香港空氣污染問題一直嚴重，特別係秋天，鄰近珠三角地方嘅工廠廢氣經常飄到香港上空，焗得令人抖不過氣。到底我哋可以逃到那裡可以避過吸入過多 PM2.5 懸浮粒子導致呼吸道不適呢？最近我依莉詩就搵到一個智能空氣質素監測儀，不但可以隨身攜帶，仲可以當埋尿袋用添！
呢個 Oregon Scientific 智能空氣質素監測儀四四方方，有藍色同黑色兩款，睇落似個跳字鐘，都幾型仔，放係 office 枱面不失係好擺設，不過螢幕唔會長著，要睇時間就要按下開關。而且監測儀只有掌心大小，非常輕巧，加上內置 2600mAh 電池，可以隨時充當尿袋用，咁唔怕被人笑帶個監測儀出街咁怪了！
▲ 雖然 2600mAh 電池唔算多，都勉強可以差到一次電。
監測儀除了可以監測到對人體損害最大嘅 PM2.5 ，即大氣中直徑小於或等於 2.5微米嘅顆粒物外，同時監測埋 PM 1.0 、 PM 10 、 VOC 空氣質素、溫度及濕度，只要打開監測儀就可以查看四周空氣質素情況，找出一個舒適嘅環境。我嘗試由 Office 走到後樓梯，4個指數都由 10幾立即跳到近千，還發出咇咇聲同閃紅燈，證明後樓梯空氣十分惡劣呢！
▲ 按下開關，螢幕就會顯示 PM 1.0 、PM2.5、 PM 10 、 VOC 空氣質素、溫度及濕度等指數，如果係哈哈笑就代表環境理想。
▲ 雖然世界各地對空氣質素嘅指標都唔同，監測儀就把繁複嘅數據簡單劃分三個狀況，分別係健康、中等同 甚高，並以綠、橙、紅燈顯示，簡單易明。
▲ 監測儀只有一個開關，按下就會顯示時間、溫度、濕度及空氣污染指數。此外，更可透過藍芽連接手機參考過往數據。
對於有鼻敏感嘅我來說，知道空氣是否清新好緊要，唔係就會不停打噴嚏，而呢個監測儀可以隨身攜帶都幾方便，仲可以當埋尿袋用，令出街都唔會太怪。不過有時就算知道空氣唔好都無辦法，所以如果可以加埋淨化功能就更好，至少係附近範圍嘅空氣可以清新少少嘛。(不過要有空氣淨化功能又唔知要幾多錢了吧？)
Oregon. AIR Smart Air Monitor
售價：$398
查詢：Oregon Scientific (2303 1889)
