原子筆大家就由細用到大，即使而家呢個世代打字嘅機會多過用筆寫字，都應該唔會陌生。港女仲好記得當年我考兩次公開試，都一定會新買兩支 Made in Japan 嘅按掣黑色原子筆，因為無間斷連寫 6 個鐘都可以非常順暢，跌落地又唔會咁易斷墨。當時港女仲好記得曾經有老師叮囑過我地，唔好貪平用啲雜嘜原子筆，一來寫寫下斷墨會令考試心情更緊張，寫得唔順又會慢咗，追不上如泉湧嘅思緒… 過咗咁多年，如果唔係睇到早幾日有關原子筆頭嘅報道，應該唔會勾起港女對當年用原子筆日寫夜寫嘅懷念。
▲ 利申：唔好誤會，當年港女並唔係用呢支筆考試，只係因為呢支筆個「Made in Japan」及「日本製」字樣十分清楚，先影啫，本圖只係插圖。
報道話，中國山西太原鋼鐵集團生產的筆頭鋼出爐，終於造出了自己的原子筆頭，全靠中國國務院總理李克強上年（2016 年）的一句抱怨。
事源李克強上年去山西太原主持鋼鐵煤炭行業嘅座談會，佢提及：「我們還不具備生產模具鋼的能力，包括圓珠筆（原子筆）頭上的『圓珠』，目前仍然需要進口。」當時個座談會其實係探討中國鋼鐵業產量嚴重過剩，而即使過剩，不少行業用嘅鋼鐵仍然要依賴進口，原子筆筆頭嘅部件就係其中一個例子。
中國年產幾百億支原子筆，其實都有啲筆嘅筆頭碳化鎢鋼珠及珠座係自家生產，只係個質素唔高，良率低，做唔到長時間寫得順暢嘅效果啫（咁仲唔夠咩？）。
而其實早喺 2011 年嘅中國兩會上，科技部部長萬鋼就已經講過，中國出產嘅原子筆，筆頭嘅圓珠有九成都係進口，而墨水則有八成係進口或用進口設備製造。嗰時開始就已經有公司開始研究製作原子筆筆頭。
大家不妨去 Google 一 search、百度一下、淘寶睇過，都不難發現中國產原子筆大多標榜「瑞士筆頭、日本油墨」。就連打正「新國貨運動」旗號嘅小米，佢地出嘅「米家簽字筆」嘅文案，都係大大隻字寫住「瑞士進口筆芯、日本進口油墨」，可想而知中國產嘅部件真係唔係好掂。
▲圖片擷自小米官方網頁
唔知大家會唔會諗，中國飛機大炮 iPhone 都做到，有咩可能區區一粒原子筆筆頭鋼珠都整唔好呀？港女建議大家先睇一睇下面一條片：
13 分鐘的片段入面，講到淨係碳化鎢鋼珠製作涉及近 20 個工序。而由於鋼珠體積細小，無論係珠座還是墨水，都要求極高精準度，咁樣組合出嚟先會有一支寫得流暢嘅筆。但偏偏生產了幾十年原子筆嘅中國就無掌握到呢啲技術，部件一直都係靠進口。從成功製作出中國產鋼珠筆頭嘅工程師口中，更得知佢地用咗 5 年研究製作原子筆筆頭，原來都係要「摸住石頭過河」，由零開始，無得借鑑，因為鋼做筆頭產品嘅生產工藝是外國企業嘅核心機密。
幾日前，《人民日報》就報道太鋼集團於 2016 年 9 月嘅筆頭鋼試驗成功，第一批筆頭鋼材終於出爐，更期望未來兩年，這些中國產嘅筆頭可以代替進口。但港女上網睇過其他網民及陸媒嘅反應，佢地表示呢個新發展只係令中國嘅產業向前行咗一小步，因為不單是鋼鐵行業，目前眾多產業對外國核心技術的依賴高達 50%：化妝品嘅 formula、跑鞋鞋底緩震技術、智能電話作業系統、專業級醫療設備（包括大部分檢驗儀器、超聲波儀器、磁力共振設備、心電圖機等）、汽車內嘅不同系統等，中國都未有生產工藝。
不過，如果無領導人點名抱怨，呢啲技術嘅發展速度係咪都可以好似原子筆個筆頭咁，開行 turbo 向前呢？