LG 代工嘅 Nexus 5X 就已經係香港開售，令大家都好期待 Huawei 代工嘅 Nexus 6P 嘅來臨，今日籮文黎到東京窺探一下 6P 嘅真面目，想睇就睇下面啦。
全金屬機身 硬淨一體化
今次兩部 Nexus 同上代一樣，都係採用一體化機身，而當中 Nexus 6P 更加採用全鋁金屬機身，揸上手感覺硬淨。早前就有條片話 6P 用手一拗就爛，籮文梗係唔執輸去拗下啦，我用到拗斷鉛筆嘅力去拗，都未見有咩問題例如拗彎或機殼分離出現，再大力啲就唔知啦！6P 有三色可選，分別為黑、白、銀。雖然 Nexus 6P 採用 5.7 吋 2K 屏幕，但係窄邊框設計令機身闊度比一般 5.5 吋手機更窄，手感理應不錯，但係就要留意有少少跣手問題。
▲窄邊框設計令機身闊度比一般 5.5 吋手機更窄
▲全鋁金屬機身，揸上手感覺硬淨
▲機頂邊位有斜切，光映投射更有貴氣
▲細節都一絲不苟，開關制可以見到有立體紋路，唔用眼都可以分到 開關 同 音量制。
▲SIM 卡槽位於機身左側，無得插 microSD 卡。
大勢所趨 USB Type-C 插槽
無論係 Nexus 5X 定 6P，都係用咗今年最興嘅 USB Type-C 插槽，正手反手都插得入，另外亦都支援 Quick Charge 功能，只需充電 10 分鐘就可以使用 7 小時。此外，Nexus 6P 唔只有 3450mAh 超大電量，內建全新嘅 Sensor Hub 處理器，負責運用多個感應器偵測不同行為，並將感應器運算工作由主處理器分割出黎，大大節省電力。
▲今年最興嘅 USB Type-C 插槽，正手反手都插得入
2K 屏幕 ＋ 前置雙聲道喇叭
旗艦級嘅 Nexus 6P 採用 5.7 吋 AMOLED 熒幕，解像度有 2,560 x 1,440，色彩非常充實，但係亮度就算調到最光都未係好光，烈日當空底下使用就有可能會有阻礙。相信 6P 能滿足大家嘅影音享受，除咗大屏幕，喇叭亦都係做得好好，首先係籮文最鍾意嘅前置式設計，睇片時聲音兜口兜面向你發出，Stereo 更加令享受升級，聲音更有立體感。籮文將音量開到最大，夠大聲之餘，喇叭亦完全好清唔會拆，影音享受一流。
▲5.7 吋 AMOLED 熒幕，解像度有 2,560 x 1,440，色彩非常充實
▲籮文將音量開到最大，夠大聲之餘，喇叭亦完全好清唔會拆，影音享受一流。
指紋解鎖超快登記超容易
同 5X 一樣，6P 同樣有 Nexus Imprint 指紋辨識器，手指一按即解鎖。登記指紋同 5X 一模一樣，只係手指按 6 至 7 次就登記完成，解鎖上亦好快而且好準確，10次有9次都係一按就解到鎖。
▲登記指紋同 5X 一模一樣，只係手指按 6 至 7 次就登記完成，解鎖上亦好快而且好準確，10次有9次都係一按就解到鎖
相機特別設計低光環境下表現佳
Nexus 5X 及 6P 均採用了 1,230 萬像素鏡頭，像素未算係好高，但原來最突出並唔係像素數量，而係每一個像素嘅體積都達到 1.55 µm，相比其他手機，甚至 iPhone 6s Plus 只有 1.22 µm 都要大得多！像素面積大，進行低光攝影個時可以吸更多光，令大家較暗環境都可以影到清晰相片，如果大家認識 HTC Ultra Pixel 的技術，其實原理差唔多。此外，5X 同 6P 都有雷射對焦功能，對焦速度當然快唔少，雖然 6P 就冇 OIS 光學防震功能，但依部機整體影相功能確實係非常唔錯。
▲光與影嘅對比完全真實地反映出黎，可見1.55 µm 像素令對態範圍擴大
籮文：「比想像中更靚仔」
比想像中更靚仔，唔係講緊我自己呀。Nexus 6P 一亮相嘅時候就俾人話樣衰，當籮文見到實機就覺得，原來唔係咁樣衰架喎，鏡頭位突出嘅程度亦唔算嚴重，金屬機身亦好有型。講到功能上，相機功能同 5X 一樣，的確令人眼前一亮，光暗對比表現上尤其突出，1.55 µm 像素嘅幫助原來可以咁大，所以大家都係唔好盲目追求高像素，要追埋大像素。
