香港創業風氣愈吹愈烈，年青人一畢業就話要自組公司，開創一番事業。其實創業嘅風險好高，困難亦比想像中多，仲有人話創業係「九十九死一生」。不過，原來有一 D 爭端係可以透過法律文書避免。今次我哋搵嚟經常幫助 Start-up 處理法律文書事務嘅科技平台 DragonLaw 聯合創辦人黎曉洋（Ryanne），俾各位創業新手幾個實用法律建議，幫吓大家解決問題。
DragonLaw 其中三名創辦人都係律師出身，佢哋製作咗一個網上平台去簡化「搵律師做文書」嘅程序，提升效率之餘仲可以降低成本添 ！除咗服務中小企，DragonLaw 亦都會協助 Start-ups，希望可以幫佢哋節省處理行政工作上面嘅時間及金錢，集中火力應付創業路上遇到嘅其他問題。綜合佢哋嘅經驗，一般 Start-up 經常都會遇到而以下呢幾個麻煩：
DragonLaw 創辦人之一黎曉洋（Ryanne）。
1．股東協議
十大創業失敗原因之一：創辦人之間傾唔掂數，最後攪到分手收場。Ryanne 表示，其實只要喺建立公司嘅時候，同時製作一份「股東協議」，清楚羅列各個股東喺法律下嘅權責範圍、股權轉讓條款、有邊啲商業決定必須得到一定數量嘅控股權才能通過等等細則，就可以保障到自己同埋公司嘅利益，「到咗要搞到打官司嘅時候，就已經太遲喇！」
2．僱傭合約及解僱信
好多 Start-up 一開始只由幾個創辦人組成，之後可能因為有新投資者、又或者係生意上咗軌道、開始擴充等唔同原因，慢慢會愈請愈多人。「人多問題自然就會嚟。」Ryanne 帶點語重心長咁話。招聘同埋解僱員工果陣有很多細節要留意，如果員工喺工作上做出任何損害公司利益嘅行為，例如有員工因誠信問題而要提出解僱，點樣草擬具有法律效力嘅解僱信呢？同事之間出現歧視或欺凌，佢哋要控告公司政策對員工缺乏保障嘅話，原來一份完善嘅員工工作守則就可以避免公司捲入呢類麻煩。僱傭合約同解僱信都係喺法律上具有約束力，如果細節同條款寫得清清楚楚，咁就可以避免公司惹上官非喇。
3．投資者協議
Start-up 好多時都希望得到投資者嘅青睞，甚至渴望會被收購。獲得注資當然係一個重要嘅里程碑，到時候相關法律文件嘅數量一定會好多而且仲更加仔細，因為任何一點都分分鐘會影響公司日後嘅擁有權/話事權。喺草擬同檢視呢類文件嘅時候，就一定要非常小心，例如要睇清楚投資者對回報嘅要求，例如屬於借款嘅話，喺怎樣的情況下，呢Ｄ款項會自動轉換成股份？正所謂「魔鬼藏於細節」，如果唔熟悉呢方面，就最好搵專業人士幫手喇。
DragonLaw 係數碼港培育計劃嘅成員之一，而家會向數碼港嘅 Start-up 提供「Legal Health Check」服務，亦會針對 Start-up 嘅唔同發展階段，喺網上平台為佢哋提供好多唔同嘅法律文件範本，方便創業者使用。上述幾種法律文件係新手創業家最經常接觸，Ryanne 話佢哋亦有向其他中小企提供多方面法律文書服務，用家可以喺 DragonLaw 網上平台上自行選用合適嘅服務使用。
分享到 :
最新影片
