而家真係乜都要多功能架，繼上次件多功能風褸之後，又有個經眾籌而成嘅集資項目又面世喇。呢個背囊，名為都係「蒙馬特城市安全防盜背包」 Montmartre 防盜背包 ，個名都長過人，但係我哋又好想知道到底有咩特別，所以一於為各位 unwire.hk 讀者借返嚟玩下。
無論日常生活或是旅行都越來越多 Gadget 隨身，Notebook、耳機、相機、外置電池就免不了。不過在去到治安差的地方，很多趴手會開你背囊偷東西，甚至割爛它直接拿取。可能因為這個原因， 荷蘭的 XD Design 設計了一款方便整齊放置 Gadget 同又具防盜功能的背包
呢個防盜背囊，最特別就係將個拉鏈收埋去背部位置，喺正面幾乎係完全搵唔到有一個拉鏈，因此佢嘅設計就係防止啲扒手偷偷地開咗拉鏈嚟攞你啲嘢。之但係唔好睇小啲扒手，其實佢地都會用刀仔去割開一啲袋，從而偷到嘢，咁樣一來，任你收得幾密實都無用。
佢第二個功能就係防割嘅功能。背囊正面嘅物料係用上一種防割嘅材質，令到扒手就算真係要割，都需要好大力好大動作，咁就令佢難以落手喇。至於背面，因為你自己揹住嘅，所以就無用上防割嘅材質。
佢仲話係防水架，黑色嘅膠面就係完全防水嘅，而灰色部份嘅布料就係跣水嘅，問返代理，佢哋話呢個袋都頂到黑雨……一陣嘅，太大雨嘅話佢都係會慢慢滲入去，所以都係唔建議大家雨天拎去淋。
仲有就係，個袋係唔可以洗架，因為佢入面收埋咗一條 USB 線，同埋有個 USB 接位，一洗就係咁先架喇！
睇落佢好似好唔方便咁，下下要拎嘢都要打開個後袋咁咪仲易俾人有機可乘？其實佢已經幾個暗格位，方便你收埋啲常用嘅物件，例如八達通卡、信用卡、銀包同手機咁，咁就方便日常通勤嘅嘢喇。
至於背囊嘅內部，就分成咗一格格唔同嘅嘢，方便你將你嘅 Notebook、平板電腦、筆記簿等等工作上需要嘅嘢放置整齊，係拎出嚟用嘅時候又的確係幾方便嘅。而佢內部亦特設一個專為「尿袋」而設嘅充電線頭，只要將「尿袋」連接上充電線，再將你條充電線連接上佢喺背囊外面嘅 USB 接口，你就可以唔使拎住個尿袋都可以一路充電一路用電話喇。不過，筆者琴日就試過，有啲充電器要先開咗至可以通電，因此唔係款款都可以做到咁「瀟灑」一插即充，呢個位真係敗筆。
▲ 佢貼心地整咗個 USB 接口，裡面有線接駁個充電器，方便啲人個尿袋放係袋就唔使拎出嚟都可以叉電，不過佢無諗到加多個掣，有啲尿袋要開咗先叉到電嘅…
呢個袋係介紹嘅時候就講到佢耐壓同埋襟撞嘅，咁唔知道佢跌落地嘅時候，會唔會震壞我啲電子產品呢，你知啦，又 iPad 又電腦咁，一跌壞咗，咁就麻煩喇。我哋亦都實際試過，由一個人咁上下高 (小弟有 1 米 7 高) 跌落地下，入面嘅嘢都係無事嘅。不過再高啲又唔知得唔得呢。
阿 Gi ：我襯唔起佢
筆者首先問阿 Gi，佢話：「下唔好啦。」個袋嘅外型太似毒男男裝，佢襯唔起呢個袋。
依莉詩：十足十個龜背咁
筆者問咗依莉詩，佢話要揹住個龜背出街，不如留返俾我揹算喎。
我就覺得個袋其實功能上真係好夠嘅，就算撇除佢個防割嘅設計，佢嘅設計都好方便各個經常要揹住各種電子產品周圍走嘅人。加埋部份防水功能，都算得上叫做全天候嘅，不過單睇外型，就算係男仔揹我都覺得有啲毒……我諗如果佢外型靚返啲，或者會多啲貪靚嘅人買，你知啦，而家追求嘅又要靚又要多功能架嘛！提提大家，個袋無保養架，所以，小心啲用！
蒙馬特城市防盜安全背包
購買：
https://goo.gl/H7hjc6
