各位用緊 iPhone 或者 iPad 嘅 wire 民，買機嘅時候總會左諗右諗，除咗要諗買咩色之外，最重要就係要諗究竟買 16GB / 64GB 定 128GB 先夠用。睇返價錢嘅話，以 iPhone 6s 為例，128GB 就已經貴過 64GB 成 $800，如果揀 SE 嘅話，就算你有錢最多都係得 64GB 俾你揀，以前大家好多時都需要就住嚟用，唔敢影得太多相同埋片之餘，裝 Apps 之前仲要左度右度，有新 Game 想玩好多時就要先 Delete 咗隻舊 Game。
如果 iPhone / iPad 真係唔夠位用，除咗成日要將啲相同片 Backup 落電腦之外，現時都有唔少廠商推出可同時支援手機同電腦雙用嘅 OTG 手指。Verbatim 最近推出咗 1 款容量分別有 32GB 及 64GB 嘅蘋果 OTG 手指，其中 64GB 版本 $638 就已經有交易，至於 32GB 更只係 $438，一定比買高一個容量嘅 iPhone / iPad 慳唔少。呢隻 OTG 手指一面係對應 iOS 裝置的 Lightning 介面，另一面則是 USB 3.0，方便各位 wire 民將檔案同電腦共用，咁就唔洗再搵條 Lightning USB 線左插右插咁唔方便。
▲佢嘅體積相當細小輕巧，加埋有 2 隻可以完全配合到 iPhone 嘅原色，用起上嚟唔會覺得突兀，仲有一年保養，萬一有咩事都唔洗驚。
當大家打開 iPhone 或者 iPad，望下相簿就可能已經有 10 幾 GB 以上嘅相同片，如果要抄落電腦，就要將部機放低無得用。Verbatim 呢款 OTG 手指，當大家進行檔案抄寫嘅時候，其實仲可以繼續打機、睇片、上 Facebook 等等，抄寫動作會喺背景繼續執行。佢個抄寫速度其實算快，測試過駁落 iPhone 6s，抄寫 38 條片（共 6.7GB），都只係需要 7 分鐘左右就完成，真係睇完條 YouTube 片或者打舖機就已經攪掂。當啲相同片抄晒落隻 OTG 手指，除咗可以當係一個備份之外，亦都可以插落其他 iPhone 或者 iPad 度拎返啲檔案，又或者插落電腦個 USB 度都得，用 USB 3.0 傳輸速度就更加快，同一大小嘅片由 OTG 手指抄落電腦唔洗 2 分鐘就攪掂，真係快過淥杯麵！
▲除咗可以插 iPhone 或 iPad 用之外，都可以插入電腦當一般 USB 手指用，而且速度都好快，唔洗 2 分鐘就可以讀取 6.7GB 資料，而寫入相同容量資料則只需 5 分半鐘。
始終 Apple 嘅周邊產品限制比 Android 多，呢款 OTG 手指就有 MFi 認證，兼容及穩定性有保證，而且只要裝 V drive 呢隻專用 App，一插隻 OTG 手指落部機，就即時 Detect 到唔洗裝任何 Driver 咁麻煩。至於 App 本身亦都已經有齊基本功能，好似將部機嘅資料抄落手指，甚至可以將 iPhone 嘅聯絡人資料備份埋落去添，咁可能各位 wire 民會覺得，抄晒咁多相同片，萬一俾人執到咪大件事，咁大家又可以放心，因為 App 入面大家可以選擇先將內部儲存嘅重要或者私人資料進行加密再抄落隻手指，除咗設定密碼之外仲可以用埋指紋加密，萬一唔見咗都唔洗驚俾人睇蝕晒。如果大家抄咗相、片或者歌落去，仲可以即時喺手指入面直接睇或聽，唔洗經第三方軟件，又可以上傳去 Facebook 呢啲社交平台同朋友分享，唔洗再抄返落機先做到。
▲裝咗 V drive App 再插隻手指就會即時認到，完全唔洗任何設定，入到去仲可以清楚見到日後升級 Firmware 或者 Format隻手指嘅選擇。
▲大家可以直接用 App Check 到部機同埋手指嘅可用空間，更可以將 iPhone 嘅聯絡人資料備份落手指，換新機就更加之方便。
▲要過相或者片其實好簡單，只要好似平時咁揀晒想過落手指嘅相同埋片，再揀返 Save 去 External Storage 就攪掂，抄寫過程之中仲可以繼續用 iPhone / iPad。
▲如果抄咗好多私人相同片都唔洗擔心會俾人睇到，因為可以選擇性將內存嘅資料加密，仲支援指紋同密碼加密。
講真如果大家鐘意用 iPhone 拍片嘅話，真係就算你買 128GB 都未必夠用，如果每次都要插返條 USB 線再開 iTunes 抄落電腦做備份，好多時都未必會記得，去旅行果時就更加唔方便。Verbatim 呢隻蘋果 OTG 手指，個殼就已經襯返 iPhone 部機嘅色，開個 App 就可以即時備份，非常易用，仲可以用埋指紋加密，絕對唔洗擔心備份嘅資料會俾人偷睇。售價上嚟講亦好合理，最高仲有 64GB 可以揀，體積細小方便隨身攜帶，仲可以當埋普通 USB 手指咁用，性價比幾高。
建議售價：$638（64GB）/$438（32GB）
查詢：Verbatim（2314 1220）
