係啱啱過去嘅聖誕節已經係美國上映嘅《震盪真相》，以 2009年《GQ》雜誌所發表文章《Game Brain》作為藍本，真人真事所改編而成。男主角更由非常為人熟識嘅 Will Smith 主演，佢仲成功因此獲得金球獎男主角的提名。香港嚟緊將會係月底正式上映，睇咗優先場嘅小編就即刻同你分享一吓到底值唔值入場睇。
故事發人深省 可看性極高
故事講述男主角班尼特奧馬盧係一位法醫病理學家，佢發現咗美式足球員因頭部長期受到反覆撞擊，因而引發嘅腦創傷後遺症 – 慢性創傷性腦病 （簡稱 CTE），呢個病接連令幾位球員自殺，班尼特決定公開研究成果警醒公眾。但因為觸及到足球界利益，令班尼特遭受美國足球聯盟（NFL）同廣大球迷阻撓，更威脅到自身同妻兒安危。
故事本身就非常值得反思：面對不公義，而對手竟然係大企業 NFL，涉及嘅仲係整個美式足球界，就連政府都出手制止時，有幾多個人願意不懼強權堅持真相？男主角就係當中少數之一。可能有人會話因為佢嘅身份係由尼日利亞移民美國，根本唔算美國人，先可以咁客觀去睇美式足球所引起嘅 CTE ；但小編覺得更大程度上係因為佢對「科學求真」個份精神，以及醫生唔可以「見死不救」嘅使命感。《震盪真相》呢個故事夠晒可看性，而且睇完真係會唔敢再去玩美式足球啊，只係諗起 CTE 就覺得可怕！
拍攝稍有進步空間
故事雖可看性高，但當搬上電影螢幕時就出現兩大問題，搞到成套戲感覺中規中矩，而其中之一就係拍攝手法。今次《震盪真相》雖整體上無大問題，但小編稍嫌有啲老套。尤其係一開場同結尾都選擇咗記錄片片段形式，係唔少同類勵志片常用手法，觀眾其實都睇到厭。而小編覺得最老套嘅，就係最後男主角演講個段。鏡頭不斷帶過其他配角如自殺球員家屬感動落淚一幕，嘗試令畫面「更滿」同更煽情，小編更係睇到翻晒白眼；因為今次 Will Smith 嘅演技進步得足夠獨撐起整個畫面，所以實在係有點可惜。
感情線顯多餘 編劇扣分不少
拍攝手法可能對於觀眾觀感影響不大，但令今次成套戲失色嘅元兇其實係編劇。搬上電影卻仍然以過於平鋪直敘嘅方式去講故仔，而且前半部分情節走得比較慢之餘又對塑造角色形象無太大幫助，真係會有啲想訓；不過其後當主角決定公開真相而被球迷同足聯嘅人威脅，突然用緊張音樂做轉折，之後嘅情節走勢就有開始好轉。不過最後結局出現有點突然，見得到編劇係鋪排上有點弱，令成個故仔大打折扣。整套戲無認真刻畫高潮位如班尼特與足聯之間嘅衝突，睇上去實在過於平淡。
而更令人可惜嘅係，電影中嘅感情線對於成套戲影響可以話少之有少。然而，卻佔咗唔少畫面。刪去男主角妻子呢個角色嘅部分相信對成套《震盪真相》可能會較好添（當然，亦可選擇賦予呢條感情線更多意義）。
Will Smith 演技大突破
雖然係拍攝同編劇上有點力有不逮，但正所謂「一白遮三醜」，雖然敘事同拍出嚟效果麻麻，但勝在有 Will Smith 精湛演技搭救。小編必須要利申，一直都唔係覺得 Will Smith 好好戲，甚至覺得佢以前都係靠戲種唔需要強勁演技先不至被人挑剔得太誇。但今次飾演嘅班尼特奧馬盧醫生，角色同時係一位天主教徒，性格和藹但又同現實嘅人有種距離感，所以係拿捏上絕對唔容易。而 Will Smith 卻仍然成功演活角色，可以話係電影生涯中表演最出色嘅一套。
總結：電影不夠張力 任 Will Smith 再精彩也難搭救
小編掙扎咗好耐應該點評價《震盪真相》：講故事吸引度同睇 Will Smith 難得一次好戲，確實幾值得去睇；但可惜嘅係編劇同拍攝團隊都唔爭氣，糟蹋咗呢個好題材，令成套戲過於平淡。最後，小編得出一個結論：如果你係 Will Smith 迷，請你入場睇吓今次 Will Smith 係演技上嘅突破；至於對故事有興趣嘅讀者，相信睇文章會比電影更有趣，因為小編離場時聽到唔少觀眾都大喊「點解套戲會搞到個故仔咁悶」，自己都心同感受。
評分： 6/10
分享到 :
最新影片
