籮文:「全由一塊物料摺出來」超科幻 Solid Gray 背囊評測

讚好此文:

二月 3, 2016 •Gashion

天恩前排上網買咗起晒角嘅硬殼背囊返黎,籮文見個款咁型,梗係要試下啦!Solid Gray,荷蘭設計師操刀,荷蘭本土製造,除咗外型獨特,仲以環保為大前提,使用可回收再造的單層工業用聚丙烯(PP)摺成一個背囊,超有科幻感。想知有幾型,就要閱讀以下文章啦!

solidgray

 

官網訂購・等送貨・開箱!

唔好以為 Solid Gray 叫做 Gray 就淨係得灰色,其實仲有黑色同白色,天恩就覺得白色難襯,黑色又有個鐵喺中間,感覺太粗爌,所以就訂咗灰色。而且灰色唯一可以見到 (Wireframe) 線條 (做 3D 的人應該明我講咩) !除咗個袋身可以揀顏色,袋帶都有5種顏色揀。上官網買 Solid Gray,計埋四百幾蚊運費,灰色同白色就要 HK$1,865,黑色就再貴啲,俾咗錢大概都要等返 3 個星期左右先送到黎香港。送到黎,用家要自行將揹帶扣上袋身,而扣位非常隱閉,籮文都研究咗一陣先至扣到。

Screen Shot 2016-02-03 at 8.13.14 PM

Screen Shot 2016-02-03 at 8.15.06 PM

▲唔好以為 Solid Gray 叫做 Gray 就淨係得灰色,其實仲有黑色同白色,除咗個袋身可以揀顏色,袋帶都有5種顏色揀。

SolidGray04

▲唔講咁多,開箱先!

SolidGray05

▲隨箱附送一個防塵袋

SolidGray07

▲再開袋,先至見到個背囊,還貼著一些防花的保護貼

 

可更換不同顏色揹帶

籮文都提過官網有不同顏色的揹帶,其實佢有一個彈弓扣的設計,可以將唔同顏色的揹帶扣上,甚實左右兩種不同顏色都可以。

SolidGray45 SolidGray46

▲送到黎,用家要自行將揹帶扣上袋身,而扣位非常隱閉,籮文都研究咗一陣先至扣到。

有林寶堅尼 Feel 不過 遠睇誇啦啦 近睇…

對於汽車愛好者籮文,Solid Gray 俾我第一個印象就係好有林寶堅尼 Feel。依個「盔甲」由設計到生產都係於荷蘭進行,每個 Solid Gray 背囊都以單獨一塊單層聚丙烯切割再摺疊而成,籮文做過 Research,單層聚丙烯(簡稱PP)係一種高密度、耐潮濕、耐腐蝕、耐蟲蛀的一種塑料。

咪以為背囊上嘅白色線係印刷出黎,其實係摺痕黎架。見個外型三尖八角,唔好以為得個樣,其實佢嘅形狀都係經過計算,以達到最堅固嘅形態。不過講真,籮文就真係覺得感覺上無視覺上咁硬淨,物料有d似試前d 膠造的「考試盒」一樣,唔似 Rimowa Limbo 果d 硬度,不過勝在輕。

20786959_source

▲對於汽車愛好者籮文,Solid Gray 俾我第一個印象就係好有林寶堅尼 Feel。

SolidGray11

▲每個 Solid Gray 背囊都以單獨一塊單層聚丙烯切割再摺疊而成,咪以為背囊上嘅白色線係印刷出黎,其實係摺痕黎架

SolidGray48-e1454501205558

▲籮文就摸過實物就無視覺上咁硬淨,物料有d似試前d 膠造的「考試盒」一樣,唔似 Rimowa Limbo 果d 硬度,不過勝在輕。

個款就夠晒型,實用性又如何?

Solid Gray 用上可以百分之百回收再造的單層聚丙烯材質,官方表示有效減輕背包重量同時可以保持強韌耐用,背囊頂有手挽,籮文拎過上手,重量其實同其他背囊相差不多。只要將袋面接近頂部的兩塊機關向上撥就可以打開背囊,打開之後,你會發現佢相對上比較似一個硬殼迷你喼多過一個「背包」。

唔似傳統背囊,打開咗 Solid Gray 就一目了然,裝咗啲乜 一眼睇晒,大頭蝦搵嘢就唔使反轉個袋先搵到。背位有一條 Y 字型束帶,最大可以裝到 15.6 吋嘅筆記型電腦,如果你部筆電細過15.6吋都唔怕佢會跣黎跣去,因為背囊裡面底部有塊海綿,就算籮文放部 MacBook 入去都可以穩定到。入面仲有幾個暗格俾放比較細件嘅「蠟雜嘢」,包保背囊入面井井有條。

SolidGray26

SolidGray24

▲背囊頂拉出來手挽位SolidGrayB31

▲拉開來就可以用

SolidGrayB06

▲背囊重量為 976 克,同大部份傳統背包比較,其實只係重10% – 20%。不過講真,個款咁型,又有邊個會介意重一兩成?

SolidGray17

▲只要將袋面接近頂部的兩塊機關向上撥就可以打開背囊

SolidGray19

▲非常 Cyber 嘅打開方式,就好似太空船打開駕駛倉一樣。

SolidGrayB17

SolidGrayB34

▲背位有一條 Y 字型束帶,最大可以裝到 15.6 吋嘅筆記型電腦,如果你部筆電細過15.6吋都唔怕佢會跣黎跣去,因為背囊裡面底部有塊海綿,就算籮文放部 MacBook  入去都可以穩定到。

SolidGray33

▲另外有多個收納空間,袋蓋的內面可以夾住一啲報紙或雜誌等

SolidGrayB25

SolidGray37

▲背蓋與袋身之間又有兩個收納空間,適合放鎖匙、耳機等小物品

三尖八角 舒適度又係點呢?

一直都係 Show 個外型俾大家睇,三尖八角,係咪好想知揹上背係咩感覺呢!Solid Gray 嘅背板就係一塊平板,可能你望落會覺得好唔舒服,但揹上背先發覺 Solid Gray 背板硬淨得黎都有一定嘅彈性,比想像中舒服,不過用得耐真係都會熱,夏天日子唔太適合長時間用。但硬殻都有啲壞處嘅,籮文依啲粗人,平時放嘢入袋就咁掟入去就算,但係用 Solid Gray 就要輕輕力放入去,亦都要小心尖角位割親手。背包低有兩粒「膠腳」,方便你「挨」係牆,但都要小心放驚刮花。

 

 

SolidGray41

▲Solid Gray 嘅背板係一塊平板,不過有彈性,舒適度還可

SolidGray12

SolidGrayB32

▲低部兩粒「膠」方便放牆邊時不會跣低。

籮文:「堅係型 但實用度就一般」

外表就非常突出,不過實用度就真係一般般,始終傳統背囊儲物量比較有彈性,只要放晒啲嘢入去,夾硬拉到條拉鏈就 OK,但係 Solid Gray 礙於形狀同材質所限,入得晒就入得晒,入唔到就 bye-bye。而且經過籮文觀察,依種質料都係比較容易割花。建議真係日常返工返學輕用才合適,旅行或長使間使用就唔太好,一來膠貼背有點熱,二來搭車會頂住背部唔可以「挨」落牆。如果要以實用性去評分,Solid Gray 應該唔合格,但係佢外型已經深深吸引到籮文,實用性已經被我拋諸腦後,夠型未得囉!

售價:約HK$1,865 (未連運費)

SolidGrayB28

 • 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

Tags:

讚好此文:


Comments are closed.

unwire TV



更多同類文章:

最新文章