3年啦！仲記得 3年前萌爆的黃鴨係海港城暢泳的墟陷場面吧！環遊完世界，佢最近又游番嚟，不過就游過龍，去咗澳門囉！搞到我依莉詩要特登搭船去見佢一面。
黃色小鴨科學館外暢泳
今次肥嘟嘟的黃鴨停留係澳門科學館同觀音蓮花苑中間海面，附近夠晒空曠唔駛同人逼，自拍的同時仲可以影埋觀光塔。至於主角黃鴨，果然魚唔過塘唔會肥，鴨唔過海唔會大，佢比起 3年前快高長大咗唔少呢！
市集般的黃鴨遊樂園
除咗一睹黃鴨的真身，係漁人碼頭有舉辦咗個黃色小鴨遊樂園，不但有20隻 1.2米的迷你版黃色小鴨遍布澳門漁人碼頭等你影，仲有 40幾個以黃鴨做主題的攤位活動，包括小食、創意工藝品、官方紀念品 及 遊戲攤位，完全係一個週末市集、假日好去處。
▲ 20隻身高1.2米的黃色小鴨遍布澳門漁人碼頭。
▲ 每一隻都可以近距離接觸架！
▲ 40幾個攤位活動都圍繞黃鴨做主題，食嘅、買嘅都離唔開黃鴨。
▲ 如果無帶相機，又咁啱手機無電的話可以係度俾 $5 同鴨鴨相番張即影即有。
▲
▲ 印咗鴨鴨圖案的朱古力得意到唔捨得食。
▲ 連糖上面都係黃鴨。
▲ 雖然超多黃鴨的產品，不過未必隻隻都咁可愛…(或者有日會變天鵝掛)
▲ 另外有唔少攤位遊戲，而獎品當然係黃鴨啦！
▲ 拋中邊隻就係你嘅。
▲ 大熱天時見到咁多鴨係水入面暢游，自己都想跳埋落去呢！
旁邊仲有恐龍睇
睇完黃鴨真身，小朋友可以去旁邊睇恐龍，入面幾乎隻隻恐龍都識郁又識叫，好逼真架！
▲ 未入場已經有隻三角龍對係虎視眈眈 。
▲ 由三疊紀時代開始的恐龍到白堊紀晚期的恐龍都一一重現眼前。
依莉詩：「睇鴨唔駛同人逼」
唔知係文化差異定地方大咗，3年前係海港城的墟陷場面完全沒有，真係想點影都得！至於黃鴨樂園去到更似一個週末市集，有唔少黃鴨為主題的產品同遊戲，不過人流唔多，擺主亦唔會點理你，行得都幾寫意。如果特登過去睇可能要有 D 失望，不過過開大海不妨去「親吻」一下萌萌的黃鴨啊！
黃色小鴨澳門游2016
日期：2016 年 4 月 29 日至 2016 年 5 月 27 日
地點：澳門科學館與觀音蓮花苑中間海面
「黃色小鴨遊樂園」嘉年華
日期：4月29 日 ～ 5 月29日 (星期五至日)
開放時間：10:30am – 8pm
地點：澳門漁人碼頭
查詢：文化視窗發展有限公司 (853) 2870 6222
分享到 :
最新影片
