相信各位 wire 民幾乎每日都會用 Google 搜尋，除咗直接輸入關鍵字進行搜尋之外，其實仲隱藏咗唔少秘技，可以令搜尋變得更有效率。學識以下呢 7 招，相信大家日後要搵圖搵片就會更快更準，唔洗 Search 完仲要搵餐死！
第一招：唔洗再查字典
唔洗左搵右搵各種網上字典，在搜尋嘅字詞前面加上「DEFINE:」，就會得出定義，對於只需要搵個字點解應該夠晒用！
第二招：指定網站搵出所有包含同一個字嘅地方
Google 搜尋引擎強大相信大家都唔會否認，有時啲網站仲會利用 Google 嘅引擎提供站內搜尋。只要喺搜尋頁，加上「site:」，就可以在指定網站找到所有提及同一個字詞嘅地方。例如：輸入「Google site:Facebook.com」，就可以提供所有在 Facebook 內提及 Google 嘅搜尋結果。
第三招：善用減號篩選結果
有啲字詞，可以牽連好多唔同意思。例如品牌 Casio，既可以指手錶，亦都可以指數碼相機甚至喺計數機。所以，如果只喺想搜尋 Casio 數碼相機，又唔想出現 G-Shock 手錶等唔想要嘅資料，就可以在「Casio」後加「-watch」，就可以剔除所有關於手錶的搜尋結果。
第四招：不要睇小 Google 新聞搜尋
平日大家可能唔會用到 Google 嚟搜尋新聞，但其實 Google 的新聞資料庫，年代久遠至 18 世紀初的新聞都有，有時如果真係要搵舊新聞就會發覺好神奇好有用！
第五招：以圖找圖
Google 除咗可以用字詞搜尋，亦可以用圖找尋相似的圖。大家打開 Google 圖片搜尋頁面後，按下相機按鈕，就可以輸入圖片嘅網址搵圖，也可以利用大家已儲存於電腦內的圖片，找出其他相似的圖片。
第六招：搜尋結果一字不漏
相信呢招唔少 wire 民都應該有用過，只要在搜尋的字詞前後分別加上開關引號，就可以只顯示與搜尋關鍵字一字不差的結果。
第七招：加個 * 搵歌名歌詞更容易
大家要搵歌嘅時候，好多時候都會打一句歌詞嚟找歌名歌詞。即使一句歌詞內有字唔記得咗都無問題，只要將唔記得咗嘅字變星號「*」，整句歌詞前後再用開關引號，就自然可以搵到相應的歌曲。
分享到 :
最新影片
