AVID 旗下的 Pro Tools 是最普遍使用嘅錄音室軟件，業界嘅音樂製作當中，多個程序如：錄音、混音，甚至作曲編曲都會用上 Pro Tools。但 Pro Tools 嘅費用一啲都唔大眾化，而且用家電腦仲要插住一隻叫 iLok 嘅 USB Key 黎做授權先可以使用到，所以個人用家就比較少用依個軟件。但 2015 年中，AVID 推出 Pro Tools 12，同時仲出埋一個免費版叫 Pro Tools First，讓新手可以小試牛刀！想知 Pro Tools First 係點玩？繼續閱讀以下文章！
Pro Tools！業界最常用的錄音室軟件
Pro Tools 係 AVID 旗下一個音樂製作軟件，不論錄音、混音，甚至作曲編曲都可能用上 Pro Tools，籮文粗略估計，香港八成以上嘅專業錄音室都係用 Pro Tools 運作， 如果你有 Follow 一啲歌手或者音樂人，平時碌吓 Facebook 或者 Instagram 可以都會見到 Pro Tools 嘅蹤影，不論係方大同、張敬軒，甚至 Justin Bieber，或者早前 Unwire 同事艾域訪問過嘅雷頌德都係用 Pro Tools 架。
▲早前 Unwire 同事艾域訪問過嘅雷頌德都係用 Pro Tools。
▲仲有方大同。
▲張敬軒都用 Pro Tools 錄音架。
▲就連我哋「由細聽到佢大」嘅 Justin Bieber 都係用 Pro Tools。
收費版 Pro Tools 月費大約 200 蚊
如果要用收費版 Pro Tools，用家可以選擇直接購買又或者俾月費，直接買 Pro Tools 嘅話價錢係 $599 美元，即是大約 $4,700 蚊港幣，如果係訂閱嘅話，月費就每月 $24.92 美元，即是大約大約 $200 蚊港幣，但訂閱月費計劃嘅話仲要另購一隻 $49.95 美金（即 $387 港元）用作授權嘅 iLOK USB Key 先可以使用。如果你係學生嘅話，都有學生優惠嘅：永久版 $299 美元（大約 $2,300 港元）、月費版每月$9.99 美元（即大約 $70 港元）。所以收費版 Pro Tools 對於業餘性質，又唔係學生嘅個人用家真係好大負擔。好彩有免費版！
開始 Pro Tools 的第一步
想玩免費版只要上 AVID 嘅官網，登記好 AVID 帳號及 iLOK 帳號就可以下載。如果你部電腦接駁咗 Audio Interface 嘅話記得要先到 Setup > Hardware… ，然後喺 Pro Tools Aggregate I/O 入面剔返你用緊嘅 Input/Output 裝置，就好似籮文咁，剔返部 Focusrite Scarlett 2i2。
▲想玩免費版只要上 AVID 嘅官網，登記好 AVID 帳號及 iLOK 帳號就可以下載。
▲正在開啓 Pro Tools First。
▲ Pro Tools First 因為係免費版，為咗方便初學者，有不同音樂類型嘅範本以供使用，如果想由零開始的話可以唔剔“Create From Template”。
▲如果你部電腦接駁咗 Audio Interface 嘅話記得要先到 Setup > Hardware… ，
▲然後喺 Pro Tools Aggregate I/O 入面剔返你用緊嘅 Input/Output 裝置，就好似籮文咁，剔返部 Focusrite Scarlett 2i2。
Pro Tools First 介面同收費版大同小異
Pro Tools First 介面同收費版大同小異，主要分兩個視窗：Edit 及 Mix，顧名思義前者係專用作編輯音效，如剪接、操控播放及錄音；而後者就用作混音。好多專業的錄音室電腦都會接駁兩個顯示屏，令錄音工程師可以編輯同時監察混音情況。（可以碌返上去睇，Mark Lui 個錄音室就係咁嘅設定）
▲「Edit」視窗，用作編輯音效，如剪接、操控播放及錄音。
▲「Mix」視窗，故名思義用作混音。
▲好多錄音室電腦都會接駁兩個顯示屏，令錄音師可以編輯的同時監察混音情況，籮文雖然唔係專業，但有多個 Mon 的確方便好多！
Edit 視窗左上角可以見到四個編輯模式，最常用都係「Slip」同 「Shuffle」，分別可以任意搬移聲音同搬移時貼齊每段聲音，用家可以用鍵盤上的「～」鍵切換模式。編輯模式旁邊就係編輯工具，最重要就係中間三個：「Trim tool」（修剪）、「Selector」（選擇聲音）、「Crabber tool」（搬移），留意吓，三個按鈕被一個框框圍住，㩒落去就可以用「Smart tool」，同時混合使用以上三個工具。
而下面就係音軌，每一條音軌嘅名稱下面都有四個按鈕，由左至右分別為：錄音預備、輸入監聽、Solo 及靜音。另外較右位置可以見到 I/O 欄，I/O 是 Input/Output 的簡稱，喺依度用家可以設定每一條音軌嘅輸入同輸出裝置、音量及左右 Panning。
玩得 Pro Tools，當然要講講點樣錄音，只要設定好每一條音軌嘅輸入同輸出裝置，然後將其中一條音軌嘅「錄音預備」啟動，再按鍵盤上的 F12 就可以開始錄音，按 Spacebar 就可以停止或者播放。錄完音，當然要進入編輯嘅程序，如果啲波幅太細，你想睇清楚啲可以按鍵盤 R 及 T 去縮放畫面。其中一個 Pro Tools 最好用嘅功能就係 Crossfade，使用 Smart Tool 時，只要於兩個聲音之間拉動，就可以拉出 Crossfade，在聲音的頭尾拉動則可以做出 Fade in / Fade Out。 而如果想在聲音中間切一刀，可以按 Ctrl + E ( Mac : Cmd + E )。
▲除咗按鍵盤 R 及 T 可以拉闊畫面，按播放區最頭的「間尺」，可以選擇每條音軌的高度，讓你睇得更清楚
▲其中一個 Pro Tools 最好用嘅功能就係 Crossfade，使用 Smart Tool 時，只要於兩個聲音之間拉動，就可以拉出 Crossfade，在聲音的頭尾拉動則可以做出 Fade in / Fade Out。 而如果想在聲音中間切一刀，可以按 Ctrl + E ( Mac : Cmd + E )。
籮文：「免費版功能尚算齊全 但冇得用第三方 Plug-In 係最大弱點」
短短一篇文又點教得晒成個 Pro Tools First 嘅玩法呢，反正都係免費，各位 Wire 民不妨 Download 落黎自己再探索一下呀！不過叫得做免費版，功能當然係有限制，收費版可以匯入影片、可以匯出 MP3 檔、可以用第三方 Plug-in， 但係 First 就通通都唔得，而最綁手綁腳嘅一個限制就係用家喺 Pro Tools First 做嘅專案全部都要於 AVID 雲端存取，而最多只能同時儲存三個。雖然有以上限制，但係籮文覺得依個免費版都已經好夠一般業餘音樂愛好者使用，用住內建 Plug-in 先啦！
分享到 :
最新影片
