今時今日買手機，唔係買 iPhone 就係買 Android 手機，筆者自己就覺得兩個系統各有各好，沒有誰比誰優勝，我有時就會諗：如果有一部手機，兩個系統都有齊就好了。當然 Apple 唔會比你係 iPhone 度裝 Android OS 玩 dual boot，亦唔會開放 iOS 比 Android 用家裝係手機度啦。咁有乜計？最近就有中國公司發明了 Mesuit 機甲這款可以俾 iPhone 玩 iOS + Android 雙系統的配件，究竟正唔正？筆者就同大家介紹下。
咩人啱用先？
在介紹機甲之前，可能大家會問自己：究竟自己啱唔啱用先？畢竟最少都要近成千蚊人仔，買番來唔啱自己用就無謂啦。大家不妨問問自己以下幾點中幾多個？如果中兩個或者中哂，機甲都值得你入手嘅。
- iPhone 用家從未用過 Android 想試下
- iPhone 用家想用雙卡雙待
- 有 APP / Game 一定要在 Android 運作但唔想拿多部機跟身
- 買咗 16GB iPhone 想增加容量又唔想插 USB 手指
機甲開箱一齊睇
其實要買機甲 Mesuit，暫時只可以在他們官網或者京東商城購買，而且售價不算便宜，相信大家就算啱用，都想先睇清楚才決定是否入手吧。現在就讓 Edward 先為大家帶來機甲 Mesuit 的開箱吧。
▲拿到機甲成套就係咁了：一個包裝盒及一個充電火牛盒。
▲先睇充電火牛盒，其實是一個兩腳插頭，並非香港使用的插座，建議大家用回香港的手機充電火牛配合 Micro USB 線為機甲充電好了。
▲好了，而家就為機甲開箱！
▲筆者由於用的是 iPhone 6 Plus，所以入手的是 Plus 版本的機甲，承惠 1,099 元人仔（約 HK$1,286）。
▲打開哂就見到呢堆物品，包括：Micro USB 充電線 x 1、Lightning 轉 Micro USB 轉插、機甲機身及說明書sss。
相關文章:
【教學】iOS 18 最新遙距控制手機功能 可直接控制對方電話 + 畫圖說明 5 款幫小朋友學寫好中文字 App 免費使用 + 家長推薦 + 初小筆順學得快 課金人士買手機有得慳？無需客戶 Google Play 金/白金/鑽石會員 csl 買淨機有折扣
機甲構造 + 手感全面睇
講完開箱，在未講點裝之前，先等 Edward 同大家分享一下裝上機甲後的 iPhone 的手感吧。眾所周知 iPhone 如果用上 Plus 系列機款的話，本身因為屬於大熒幕手機，所以都已經有少許大部；再套上猶如充電池保護殼的機甲後，由於機甲本身都幾厚（大約是兩部 iPhone 以上的厚度），加上內置都有 CPU、RAM、甚至電池等，根本就是一部沒有熒幕的智能手機，所以都有少許重量。簡單點說：裝上機甲後，會令本身已不輕的 iPhone 6 Plus 重上加重 + 厚上加厚，單手操控基本上大家想也不用想。幸好它的外殼都做得幾好，機背採用了「淰淰地」的塑膠物料，加上邊位有少少微斜向上，在手感上挽回了一點分數。此外，它的開孔位都十分準確，基本上裝上機甲後，都不會影響按下本身 iPhone 的按鍵及使用相機等功能，唯一是如果要替換 iPhone 本身的 SIM 卡，就需要將機甲拆下才可，不過一般如果大家用上保護殼都需要咁做啦，所以問題都唔算太大。整體而言，套上機甲後，大家當作用上一款好像有三防功能（實驗當然沒有！！）的 iPhone 6 Plus 保護殼吧。
▲機甲在設計上就猶如一個擁有充電功能的 iPhone 手機保護殼，機背用上了「淰淰地」的塑膠物料，加上邊位有少少斜向上，物料上都算舒服。
▲至於內籠就採用了絨面設計，避免刮花 iPhone 本身機背，設計都算幾細心。
▲開孔位都算幾準確，基本上都唔會影響使用 iPhone 本身的所有按鍵及相機。
▲唯一缺點是將 iPhone 6 Plus 裝上機甲後，會令機身厚上加厚及重上加重……
教你點安裝 + 啟動 Android
好了，睇完開箱及機身介紹，大家決定買又已入手了，究竟又點安裝呢？而家就教教大家啦。
Step 01
首先要先在 iPhone 上安裝機甲 APP，這款 APP 說穿了就是 Android OS 模擬器，令大家可以在 APP 內使用 Android 系統。不過這款 APP 在 App Store 上是沒有上架的，要安裝的話，先在 App Store 安裝任何一個 QR Code Reader APP，之後用來掃描說明書中的 QR Code，Safari 就會顯示安裝頁面。如果大家用呢個 QR Code 裝唔到，可以用 Safari <開啟此連結> 下載機甲 APP。
Step 02
然後大家要輸入機甲的 IMEI 號碼，大家在包裝盒上就可找到。輸入後點按「提交」。
Step 03
之後會見到「安裝描述檔」頁面，點按右上角「安裝」，再輸入手機密碼，然後再點按多次「安裝」。
Step 04
之後會出現「要在『App Store』裡開啟此網頁嗎？」，點按「開啟」後再點按「安裝」，然後就等待機甲 APP 安裝即可。
Step 05
之後記住開啟 iPhone 的藍牙功能，然後如果想用雙卡雙待的用家，記住放入 SIM 卡在機甲近底部的 SIM 卡槽（需要 Nano SIM），之後再插入隨機附送的 Lightning 轉 Micro USB 轉插。
Step 06
此時 APP 應該都已安裝完成，如完成後就可將 iPhone 插入機甲，之後長按機甲機背的按鍵開啟電源。當見到前方底部的燈亮起，就代表機甲電源已開啟了。
Step 07
之後都會見到一大堆安裝教學，大家可以無視，不過一大堆私隱授權功能，就看大家機甲想用什麼功能而決定是否開啟了。
Step 08
最後進入設定介面後點按「開始」，之後設定好牆紙，就可以正式進入機甲的 UI，開始在 iPhone 上使用 Android 系統了！
機甲介面全面睇
好了，安裝完成！究竟機甲的介面係點？而家就同大家分享一下啦。
▲介面上與原生 Android 幾乎相似。
▲操控上與一般 Nexus 手機幾似，拉下一次見到訊息提示，再向下拉就見到快速按鍵清單。
▲設有繁中介面，唔想睇簡體中文的 wire 民有得揀。
▲機甲 OS 可以透過 OTA 升級，最新版本已可支援 iOS 10，而且都幾順，大家可以放心使用。
▲Android 版本只是 5.1。
▲OS 內的機甲 APP 可以一個版面睇到機甲狀態、機甲 OS 及 iOS 的狀態、甚至可睇到兩個 OS 的相片，亦可以從 iOS 那邊將相片傳輸至機甲儲存。
▲另外機甲 OS 亦可以一個版面睇到新聞，大家可翻至最左頁，或者由上方拉下像窗簾的線，亦可睇到最新新聞。
▲從儲存空間可以見到機甲內置了 16GB 空間。
▲亦有基本的熒幕鎖定方式。
▲最特別是支援無損 BT 模式聽歌，單用來聽歌都幾好喎！
▲裝 APP 上比較特別的，是會自動辨識程式的種類，然後放入適當的文件夾，十分體貼。
▲機甲亦已有不少工具讓大家使用。
支唔支援 4G？上網有幾快？用落順唔順？裝唔裝到 APP？
好了，介紹過機甲的介面，相信大家都記得筆者前文提過機甲是支援雙卡雙待的，網上亦有指它可支援中國移動及中國聯通的 4G 網絡。究竟來到香港又點？係咪真係用到雙卡？又係咪支援到香港 4G？用落又順唔順？又裝唔裝到 APP？而家就同大家講講。
問題一：支唔支援 4G？
▲筆者放入 csl. 的 4G SIM 卡，在設定中見到是可以選擇 4G 的。
▲在主介面頂部顯示網絡的位置，以及快速開啟目錄中，亦見到數據網絡上是寫著 4G 網絡的。
▲以 Speedtest APP 測試網速，下載只有 4.75Mbps，而上載就有 10.55Mbps，似乎唔算太快喎……
▲究竟是否機甲問題呢？筆者就在相同位置及使用相同 SIM 卡，在 iOS 那邊同樣用 Speedtest APP 測速，即時獲得 26.17Mbps 下載速度及 27.81Mbps 上載速度，從此可見機甲雖然可支援 4G，但似乎只是基本 4G 水平。
問題二：支援雙卡雙待？
▲筆者已將 csl. 4G SIM 放入機甲內，並以另一電話致電，可見在機甲 OS 環境下是打得通完全無問題的。
▲咁當使用 iOS 時，如果機甲那邊的號碼有電話入，又接唔接到呢？筆者試過是接到的，當有電話來時熒幕上方會彈出提示及顯示來電號碼，點按提示就會開啟機甲 APP 並轉到接電話介面，此時接電話就可以了。不過要留意的是，估計機甲並不支援 VoLTE，所以接電話後，機甲那邊的網絡會跌至 3G。
▲咁掉轉，如果用緊機甲個邊的 Android OS 時，如果有電話打來 iOS 個邊的電話號碼又接唔接到？又得喎！證明雙卡雙待完全無問題。
問題三：用落順唔順？
用文字好難講，用片來答大家啦！
▲從影片大家見到，雖然機甲只用上 MTK MT6753 處理器、2GB RAM 及 16GB 內置儲存空間，但用落都算幾順，只係間唔時會窒窒地。筆者亦試過裝 Pokemon Go 上去，裝係裝到但就感應唔到 GPS，所以都係玩唔到。
問題四：裝唔裝到 APP
相信呢個係各位 wire 民最關心的問題，畢就有個 Android OS，如果裝唔到 APP，其實同用部智能化版的 Nokia 3310 無乜分別。而家就同大家試試啦。
▲機甲本身都有個應用商城，都已經有唔少 APP 俾大家下載到，其實 Pokemon Go 都有（入面叫做口袋妖怪 Go）。
▲當然，大家可能擔心呢啲中國 APP Store 唔知信唔信得過，所以自然都想裝番個 Google Play Store 啦，其實係入面一打 Google 已經見到一堆。
▲有些只是安裝 Google Play 服務，有些就一鍵安裝所有 Google 服務。
▲不過最終都係無好結果，所有從機甲內的 App Store 安裝關於裝 Google Play Store 的 APP 全面唔 work！
▲所以要裝，就唯有靠手動安裝 APK 的方法了，首先大家要進入機甲設定中的「安全性」，然後開啟「不明的來源」。
▲第一個方法比較簡單，就是直接用機甲內的瀏覽器搜尋並下載 APK，然後進行安裝。不過要留意的是，當下載時機甲系統會問你是否從機甲的 App Store 下載該 APP？此時記住點按「原文件」，之後就會見到從下載連結而來的 apk 檔，點按下載後再按指示安裝就可以了。
▲成功安裝！
▲好了，如果大家想再安全一點：從舊的或朋友的 Android 手機，將該手機從 Play Store 上下載及安裝的 Android APP 移極到機甲上，又可以點做？首先要在原手機上下載 ES 檔案瀏覽器這款 APP <點按此下載>，然後在主頁點按「程式」，就會進入上面的介面，之後長按想移植的 APP 選擇它們，再點按下面「備份」，就可將此程式的 apk 擷取出來了。而要找回備份了的 apk，只要在根目錄中選擇 backups –> apps，就會找到了。
▲問題來了：點將 apk 檔抄去機甲個儲存空間呢？可能大家會諗：駁 USB 線入電腦再抄入去咪得囉。但問題正是在此：筆者是使用 Mac 的，接駁 USB 線後，不會像一般 Android 手機般開啟 Android 檔案傳輸 APP，而只是會充電而已。所以唯有將 APK upload 去 cloud 再在機甲 OS 內以同一 cloud APP download 番個 apk，之後就可安裝了。至於 cloud 的選擇，筆者試過 OneDrive 是最好的，Google Drive 都試過，但因為沒有任何 Google 服務框架，所以是使用不能的。
相關文章:
【教學】iOS 18 最新遙距控制手機功能 可直接控制對方電話 + 畫圖說明 5 款幫小朋友學寫好中文字 App 免費使用 + 家長推薦 + 初小筆順學得快 課金人士買手機有得慳？無需客戶 Google Play 金/白金/鑽石會員 csl 買淨機有折扣
總結：一用會上癮！可惜 Android 版本太舊……
整體而言，機甲 Mesuit 除了本身較厚較重外，可以講係 iPhone 的補完方案，不但可以用到雙卡雙待，方便需要經常中港兩地跑或者有兩個號碼的用家可以帶少部機，又可以在 iPhone 上面「裝到」Android APP，更可以增加 iPhone 儲存空間及使用時間，真係用落會上癮的！唯一缺點就是內置的 Android 版本太舊只是 Android 5.1，在現時 Android 7 都就來推出之時，筆者覺得確實 old news 了一點。希望官方可以快點最少更新上 Android 6.0 吧，那麼使用起來應該會更好用吧。
售價：999 元人民幣（iPhone 6 / 6s；約 HK$1,169）；1,099 元人民幣（iPhone 6 Plus / 6s Plus；約 HK$1,286）
查詢：機甲 <點按此>
相關文章:
【教學】iOS 18 最新遙距控制手機功能 可直接控制對方電話 + 畫圖說明 5 款幫小朋友學寫好中文字 App 免費使用 + 家長推薦 + 初小筆順學得快 課金人士買手機有得慳？無需客戶 Google Play 金/白金/鑽石會員 csl 買淨機有折扣
分享到 :
最新影片
