七月都未過，海洋公園的嘩鬼就已經蠢蠢欲動聚集係冰極餐廳介紹嚟緊哈囉喂全日祭有咩搞作。我依莉詩今日就到場同佢地嚟過人鬼交流啦！
今年哈囉喂大部份都俾公司包咗場，就只有 17日開放俾公眾，真係撞鬼都要擇日。同上年一樣今年有 8間鬼屋，其中一間更會分日夜兩種玩法。另外，仲有 10個表演分佈係園內不同角落。如果買普通飛，我諗好彩嘅應該可以玩到 3、4間鬼屋嘅，所以依家就快 D 揀定排邊幾間啦！
依家乜都興懷舊，就連鬼片都要番炒。呢間鬼屋就以八十年代經典電影《捉鬼敢死隊》就主題，穿過鬧鬼大宅、凶靈地下鐵、紐約時代廣場等一個個經典場景，親身體驗電影經典對白「遇到衰鬼，急Call捉鬼敢死隊最有計！」不過見到咁可愛的棉花糖鬼，到底會係驚嚇還是歡樂呢？
呢間鬼屋其實有兩種體驗，當中的捉鬼敢死隊學堂就設有捉鬼槍練靶場，等你一展槍法，一嚐捉鬼的樂趣，大人細路都啱玩。
位置：高峰樂園動感天地
開放時間：上午 11 時 – 晚上 11 時
每年哈囉喂都有一間用數字命名，更是全場最恐怖的鬼屋。不過今年的【16禁】再唔係一個人單獨入去，更唔係瞓棺材咁簡單，反而大玩 SM 。欣賞完妖豔華麗的真人騷後，便會正式展開血淋淋的噩夢，走進一間接一間的陰森密室，利用一幕幕血腥心寒的恐怖場面挑戰人類底線。亦因為【16禁】，所以 16歲或以上及能接受極度驚嚇人士先入得去，睇嚟驚嚇程度唔講得笑。
位置：高峰樂園動感天地
開放時間：下午 1 時 – 晚上 11 時
自從 Pokemon Go 之後，AR 擴增實境技術應該無人唔識，而係呢個華麗堂皇的宮殿裹，大家可以透過手機 APP，打開「攝靈天眼」，呼喚一眾妖精現身。唔知係咪可以用精靈球捕捉佢地呢？
位置：海濱樂園廣場
開放時間：上午 11時 —下午 5時 30分
夜幕低垂，華麗宮殿隨即變成恐怖鬼域。牛魔王、蛇妖、蜘蛛精等各路妖魔鬼怪從黑暗中甦醒，向人類施以凶猛突襲，捉拿活人煉成長生不老的養顏補品。想出去的話，唯一出路就是越過猛鬼橋和凶靈祭壇，逃出妖氣衝天的煉獄。
位置：海濱樂園廣場
開放時間：下午5時30分 — 晚上11時
讀過書的人都應該聽過 3樓女廁有鬼的故事，聽就聽得多，就好似無人真係見過。不過呢間位處山上的陰森荒廢校園，就一定有啦！走過鬼影幢幢的走廊，直搗校園墓地，你就會搵到驚慄故事背後的謎團。
位置：高峰樂園極速之旅旁
開放時間：下午1時 — 晚上11時
係殭屍王唐禹哲的豪宅內每日都會舉辦盛大的狂野派對，但係狂野派對中，原來危機處處。據說唔少人會係忘我舞蹈之際，走進豪宅的秘密暗室，被嗜血成性的恐怖殭屍捉到後就再無出過嚟。
位置：高峰樂園登山纜車廣場
開放時間：下午1時 — 晚上11時
萬聖節唔一定係驚嚇，同上年一樣。南瓜精靈精心打造了一條古惑糖果村，等小朋友可以挑戰搗蛋小遊戲，帶著繽紛糖果滿載而歸，盡情開懷大笑。
位置：海濱樂園自然大揭秘
開放時間：上午11時 — 晚上11時
入黑後，嘩鬼由鬼屋走出戶外，彌漫公園的每個角落。當中兩條以中西惡靈為主題的猛鬼巷充滿陰氣，隨時撲出送上「驚嚇」！
位置：海濱樂園及高峰樂園
開放時間：下午5時30分 — 晚上11時
以往買優越門票都係為咗唔駛排隊，不過多咗手機 App 預約之後好似無咗果份「優越」，而今年優越門票可入 獨家進入 4個哈囉喂景點的秘密暗室(【16禁】、【屍立中學】、【心慌血色吧】及【血祭宮殿】)，相信會係新一個賣點呢！
海洋公園哈囉喂全日祭2016
日期：2016年10月2、7-10、14- 16、20-23、27- 31日
開放時間：早上10時至晚上11 時
票價：成人 $ 385 ；小童（3 至11 歲）$193
哈囉喂優越門票：成人 $730 ；小童（3 至11 歲）$365