咩年紀嘅朋友都會遇上感情煩惱，港女嘅好姊妹都一樣，有時出嚟食飯，就會同大家 update 下感情狀況。港女好記得有一次，大家一路食飯傾計，一路傳閱朋友 H 與傾慕者的 Whatsapp 訊息。然後睇完一大輪之後，好姊妹 Y 就俾咗啲意見朋友 H：「妳同人地傾計嘅時候要用多啲 emoji、俾多啲反應，人地先 feel 到你對人有興趣㗎嘛。同埋事無大小都要報備一下，等人地了解下你嘅日常生活。」
港女當年都有係咁易讀過下一啲有關「人際關係及溝通」嘅 course，印象中真係有分析過 small talk＊對於同人打交道嘅重要性，估唔到會喺呢啲場合提返起。而外國就有人製作咗隻 App －Crushh 出嚟，以數據分析的方法拆解你同傾慕者嘅訊息對話，幫一段關係評評分。
Crushh App 嘅演算方法源於 20 萬段關係嘅分析，當中仲諮詢咗社會學家同心理學家嘅意見，無論係標點符號、emoji 定係表達方式，都係個 App 嘅分析範圍之內。但唔同年紀或者性格嘅人，其實訊息內容好唔同，個 App 都可以自動調整。最神奇嘅係，個 App 仲可以按照你地嘅對話製作一個評分圖表，等你知道幾時幾日你地嘅關係開始走下坡，或正在改善。
聽落好似好勁，但有專家就話呢個好可能只係一個研究階段，同埋個 App 其實無咩可能會「明白」message 嘅內容，因為好多時我地講嘢都不時夾雜好多隱喻、抽水、講笑等，數據分析主要從句子結構出發，唔係語意出發，所以未必咁準確。
港女就有 down 落嚟諗住試下嘅?，好可惜佢只係支援短訊，其他 message apps 如 Whatspp、LINE、Facebook Message 等都用唔到，同埋暫時只有 Android 版本。港女其實就唔係幾信個 App 係 work 嘅，同埋咁樣做港女都覺得唔可取：即係有日我覺得男朋友對我感情淡咗，我唔直接同佢溝通，反而用個 App check 佢，好似想攞啲咩證據咁。這樣好嗎？
＊編按：small talk 是指一些無關重要的日常對話，例如寒喧、俾反應等。