隨住大家越嚟越習慣使用各種網上服務，相信都會有各種唔同嘅帳號，方便嘅同時亦都吸引唔少黑客，會嘗試登入好似 Apple ID 呢類網上服務帳號，而為咗向用家帶來更高的安全性，現時好多服務供應商都加入所謂雙重認證，就喺除咗傳統嘅登入名稱及密碼之外，會額外加多一重認證機制，目的當然就喺可以避免有人「撞中」密碼而令用家有任何損失。
Apple全新「雙重驗證」
今次介紹 Apple 嘅「雙重驗證」，可能各位 wire 民心諗「有咗好耐喇喎！即係登入果時要收 SMS 呀嘛！真係 Old News Is So 唔識串」，大家唔好咁大反應住，因為 Apple 已經將以前用開嘅 Two-Step Verification 升級做更安全更方便嘅 Two-Factor Authentication（2FA），從此大家就唔洗再接收 SMS。新方法會將大家嘅 Apple 裝置變為「驗證碼產生器」，驗證碼更由以前 4 個位變做 6 個位，安全性大大提升。
「雙重認證」啟動教學
喺使用全新「雙重認證」之前，如果各位 wire 民用緊 Two-Step Verification 嘅話，就要先進入 Apple ID 頁面，再喺「安全」搵「雙步驟驗證」再揀「關閉雙步驟驗證」。當大家關閉咗「雙步驟驗證」或者根本冇用開嘅話，就可以透過 iOS 9或 OS X 裝置開始進行設定，以下將會以 iPhone 作為示範。
▲首先進入「設定」>「iCloud」再點選 Apple ID，系統會要求先輸入一次密碼作為確認。
▲之後選擇「密碼與保安」就可以見到「設定雙重認證」。
▲會要求大家先輸入可接收 SMS 或電話嘅電話號碼，之後再輸入接收到嘅 6 位驗證碼就完成。
新機登入即時顯示位置
每次各位 wire 民入手新 Apple 裝置，喺全新 2FA 認證之下，設定 Apple ID 嘅時候，當輸入登入名稱同密碼之後，就會喺其他已登入嘅 Apple 裝置上出現新登入裝置嘅位置，要大家確認之後，就會再出現一個 6 個位嘅驗證碼，輸入之後先會完成整個登入認證。
▲例如透過網站更新 Apple ID 嘅個人資料或加入新信用卡，當輸入完名稱同密碼之後，就會喺其他已登入嘅 Apple 裝置出現一幅地圖，當中顯示咗新登入裝置嘅位置。
▲當大家按下「允許」才會出現一個 6 位驗證碼，程序上更加安全。
▲再喺網頁或者裝置上輸入 6 位驗證碼先可以登入。
分享到 :
最新影片
