又一年了！今日下午 3:01pm 就係 iPhone 7 / 7 Plus 接受預訂的時間，今次又係星期五，睇來大家都係要係 office 偷偷「蛇王」訂愛機。要唔畀老闆發現又要買到愛機，自然一切都要夠哂快！對於想買番部 iPhone 7 / 7 Plus 自用的 wire 民，如何面對一大堆炒家 / BOT 都可以提高搶機成功率呢？ Edward 就特別為大家準備了一份一分鐘全攻略，令大家可以大大提升買到愛機的成功率。

預備工夫

無論大家用咩方法，都建議今朝先做好準備，咁大家訂機個時就唔洗拿手唔成勢啦。究竟要預備咩？其實只需要兩件事：

▲首先大家先係 Apple ID 個人帳戶入面，填好哂所有個人資料，最重要係填好帳單地址同埋信用卡資料，咁大家就唔洗訂機個時花時間再填。

▲第二樣嘢當然係預備好信用卡，而且要係一早已輸入 Apple ID 帳戶的信用卡，因為訂機時大家需要輸入卡背的安全碼。

方法一：使用 Apple Store App

之前兩、三年的經驗都話畀 Edward 知，用 Apple Store APP 訂機的成功率，永遠比透過 browser 開 AOS 大得多。當然，要裝 Apple Store APP，首先大家要有一部 iPhone、iPad 或者 iPod Touch。安裝好之後就按以下步驟做啦。

安裝好後：

• 約今天 2:30pm，最遲 2:45pm 開始登入 APP（因為如果大家係 3:01pm 先入去的話，可能會因為太多人已入 APP 而遲咗或者入唔到）。
• 按購物鍵。
• 首頁已是 iPhone 7 預訂頁面，點按型號與價格 –> iPhone 7 / 7 Plus。
• 選好你想購買的顏色及容量，如果想額外獲得一年 AppleCare+ 全方位服務計劃，可在此頁點按加入購物籃，售價承惠 $1,088。
• 你會見到下方出現「暫停供應」（當然啦，都未到 3:01pm 開售時間，自然未有）。
• 不斷按左上角的「儲存容量」返回上一頁再選想買的容量機款，就可以刷新頁面。預計開始後如果你成功搶到就會看到有存貨，並出現進一步的購買提示。一般情況下每個型號大家最多只可以買 2 部，換言之每個 Apple ID 戶口最多只能買 4 部新機（iPhone 7 x 2 + iPhone 7 Plus x 2）。
• 訂購完成後，只要等到電郵通知，就代表訂購成功。當然收到此 email 都唔代表唔會被 cut 單，因為按過往經驗 Apple 有機會 random cut 單的。自用用家此時唯有求神拜佛希望 Apple 唔好當你係炒家而 cut 你單啦。基本上只要大家的訂購程序去到「準備出貨中」，大家才可安心。

（P.S.：上次 iPhone 6s / 6s Plus 推出時，Apple 就明顯改變了銷售策略，基本上是長時間開賣，所以今次預計都係一樣，最緊要完成程序後睇番付運日期，如果唔係第一水，即係 9 月 16 日至 22 日收到，就考慮是否 cut 單保平安吧。當然，如果你只是用家，幾時收到機都無問題啦。）

方法二：Apple Store 網站

除非你已安裝真正可用的自動購買程式（經驗所知第一日絕大部分自動購買程式都未必有效），否則 Apple Store APP 還是最好的選擇。但如果各位 wire 民沒有任何 i-Devices 的話，就直接 <點按此> 進入香港 iPhone 7 / 7 Plus 購買網頁搶機啦。

為咗令大家更容易搶得心頭好，以下就等 Edward 為大家準備好各容量同埋顏色的連結，咁大家到時一 click 入去就訂到，唔洗煩！

iPhone 7

32GB：黑色、銀色、金色、玫瑰金色

128GB：亮黑色、黑色、銀色、金色、玫瑰金色

256GB：亮黑色、黑色、銀色、金色、玫瑰金色

iPhone 7 Plus

32GB：黑色、銀色、金色、玫瑰金色

128GB：亮黑色、黑色、銀色、金色、玫瑰金色

256GB：亮黑色、黑色、銀色、金色、玫瑰金色

方法三：網絡商出機

而最後一個方法，就係透過網絡商預訂出機。除了去年的 3HK、SmarTone 及中國移動香港外，今年增加了中國聯通都可以同 Apple Online Store 一樣，今日 3:01pm 係他們官網接受預訂，如果大家咁啱合約就完或者已完想轉台或續約買機，可以考慮呢個方法，不過就唔肯定係咪 9 月 16 日當日拿到機啦，因為都係睇先後次序。但作為用家，都無乜所謂啦，相信唔會遲好耐掛。（作為炒家就唔建議用呢個方法啦，因為近年網絡商每次出新 iPhone 都會加台費，成本愈來愈高，真係劏完機賺埋都唔夠蝕。）

3HK、SmarTone、中國移動香港、中國聯通

入手 3 大注意事項

1. 自用入手今日好機會

筆者建議如果大家是打算買 iPhone 7 / 7 Plus 自用，今日確實是好機會，因為今次 iPhone 7 / 7 Plus 極有機會好似舊年 iPhone 6s / 6s Plus 開賣時般長期開賣，然後按大家成功訂購的次序去依次派貨。因為很難控制到貨時間，加上要等速遞送貨，太多不確定因素，所以他們寧願會以之後可能開通的 iReserve 戰場才出手，因為可以確保 16 日拿機然後即買即放，賺取最大利潤。當然，iReserve 有冇暫時都未有人知，所以有機會炒家聽日都會少量入貨，以免一旦 Apple 真係取消 iReserve 的話，都有貨揸手。所以各位用家，都唔好太老定啦。

2. 想炒必入 7 Plus 亮黑 / 黑色

最後提提大家，其實唔少炒家都會首先考慮 iPhone 7 Plus 256GB 亮黑色版本，其次就是相同機款相同容量的 iPhone 7 Plus 256GB 黑色版本，因為這個顏色始終是新色，利潤有機會最高。如果你是打算炒賣又唔想同人爭，不妨一開賣就考慮 128GB、甚至 32GB 的 iPhone 7 Plus 黑色版呢種「人棄我取」的策略，成功率可能會大幅提升。

3. 自用想 show off 黑色首選

當然，如果是用家的話，Edward 覺得 128GB 版本一般來講已夠用，至於顏色方面就當然按個人喜好而定啦，但如果想 show off 的話，亮黑色及黑色肯定是必然之選。如果再在兩種顏色中二揀一，筆者個人會揀黑色，因為無論機背、機邊甚至連天線帶都是統一色調（天線帶會有少許灰黑色），加上採用傳統 iPhone 的鋁金屬外殼，不會像亮黑色般手感如外媒評價般膠，亦不易黏上指模，如果你是有「潔癖」的用家，就更加應該考慮黑色版本了。

最後，祝各位 wire 民早日成功買得心頭好！