數碼講呢 D:FinTech 喺香港有冇得做呢?

讚好此文:

三月 24, 2016 •Tech+, 生活科技

「香港真係好有條件搞 FinTech!」呢 D 咁有見地嘅講法,當然唔會淨係小編呢 D 小薯仔講啦,其實香港有好多財金界同科技界猛人都咁講,仲包括財爺曾俊華添。之但係亦有好多人話,香港現時嘅法例,未必能配合創新嘅想法。

Hong Kong at evening

即係咁,小編覺得一個地方搞唔搞得起 FinTech,唔單係講法規嘅。如果一個地方本身無條件,就算法例完全配合 FinTech 都無用!市場係咪 Ready 都好緊要。

不過「有無條件」好多時都係取決於觀點與角度,你以為非洲好落後?但原來麥肯錫 (McKinsey & Company) 估計到咗 2025 年網路產業對非洲經濟嘅貢獻將會達到 $3,000 億美元,到時非洲流動金融市場規模仲可能達到 190 億美元添! FinTech 又好、其他科技都好,一種科技產業能夠快速增長,原因來來去去都係得以下幾個。

社會落後,得!

ft2_02

其中一個原因就係「落後」。中國自從改革開放,成個銀行金融體系都未夠成熟,今時今日美國同香港玩咗好耐嘅金融產品,對中國可能仲係新概念,例如證券業就係 90 年代興盛嘅產業喇。

事實上,因為中國本身喺金融同證券方面嘅法例唔及香港成熟,先會有咁多空間發展 FinTech 公司。但問題係銀行體系無咁嘅服務,唔代表人民無需求,於是民間先會出現支付寶、微借貸、眾籌融資等等產品出現。

我哋成日講「八達通同 EPS 咁方便,使鬼用 XXX 咩」,都係咁嘅原因。就係因為現有嘅嘢已經滿足到大部份人嘅需求,無好大嘅誘因去推出新產品取代舊產品。

市場成熟,亦得!

ft2_

另一個成長原因就係市場已經成熟。第一同第二個原因有衝突?係呀!你聽埋我講先。

你試諗吓,如果你係一間 Startup ,你整咗一件超級無敵嘅 FinTech 產品出嚟,但之後先發現原來你個國家無人識貨,咁都係嘥氣。有個寓言係兩個商人去非洲賣鞋(又非洲?!),見到人人唔著鞋之後,一個就絕望,一個就覺得大有市場。

其實你要教育一班從來都唔著鞋嘅土人接受新文化,係需要花好多時間嘅。如果一個市場本身已經成熟就會水到渠成,即係本來人人都著草鞋,你介紹佢著波鞋就容易得多。換言之,一件 FinTech 產品如果要向金融機構推銷,最低限度都要人哋覺得「有用喎!」先得,所以時機都好緊要。

資金充裕,得左!

ft2_04

仲有一個成長原因就梗係要「有錢」。

如果有好多資金願意支援某一種科技發展,背後代表呢種科技真係有呢個市場需求。其實香港真係有好多創業基金或者支援計劃,係專為支援金融科技而設計嘅,識得搵而你又真係做到,絕對有得做。

邊度搵?數碼港就係其中一個啦,講呢 D?數碼港早前就講明會大力加強金融科技初創企業嘅支援,包括提供 3,000 平方米共用工作空間,以及係未來 5 年培育 150 間金融科技初創企業。

除咗咁,仲有「數碼港‧大學合作夥伴計劃」,俾大學生到海外知名大學進行一星期嘅創業培訓營,也到訪美國矽谷多個在創業界廣為人知嘅加速器。俾這些大學生擴闊眼界之餘、又可向前輩學習取經。

除咗以上嘅數碼港計劃之外,巿場其實仲有好多形形式式嘅針對 FinTech 嘅創業支援計劃,例如 Blueprint、SuperCharger 同星展創投計劃咁,大家有興趣可以留意下!

• 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

Tags: , ,

讚好此文:


Comments are closed.

相關文章:



更多同類文章:

最新文章