「年紀大，機器壞。」要留意身體健唔健康，定期量血壓好重要。襯就嚟父親節不妨考慮下送部血壓計俾爸爸。而今日介紹的 iHealth 血壓計就係小米旗下品牌米家的新出品。依家就等我依莉詩試下佢性價比係咪一樣高先！
一直以來，大部份人都覺得水銀柱血壓計的準確性比電子血壓計高，不過，水銀柱血壓計始終含有水銀，而且比較難操作，所以近年多數都鼓勵以其他不含水銀的血壓計取代水銀柱血壓計。而操作簡單的電子血壓計就成了每個屋企都有一部的必需品。不過要家中的長輩每日乖乖拎部機出嚟度，仲要用紙筆抄底數據，真係少 D 恆心都唔得。如果血壓計可以連接手機，自己紀錄數據就更好了。
兩鍵直覺操作，分開記錄父母數據
今次呢部 iHealth 血壓計四四方方，設計簡約。雖然係智能血壓計，不過同普通電子血壓計差唔多大。白色的機身，沒有繁瑣按鈕，睇落去有少少無印的感覺，唔多似 Made in China 的出品。而上面的兩個按鈕，分別是『爸爸測』、『媽媽測』，非常直覺的設計，連接手機後，可以直接分開記錄爸爸或媽媽的每日數據，就算唔識用智能手機的長輩都無需花太多時間重新學習。
▲ 純白的設計外觀相當乾淨，旁邊有一個 micro USB 充電孔同腕帶插孔。
▲ 腕帶部分有 22-30cm，手臂唔太肥的話都夠用，不過腕帶的面料使用尼龍質料，不太柔軟，戴上手唔太舒適。
簡單文字分析，貼心溫度提示
與一般電子血壓計不同的是，iHealth 血壓計有一個 4.3 吋彩色螢幕，唔單止會顯示心跳率及及血壓等測量結果，更會顯示血壓是否正常等初步分析。雖然彩色螢幕除咗美觀，好似唔多實際，不過以簡體字顯示初步分析，對父母來說會更加安心，唔駛再成日問點為之正常。如果父母視力有問題都唔怕，血壓計每次測量完會語音播出測量結果，而且相當大聲。小編每次測量完都會因為播出的普通話廣播而引來同事奇怪的目光。
▲ 螢幕除咗會顯示心跳率及及血壓等測量結果，更會顯示血壓是否正常及趨勢等初步分析。
▲ 唔用的時候會顯示室外 PM2.5 指數同室內外溫差，看似非常貼心。不過我不太明白室外的數據是如何得出的，因為天文台的溫度與血壓計顯示的不太相同。
▲ 連接手機 App 後，可以睇到詳細的量測資訊，而且有趨勢圖顯示。不過我發現每日只會將第一次測出來的數據記錄，即是說，就算習慣早晚壓血量，都只會記錄早上的數據。
▲ 手機 App 可以係設定血壓計的開機畫面，提醒爸爸媽媽量血壓。
相關文章:
【評測】小米 14 外形 手感 相機 屏幕 效能開箱評測 【評測】小米 14 Ultra 外形 手感 相機套裝 影相拍片 屏幕 效能開箱評測 【評測】Redmi Buds 5 Pro 外形 佩戴感 功能 音質開箱評測
Wi-Fi 同步，遠距離關注父母健康
比起上一代的小米血壓計，呢部除咗可以將數據直接記錄係手機 App外，更可以通過 Wi-Fi 自動同步數據到雲端，以微信遠程把資料傳給指定人士。這樣就可以遠距離了解爸爸媽媽的血壓數據，密切關注父母健康。此外，唔少人都擔心電子血壓計會因電力不足而影響準確性，而 iHealth 血壓計內置 2,200mAh 充電電池，而且會顯示剩餘電量，電量不足時只要通過 MicroUSB 接口充電即可，非常方便。
▲ 只要連接過一次血壓計，就算唔番屋企都可以睇到父母的即時量測結果。
▲ 左上角可以看到剩餘電量，避免因電力不足影響準確性。
依莉詩：「自動記錄夠方便」
唔少人都有量血壓的意識，不過要爸爸媽媽次次都記低數據，佢地未必會記得做。而呢部智能血壓計會分別將爸爸同媽媽的數據記錄係 App，咁子女就可以更了解佢地的血壓趨勢，複診時比醫生睇都方便 D 。此外，每次測量完都會顯示同讀出心跳率、血壓、是否正常及趨勢等測量結果及初步分析，雖然係簡體字同普通話，不過對爸爸媽媽來說，知道「正常」個刻已經非常安心。至於準唔準，因為每個人每次的血壓都唔同，好難評估。不過我同其他同事都測過，得出的數值同平時自己測的都差不多，估計誤差都不會太大。
不過，最後都要提提大家，血壓係一個趨勢，而且會有好多變數，例如做完運動、天氣太熱都可能有影響，唔會因為一次測到血壓高過標準就會係高血壓。但如果長期差到都過高，而且有頭痛頭暈等不適，最好就去睇醫生啦！
價格：人民幣 399 元 (約 HK$ 476，NT$1,994)
相關文章:
【評測】小米 14 外形 手感 相機 屏幕 效能開箱評測 【評測】小米 14 Ultra 外形 手感 相機套裝 影相拍片 屏幕 效能開箱評測 【評測】Redmi Buds 5 Pro 外形 佩戴感 功能 音質開箱評測
分享到 :
最新影片
