唔知大家仲記唔記得 2012 年嘅《白雪公主之魔幻復仇記》(Snow White and the Huntsman) 呢?相隔接近四年,續集《獵神:魔雪叛變》終於都正式係 4 月 7 日星期四香港上映咗。上集雖評價麻麻但票房仍然收得唔錯,而嚟到今次《獵神:魔雪叛變》,唔知又可唔可以 keep 住呢個勢呢?
與上集關連不大 更似番外篇或前傳
首先要講嘅就係,雖然叫做續集,但其實今次《獵神:魔雪叛變》更似係前傳或者番外篇,由《白雪公主之魔幻復仇記》嘅故仔延伸開來。今次講述冰雪女皇 Freya 慘遭情人背叛,佢將自己變得殘酷冷血,將北方變做佢嘅王國,並將所有小朋友捉晒返嚟訓練佢地成為獵人,而佢地亦需要遵守唯一一條法律 – 不得愛人。然而, Freya 嘅左右手 Eric 同 Sara 情不自禁相愛,結果狠心拆散佢地。 Freya 亦都為咗得列更強大嘅魔力,從魔鏡中釋放出她早以為死了的姐姐 Ravenna,邪惡兩姐妹集結成非常強大嘅黑暗力量,只有被放逐嘅獵人有能力阻止佢地….
雖然係續集,但同上集嘅故事線並無太大交接,而且無論演員定角色都換晒,除咗 Ravenna 同 Eric 之外,所以未入場嘅觀眾亦唔需要擔心會跟唔上電影講乜。
主角落在冰雪女皇Freya 人設極似 Elsa
上次主角就落咗係 Snow White 身上,而今次當然就係落係魔后 Ravenna 個妹妹 Freya 身上啦!小編未入場睇之前,已經係海報同預告見到 Freya ,都忍唔住大喊「咁似真人版 Elsa 嘅!」(我個時仲以為上演 Frozen 真人版)而睇完電影後,更加覺得 Freya 本身個人設更似 Elsa 。除咗 Freya 變咗做邪惡嘅冰雪女皇而 Elsa當然無變之外,佢地所擁有嘅能力﹑封閉自己嘅心靈,以至整個形象造型都十分似根據 Elsa 去改造而成。
無驚喜無懸念 故仔元素老套兼易估
《獵神:魔雪叛變》嘅毛病其實都係繼續返上集嘅弊病:成個故事線都係無驚喜無懸念,即使未睇完前半部分都已經可以猜出之後半部嘅走向,甚至結局。故仔亦係用平鋪直敘嘅方式去講:係開頭先用旁白帶過一啲前設,然後再揭開 Freya 點解變邪惡,再到拆散 Eric 同 Sara 同搶走魔鏡,最後 Eric 同 Sara 就去灑狗血咁打鬥戰勝兩姐妹。成部電影嘅元素都係老套兼易估,對於入場唔想用腦只係想好好享受 CG 同睇大卡司嘅觀眾的確係件好事,但就對於其他觀眾可能太過平淡同沉悶啦。
總結:「不過不失嘅娛樂電影」
雖然整套電影無乜亮點,故仔情節亦好平淡,敘述方式亦比較淺白直接,但正所謂「多做多錯,唔做唔錯」續集《獵神:魔雪叛變》再次延續上集嘅風格亦係無可厚非的。不過作為一部娛樂電影,小編就覺得今次《獵神:魔雪叛變》算係幾交足貨,笑位連連,就連打鬥場面同 CG 都做得唔錯。對於想輕輕鬆鬆睇戲而又唔需要思考的話,呢部的確會係一個不過不失嘅選擇。
分享到 :
最新影片
![](https://cdn.unwire.hk/wp-content/uploads/2024/09/iphone16_d_web2-694x390.jpg)