TNG – e-Wallet HK（電子錢包）」呢個 APP，下載並安裝後再進行登記就可以用得。而家就等筆者同大家講講個步驟啦。
▲Step 01：首先係 App Store / Play Store 下載 TNG 隻 APP，完全免費。
▲Step 02：進入 APP 後，選擇語言（香港人當然揀番繁體中文啦），之後再點選「登記」。
▲Step 03：然後就輸入你的手機號碼、登入 APP 密碼以及交易密碼，兩組密碼建議唔同，前者用來 login 隻 APP 或查閱交易紀錄，後者就用來係交易時輸入作身份確認。完成後點按「立即申請」。
▲Step 04：之後會出現上面左圖畫面，如果係 Android 手機等一陣就會完成驗證並跳去上面右圖畫面，再點按「登入」就可完成。如果係 iPhone 嘅話，就會收到一個電話，大家接聽後收線再點按「登入」就可以了。
▲Step 05：入到 APP 啦，大功告成！
增值篇（內附搶 $100 著數教學）
既然係電子錢包，當然係要先增值，戶口有錢大家先用得到啦！TnG 而家仲要同 759 阿信屋合作，只要大家係首次係 759 阿信屋增值，增值 $100 會即時送 $100 俾大家，而且由即日至 11 月 19 日期間用 TnG 係 759 阿信屋購物，仲有額外八八折，究竟點樣增值呢？以下就等筆者教教大家。
▲Step 01：首先大家係主介面點按「增值帳戶」。
▲Step 02：然後大家會見到 5 個增值點，唔止同 Tap&Go 一樣，可以係 7-Eleven 增值，佢仲可以透過係 759 阿信屋、信用卡、銀通（JETCO）櫃員機或者網上銀行進行增值。不過大家要留意一點，就係只有係 759 阿信屋或者信用卡先可以做到增值後即刻用到筆錢，其他方法就需要下一個工作日先可以完成增值。今次筆者就揀係 759 阿信屋增值。
▲Step 03：進入後找到身處的分店，然後點按最右方的 QRCode，熒幕就會出現如上面右圖的畫面。
▲Step 04：此時大家只要叫店員嘟一下你手機熒幕上的 QRCode。
▲Step 05：增值完成！大家會見到明明增值 $100，但戶口已經有 $200！就係 TnG 送俾大家㗎囉！大家係番信息入面就見到㗎啦。
759 阿信屋購物篇
好啦，值已增，呢個時候就梗係去揀貨啦！揀完，要俾錢啦，究竟應該點做呢？而家筆者慢慢教大家。
▲Step 01：好啦，拿齊貨去到俾錢！大家見到未用 TnG 俾錢之後，係要俾 $175.1 㗎。
▲Step 02：呢個時候大家可以係主介面，然後點選「我的錢包」。
▲Step 03：之後大家就會見到張 759 阿信屋嘅電子會員卡。如果大家好似筆者部 G4 咁，係今日之前 download 隻 APP，咁就有可能無咗張電子會員卡，咁大家就要事後加番張卡入去啦。呢樣嘢後文再同大家講。見到張卡之後，要俾錢？禁下面嘅「店內付款」。
▲Step 04：然後大家要輸入之前設定嘅交易密碼。
▲Step 05：之後就會出現呢個畫面。
▲Step 06：然後俾個收銀員嘟呢個畫面嘅 QRCode。
▲Step 07：完成交易！折完之後只係要俾 $122.6，扣埋 $100 送嘅錢，即係筆者只係需要俾 $22.6，就買到 $175.1 嘅貨，實際上對於我來講係超過 87% off！！！
▲Step 08：俾埋張單大家睇，大家見到所有 item 都寫住 TNG 付款八八折㗎！
無卡點算？教你入番張電子卡
上文提過，如果大家係今日之前已經下載咗隻 APP，可能會無咗張限量送嘅 TnG x 759 阿信屋電子會員卡（據官方表示會送 20 萬張），無得好似其他人咁方便，唔洗帶卡只係用個 APP，就可以當埋會員卡用。咁可以點？根據官方表示，大家只要買夠 $300 價值嘅貨，就可以獲得呢張限量會員卡，之後按下面指示匯入番去個 APP 就 OK 了；但如果大家買唔夠 $300，但又已經本身有 759 阿信屋嘅實體會員卡，其實都可以用來當會員身份拿折扣，但就要帶多張卡去 shopping 咁解。
▲Step 01：首先購物滿 $300，大家就會獲得呢張 TnG x 759 阿信屋嘅電子會員卡，同傳統 759 阿信屋嘅會員卡係一樣 size。
▲Step 02：然後入隻 APP，點選「我的錢包」，然後點選張藍色卡。
▲Step 03：點選「加新卡」，再點按右上角有加號嘅按鍵。
▲Step 04：點選「新增 TNG 卡」，然後掃瞄剛獲得的實體卡的卡背的條碼。
▲Step 05：最後點按「新增 TNG 卡」，再按「確定」，大功告成！
▲Step 06：以後點按入「我的錢包」就會見到張 759 阿信屋電子會員卡了。
過錢俾人無難度！
TnG 除咗可以用來購物之外，仲可以過錢俾人。佢相比 Tap&Go 嘅優點，係唔洗一定要用 csl. 旗下嘅網絡商服務先用得到，而係任何網絡商嘅手機用家都用得，而且而家就已經連 iPhone 都用到，第日食完飯要過番錢俾人就容易好多。以下就教教大家點做啦。
▲Step 01：首先大家要確保你的 TnG 戶口要有足夠過俾人嘅錢啦當然！之後點按「朋友轉帳」。
▲Step 02：之後點按 TNG 戶口（收益戶口）選擇你要過數俾佢嘅朋友，如果對方都已安裝 TnG，右邊會見到間公司 logo；如果見到係「Invite」，就代表對方仲未裝，咁就用唔到了。
▲Step 03：然後輸入金額，再點按「確定」。
▲Step 04：最後會再問你一次係咪轉帳，如是再按「確定」。
▲Step 05：之後輸入交易密碼，當見到「交易成功」就代表完成轉帳！
▲Step 06：大家如果點按「查看紀錄」，就可以睇到轉帳紀錄。
▲Step 07：呢個時候，收款一方會收到有人匯錢過來嘅訊息，大家點按右下角嘅按鍵，再點按「信息箱」就會睇到。大家此時可選擇接受定係拒絕轉帳，呢個時候就梗係禁「接受」啦。
▲Step 08：搞掂！入去「查看紀錄」就可以睇到轉帳紀錄了。
TnG 知多啲全 Q&A
相信大家睇完上文，對 TnG 呢項服務可能仲有好多疑問，以下就等 Edward 為大家講解一下啦。
1. TNG？咩公司來㗎？信唔信得過㗎？
未做呢個故仔之前，筆者都一樣係未聽過 TnG 呢間公司，於是上網搵到佢哋嘅官網，原來 TnG 早於 2012 年已經在香港成立，由 SINO Dynamic 公司設計及開發（之前呢間公司已經做唔少 APP 係俾用家係手機買戲飛、買花等，所以都算有相關經驗），而據網站表示，係去年下半年已經同 924 間 7-Eleven 便利店及 259 間 759 阿信屋成功連接其網絡，亦已與 23 間銀行達成資金結算協議，似乎並非係一間藉藉無名同埋信唔過嘅公司。睇到呢度，大家可以放心少少啦，right？
2. 同 HKT 嘅 Tap&Go 有咩唔同先？
基本上 TnG 同埋 Tap&Go 兩個都係電子錢包服務，不過 Tap&Go 直到截稿呢一刻都只能夠係部分 Android 手機使用，但 TnG 就唔止 Android，就連 iPhone 都用得，而且唔似 Tap&Go 咁就算第日 iPhone 用到都要帶埋張 Tap&Go 獨立卡跟身咁麻煩，皆因 TnG 唔係用 NFC 技術，而係用 QRCode 技術，只要 QRCode 顯示到係熒幕上面，就可以增值或者俾錢，都算幾方便。
3. TnG 邊度用到先？
根據 TnG APP 入面顯示，佢暫時唔止可以係 759 阿信屋用到，仲可以透過「大胃王」APP 訂食物、透過「Gaya」APP 訂花、透過「嘉禾」APP 訂戲飛、透過「One Pass」APP 係康健醫療集團旗下嘅各種診所睇完醫生後俾錢、以及透過「Crostini」APP 訂麵包、咖啡、曲奇等包點甜品。不過筆者睇落似乎得 759 阿信屋同埋嘉禾係比較實用，唔似 Tap&Go 咁，買 Pacific Coffee 可即平 $5、或者任何接受 MasterCard PayPass 的零售店都可以用來俾錢，睇來普及程度尚需努力呢！
不過 TnG 就有一項功能係 Tap&Go 未做到嘅，就係大家可以用呢隻 APP 買電子票，然後用隻 APP 就可以入場，例如：之前係灣仔會展舉行嘅美酒展，就可以用呢隻 APP 嘅電子門票入場，都算幾方便。此外，TnG 仲可以做到繳費服務，仲要中、港兩地都支援！係香港，就可以用 APP 放電費、煤氣費、九倉電話費或者長者安居協會嘅平安鐘租用費；而係中國就可以交水費、電費、煤氣費或者電話費，呢點亦係 Tap&Go 暫時做唔到嘅地方。
4. 咦？咁我有多過一張 SIM 卡喎，放入同一部機度咪可以再拿多 $100 囉？筍喎！
Sorry，係唔得嘅！因為係登記個時，TnG 唔止會問你拿個電話號碼，仲會記低你部電話嘅 IMEI，簡單來講即係你電話嘅「身份證號碼」，當你放入另一張 SIM，又或者將同一張 SIM 放入另一部手機度，佢就會 detect 度你嘅電話號碼 / IMEI 已被登記，咁就只能增值，無咗個 $100 送。此外，據官方表示呢個優惠只會限量 20 萬個，日期就由今日去到 11 月 19 日，一旦 20 萬換哂，或者遲過 19 號，就有機會無咗個「增值 $100 送 $100 優惠」㗎啦。
總結：能否普及睇後續
老實說，TnG 相比 Tap&Go，有不限網絡商用戶同埋用途更廣泛兩大優勢，加上而家做緊增值 $100 送 $100，而且增值點亦比 Tap&Go 多（最少係 759 阿信屋買嘢個時發覺唔記得增值，係舖頭入面增值就得，唔洗去其他門市或者便利店增值咁麻煩），原則上要普及真係比 Tap&Go 容易好多。不過香港人大部分都係「著數拿咗先」嘅人，當著完拿完之後，TnG 始終係一間好新嘅公司（雖然係 2012 年已成立，但相比 HKT、csl. 等仍然算係藉藉無名……），加上仲要大家入錢落個電子錢包度，唔好話各位 wire 民，就連 Edward 自己，都仍然係覺得有啲唔太放心。所以 TnG 日後能否普及，甚至挑贏 Tap&Go 成為最受歡迎嘅電子錢包 APP，好睇後續嘅發展，當中包括：有冇其他更筍優惠？有冇更多店舖，尤其是連鎖店肯同佢哋合作，擴闊使用點？會唔會用一排突然「爆鑊」令全城用戶都人心惶惶？呢啲地方，只要 TnG 有心發展，其實唔會太難。筆者作為香港人，自然希望隻 APP 生生性性咁發展落去，快高長大啦！但呢一刻，各位 wire 民問我會唔會繼續用，我會好老實咁答大家：「盡快用完呢 $200（$100 增值 + $100 送嘅現金），之後睇下 TnG 點發展先再決定！」
▲其實 TnG 個系統似乎都仲唔算太穩定，好似放工時間就有 wire 民向我哋報料話個系統 hang 住咗係同步資料個度過唔到，筆者即刻開番隻 APP 來睇，果然有呢個問題。睇來係因為放工太多人用，搞到個 server 頂唔順……
分享到 :
最新影片
