一個月前蛋黃哥先接棒一田 IZUMI CURRY 做店長，估唔到佢並無 3分鐘熱度，仲要接管埋新都會廣場嗰間 IZUMI CURRY 添！今日我依莉詩就同 YouTuber 柏力芝再去探班，睇下呢間餐廳有咩唔同先！
比一田店坐得更舒服
葵芳呢間比起一田更大，坐位亦更舒服，不過就無咗個張可愛嘅蛋蛋凳，取而代之用咗蛋黃哥凳套，一樣咁可愛。另外，牆上、天花、枱面、餐具都一樣有佢嘅蹤影，裝修方面一 D 都唔 hea 架！不過咁，唔知係咪同時要睇兩間鋪，佢竟然懶到叫我地「自己落單啦！」丫！今時今日咁嘅服務態度點得架！
▲ 比起之前蛋黃哥點心同一田店，呢度比較大，坐得舒服好多，真係想「瞓住食！」
▲ 牆上貼滿一幅幅蛋黃哥肖像，柏力芝都忍唔住衝埋去影相啊！
▲ 唉~ 我知係紅，但唔可以咁懶架嘛！
▲ 雖然無咗張蛋蛋凳，不過蛋黃哥凳套一樣咁可愛！
▲ 枱面同餐紙都印咗廚師蛋黃哥個樣，身邊仲有好多蛋黃哥 cushion hea 喺食客坐位，望到都覺得想瞓陣！
新推超萌甜品、特飲
嚟得 Cafe 又點可以唔恨恨咁食蛋黃哥落肚。今次葵芳店除咗有一田店嘅菜式外，仲獨家推出流心芝士玉子飯、豚肉丼同班尼迪克蛋配法包，每個樣都睇到讓人哭笑不得。照顧到愛食甜嘅粉絲需要，新出嘅甜品同特飲都好 Sweetｋ架！
▲ 流心芝士玉子飯 $139
睇落有 D 似巨型玉子壽司，厚厚嘅甜蛋砌開有鹹鹹地嘅芝士流出，啖啖都好滿足，而燴牛汁非常特別，有少少蕃茄味但又唔完全係茄汁，好開胃。
▲豚肉丼 $89
呢個外表上普通咗 D ，不過味道都唔錯，每塊豚肉都浸滿燒汁，非常入味。
▲ 班尼迪克蛋配法包 $79
成個乒乓波咁嘅蛋黃哥超可愛，一啖咬落去 D 蛋汁爆晒出嚟，一個字「正」！加埋塊會致癌嘅煙肉 (好似係），就更「正正」！但可惜塊法包就有 D 遜色，所以我建議分開食。
▲熱香餅配士多啤梨 $69
熱香餅都關蛋黃哥事？差 D 唔記得熱香餅有黃嘅成份添！雖然淋滿咗士多啤梨果醬，不過就厭少咗 D 忌廉咁，好似無乜睇頭。
▲ 雜果果凍 $39
呢個好似有 D 熟口面，同蛋黃哥點心個間差唔多，一樣咁震騰騰！
▲ 芝士餅 $39
呢個加蛋黃哥個樣落去有 D 怪，非常非常怪！
▲ 布丁
雖然張米紙黐得唔靚，不過跟餐加 $18 就有得食，算係咁啦！
▲ 炸雞便當 $139
呢個係未正式推出嘅秘密 menu，單係睇到便當盒上嘅蛋黃哥 hea 爆表面已經值回票價，而且入面 D 魚餅好好食。
▲ 朱古力/雲呢拿布丁 (未定價)
又一個秘密 menu ，上面朱古力造嘅蛋黃哥喺布丁上係咁動 L，好梳乎咁！
▲朱古力/士多啤梨/芒果/蜜瓜特飲 $55
芒果特飲上面嘅雪糕好快溶，相機食先就要快手啦！而我就覺得朱古力最好味啦，不過唔知點解，我地試蜜瓜特飲會飲到香蕉味。
Pop-up Store 唔算大
餐廳旁邊間蛋黃哥精品店無一田店嗰間咁大，蛋黃哥精品亦少好多，蛋迷可能會有 D 失望。不過我地發現到夏威夷版蛋黃哥，著住草裙超萌啊！
▲ 蛋黃哥精品一眼睇晒，買得好似唔係好夠喉。
依莉詩後感
呢間已經係香港第 3間以蛋黃哥就主題嘅餐廳，唔係蛋迷可能覺得已經太濫。不過呢間係 3間入面坐得最舒服，坐又多，我諗之前怕排隊而未去過嘅朋友可以去下。食物方面，我覺得最有心思嘅係未推出嘅布丁，朱古力造嘅蛋黃哥喺布丁上係咁動 L，好抵死！至於味道同份量都係嗰句「一般啦！」
新都會 gudetama café by IZUMI CURRY
地址：葵芳興芳路223號新都會廣場1樓109號舖
營業時間：11am – 10:30pm
查詢：3104 0451
相關影片﹕
