科技可以帶俾人方便，一部智能手機就可以寫筆記、計數、畫畫、記錄日程，甚至錄音同查字典。正當連 3歲細路都用緊平板電腦畫畫的時候，有無人發現身邊的文具鋪愈來愈少？而你又幾耐無拎起過支筆？今次我依莉詩就嘗試走訪多間文具鋪，當中有與世無爭的屋邨小店 文氏精品世界 、 充滿人情味的商場文具店 明儀文具玩具公司，亦有 文具收藏家打造的文具博物館 銀の文房具 及 90後為追夢所開的 Journalize 文簿具社。每一位都有著不同的故事，但他們對文具都有份深厚的感情，現在我們就由文具本身講起。

走訪文具鋪看今昔

為了看新與舊的文具做對比，我依莉詩走訪了幾間不同的文具鋪。與每位文具店老闆的交流間，我漸漸發覺到他們的對文具的執著同與世無爭的情懷。

銀の文房具 地址：新蒲崗五芳街27-29號 ,永濟工業大廈, B座1樓1B

現代文具精品化 不再重功能性

自已離開中小學的生活已經很遠，但走入文具鋪就好似回到過去一樣，文具的種類沒有太大的改變，但走入文具鋪時總是覺得跟以前不同，但又說不出所以然。跨媒體創作人兼玩具收藏家、銀の文房具的店主鐘燕齊卻一言驚醒夢中人：「近呢二十年的文具幾乎變咗精品文具，新近的文具多印有電影、動畫、卡通人物。」他認為這是負責文具採購的人受到限制，「現在愈來愈少人用文具，純粹是追逐潮流，只求美觀」。但是文具不能只是這樣：「文具係方便人，無論你做任何工作，以前工廠、包裝工人，方便你的日常生活，令你工作更暢順。」

 

正當不斷採購精品文具，就使我們對文具的認識愈來愈少。歸根究底，都是因為香港缺乏文具的功能教育。鐘燕齊指，係香港即使從事這行四五十年的人都不著重文具的功能教育，「香港人唔知小朋友唔應該用 HB 鉛筆；小朋友手比較細，用長嘅筆無咁靈活，但香港的家長好多時覺得，小朋友支筆已經貴，要短就蝕底。」其實文具是有分男女、大人小朋友，係歐洲同日本，他們會分得好清楚小童同成人的文具。一代傳一代，慚愧地說，我小學時代常會流連文具店，除了是買玩具外，還會買各式各樣的筆，但由頭到尾都只是跟風跟潮流，人有我有。從來不講究寫起來暢順與否。我想這些就是文具功能教育的重要吧。我們選擇時多看外表和牌子，反而令我們一直都忽略了功能，亦令香港人用的文具一直沒有太多改進。

文氏精品世界 地址：坪石邨藍石樓 20號

客改去大型店  小文具店愈開愈晏

那些年不再，現時文具鋪一間一間地消失，並不單單是租金貴所導致。鍾燕齊坦言現時文具鋪衰落，地產霸權只係佔好細好細的因素，「好多文具鋪都係自己鋪，反而未必有第二代可接手，寧願租間鋪收租，仲好賺過賣文具。」就好似文氏精品世界的老闆：「以前做文具鋪環境好，做咗幾十年，供給到畀仔女到外國讀書。依家佢地成為專業人士，已經覺得自己好有成就，亦唔打算要佢地承繼。至於文具鋪，做到自己唔做得就會結業。」

明儀文具玩具公司 地址：九龍九龍灣麗晶商場2樓220室

就算仍然生存的文具鋪，感覺上亦少人了，再沒有三五成群的學生流連。鍾燕齊也認同：「現時人們多到無印、Log-On 等「大型連鎖店」買文具，小朋友好少去文具店」。除了是潮流不再，還有就是環境改變。以前小學會分為上下午校和全日制，「每日有三四批人，但而家得返 3 點幾一批，其他時間都無人」，文氏精品世界的老闆如此說。人流少，生意不夠做，只好晏開早收，減省電費開支。雪上加霜的是連辦公室和學校的訂單也少了：「寫字樓現在多數直接去批發商訂，好似 A4 紙果啲，我哋都無埋個批客。」明儀文具玩具公司的老闆亦面對相同處境，「依家好多都係學校自己訂，特別係開學，學校會有清單一次過訂購廣告彩等貴價文具，就連包書膠都派埋。一個學生只做一兩支筆生產，好難維持。」

 

 

科技改變 影印量大跌

賣文具難，那唯有開拓新的業務，不少文具鋪都有影印服務，「因為而家啲機可以租，唔使打本，以前要幾千蚊部」，文氏精品世界的老闆如此說。然而，影印服務不是想像中的好賺，「影印少咗好多，依家版權問題唔可以印書，以前會考、高考都要印書印 notes ，依家都無咗，而且 printer 普及，幾乎每個屋企都有部。」回想起高中約埋成班同學到文具鋪偷偷印 past paper 的情景，看來學制對文具鋪的生產都有頗大的影響。

 

年青人開特色文具店尋新出路

破舊立新，正當舊式文具鋪面對經營困難的同時，鐘燕齊覺得「Log-On 租都好貴，但就識與時並進，要用新的經營模式，引入更多優質文具，令人從拾用文具的樂趣，而唔係純粹擺貨係度等人買。」就好似 Journalize 文簿具社的 Jerry ，因為對舊物有興趣，於是 19歲就決定開文具鋪。 「除咗夢想，係想嘗試行唔同的路，發掘新的產品，如果人地用舊的方法做唔住，我地都唔會死行舊路。」 Jerry 認為「我入的貨都係自己鍾意，會睇設計、實用性同價格，而且會利用 facebook 同志同道合的人互動，帶俾人更多不同的體驗。」除了賣文具，收銀台上放置了一部古蕫計數機，客人可以接觸，並同 Jerry 交流文具心得。

 

Journalize 文簿具社 地址：銅鑼灣摩頓臺灣景樓6A地舖 (中央圖書館側)

其實文具及科技可並行

雖然好多人都覺得 Jerry 好傻，未讀完大學就退學經營一個式微的行業。開業一年，Jerry 甚至坦言有時連補貨都有困難，試過無錢入貨。不過，我相信文具同科技係並行，以前有的文具只係用數碼的形式出現，電腦係桌上文具，手機都有計數機、Memo ，只係用咗另一個形式出現，所以我亦真心希望  Jerry 可以搵到佢自己同這個行業的新出路。

▲ 產自30年代的東歐，這部毫不起眼的計算機，能計算上9位數字呢！

 

15種文具 新舊版設計大不同

相信大家用文具最多的時間，應該離不開讀書時期。由機關筆盒、SPI 書包到無印筆，只要班上某一部份人用一款文具，大家都會跟風去用。經歷一波又一波的潮流後，今日我再次走訪文具鋪，發覺大部份的文具都改變了設計，以迎合時代的改變。

1) 鉛筆

以前嚟講，幾蚊一盒係的中華牌鉛筆基本上係每個小朋友必備的文具，相比起色彩繽紛的卡通鉛筆，夠深色之餘又唔會成日斷，好多媽媽都會買比小朋友用。不過，雖然依家一樣有中華牌鉛筆賣，但跟據銀の文房具的鍾燕齊所講，依家的幼稚園同小學生多數用某牌子的三角形鉛筆，一來係學校規定，二來係三角形更乎合人體工學，變相六角形的中華牌鉛筆或是圓形的卡通鉛筆，呢代的小朋友都愈來愈少見了。

▲ 鉛筆的形狀係過去咁多年都無大分別，不過係鉛筆上的字體都隨住人的品味而改變。

 

▲ 有趣的事，細個經常用的中華牌鉛筆大多都係 HB ，但鍾燕齊講，原來 6歲以下小朋友係唔應該用 HB鉛筆，但香港就好少人了解，而小朋友應該用的是較短的  B 同 2B 速寫筆。

▲ 小時候日常用的多數係中華牌鉛筆，不過亦會儲好多卡通鉛筆，結果儲埋成盒都唔捨得用。

▲ 至於現在的小朋友，大多都因為學校規定，都用了某牌子的三角形鉛筆，好似已經無咗揀文具的樂趣。

2) 筆刨

有鉛筆當然有筆刨。就算屋企有個電動筆刨可以刨得幾快、幾尖，但筆袋點得以放一個細細粒蜻蜓牌雙孔刨，以防唔小心跌咗支筆落地斷芯。不過自從改用鉛芯筆之後都好少會用了。

▲ 以前老師送的小禮物好多時都係飛機型或果凍型筆刨，雖然係好得意，不過就成日刨斷筆。今日去睇幾間文具鋪都沒有了，得番印有卡通公仔的筆刨，如果想搵番，大概要係深水埗條玩具街先有得賣了。

▲ 考試的時候除咗刨定成打筆，筆袋點都要有一個蜻蜓牌雙孔刨，萬一 D 筆跌斷晒都可以即刻刨。

 

 

 

▲ 係屋企就點都要有個手動/電動筆刨，可以刨得又快又尖。

▲ 依家的小朋友多數用電動筆刨，放入去太耐隨時無咗半支筆。

 

 

3) 鉛芯筆

記得細個人人都仲用緊鉛筆，而自己有支唔駛刨的鉛芯筆的時候，感覺好威。無論係一粒粒換的換芯筆，或是係頂頭按掣的鉛芯筆，甚至係則邊按掣的鉛芯筆，對於唔同的設計，都係希望長時間有尖的頭，靈活應付考試之餘，唔駛下下帶成打鉛筆番學。

▲ 呢款短短地的換芯筆細個果陣覺得好好揸手。

 

▲ 以前都用過類似的鉛芯筆，記得佢筆咀成日都塞，要用鉛芯慢慢通番，搞到成手黑晒，依家個樣差唔多，不過就改良咗唔少。

▲ 依家的鉛芯筆甚至進化到，雖然用 0.5 芯，但寫出嚟係幼過 0.5，因為佢設計到鉛芯同紙的角度只有 0.28，亦因為要維持呢個角度，所以每按 40下，鉛芯就會轉一圈，令書寫更流暢。

4) 鉛芯

至於鉛芯筆入面的鉛芯外表無乜點變，不過其實都演進緊，銀の文房具的鍾燕齊就表示依家的鉛芯用咗納米技術，無咁易斷之餘，又安全咗，以前支筆跌落地入面 D 芯會斷晒，但依家因為納米技術就唔會。

▲ 喜愛儲舊物、Journalize 文簿具社 的 Jerry 就覺得以前的鉛芯包裝更有美感，單單是 Staedtler 的 logo 就已經簡化了不少。

▲ 以前的包裝會用木盒，而係鉛芯尾加個套，等你拎的時候唔會整污穢隻手，相當講究。

▲ 粗的鉛芯我呢 D 90後就比較少見，而一盒盒幼的鉛芯就經常用。記得以前 D 男同學都好少帶鉛芯，用番就會問女同學借呢！

5) 原子筆

差唔多到中學，大家都轉用原子筆。難得揀咗支好寫的，最怕就係一跌就斷墨，又要報廢。

▲ 銀の文房具的鍾燕齊就表示原子筆係百幾二百年外型上無點變，變的只有入面的走珠同水，大部份都係睇唔到，所以就算依家的文具鋪見到的原子筆用以前的都無乜分別。

▲ 不過以前就好鍾意用針筒原子筆扮打針啦！今次行的文具鋪雖然唔見有，但係淘寶我見仲有得賣呢！

▲ 除咗單色的原子筆，仲有多色原子筆架！其實都唔係好明，12色筆咁粗、唔好揸，又唔係隻隻色都會成日用，但以前就係覺得自己好威。

▲ 至於依家的原子筆都有多色的，而當中的芯咩色都可以自己配，比較著重功能性。

6) 彩色水筆

原子筆就係平時寫字用，要揀寫得順，又好揸的，但彩色的啫喱筆就唔同了，每次興一款筆，個個都抱住人有我有的心態，買完番又唔捨得用。唔知大家又試過為咗儲以下的筆，有幾多日無食過零食呢？

▲ 記得以前為咗呢套斑馬牌香味啫喱筆無食幾多餐飯，難得儲齊又唔捨得用，只係得閒打開嚟閒下陣味！直到畢業要寫紀念冊先捨得拎出嚟寫呢！仲要係最好的朋友先會用呢 D 筆寫啊！

▲ 而同香味筆差唔多同期的就係閃粉筆，記得以前成日畫係手扮紋身架！上一兩年呢類筆又興番，我都淘咗一盒，用嚟扮文青，整黑色的即影即有相簿呢！

▲ 變化筆又係一個經典，雖然畫係白紙上真係唔多出色，不過就係鍾意拎上手亂咁畫，次次都唔同色，好好玩。

 

7) 擦膠

擦膠咁多年基本上都無變過，不過好多人以前消失咗的砂膠，原來仲有得賣，我就係明儀文具玩具公司見到啦！

▲ 用咗原子筆之後，基本上擦膠都無乜用，上堂無聊就係鍾意用鉛芯筆將佢雕花，之後用螢光筆油幾油當印仔蓋。

▲  由用鉛芯筆轉用原子筆的時候，最唔慣就係寫錯咗又改唔到，所以就會用砂膠大大力咁擦，結果未成日搞到 D 功課一個個窿，俾老師鬧囉！

▲ 記得有一段時間興過擦膠筆，上堂無聊就會襟晒條擦膠出嚟又又放番入去，超級無聊！不過大咗就覺得佢擦得始終無黑色擦膠乾淨，之後都無再用了。

▲ 擦膠唔一定正正經經咁嘅樣，呢 D 食物擦膠可以拆又砌番埋，可以話係我細個的珍藏，可惜後來有次打開個鐵盒，發覺好多細細隻昆蟲走出嚟，之前丟晒。依家係 Log-on 或者吉之島 $12 店都仲有得賣，而且多好多款添！

8) 塗改液

相比起砂膠，塗改液偉大的發明，寫錯字用佢塗上面就得，唔怕整爛張紙。不過就成日心急唔得佢乾就繼續寫，搞到手指尾側面白晒，支筆仲塞埋添！

▲ 呢款要自己稀釋的塗改液連我都未用過，不過就應該係唔少 80後的回憶。雖然依家批發商都仲有得賣，不過文具鋪已經好少入貨，有的都係賣剩的了。

▲至於呢幾款 Pentel 的塗改液，相信由 90年代到依家每個中學生必備文具吧！

▲ 塗改液最大的缺點就係要等佢乾，對於心急的我就選擇咗用塗改帶，不過以前的塗改帶無依家咁好，唔小心一跌就會散晒，最後因快就慢，要用成堂時間捲番條帶不得止，仲未必整得啱方向，成日 click 帶。

9) 筆盒

細個果陣最鍾意用卡通筆盒，搖的時候入面 D 筆桑桑聲超好聽。到咗中學時期大部份人都轉用筆袋，貪佢夠輕身。不過我個筆袋反而仲重咗，鉛芯筆、擦膠、原子筆、塗改液、塗改帶、鉛芯、間尺、鉸剪、memo紙、量角器…乜都放晒入去，仲重過依家個化裝袋。

 

▲ 筆盒原來係好多年前已經有，Journalize 文簿具社 的 Jerry 就表示 30年代的歐洲人多數用黃銅筆盒，簡簡單單又唔花巧，可以用成世咁話！

 

▲ 後期黃銅因為貴，筆盒的材料都改咗用鐵做，而上面就多咗好多唔同設計。

▲ 講到筆盒，應該無 90後唔記得機關筆盒，只要襟筆盒旁邊的幾個掣就會彈出筆刨、暗格等等。插晒 D 鉛筆入去，再升高佢就可以發射導彈了。

10) 間尺

成日聽日話曳會俾老師用間尺打手板，幸好我身處的年代已經無體罰，而間尺亦由鐵尺變成膠間尺，仲有好多花款，可以劃公仔添！

 

▲ 呢 D 入面有窿俾你跟住畫的間尺仲有得賣，不過可以整出嚟當鎗或者雙節棍用的摺尺就好似唔見有得賣了。

▲ 呢款間尺中間有個公仔會爬上爬落，好似係一 set 連埋筆筒、鉛筆咁賣架！

▲ 至於入面有三個齒輪的萬花尺應該大家都玩過，原來 70年代的包裝係咁嘅。

▲ 雖然依家都有萬花尺，不過就變咗韓文字的包裝了。

11) 水彩

用文具用得最多的堂應該非 VA 或 DT 莫屬。記得中一開學第一日就會派張 list 要你去買齊 D 畫具同工具，有財力的屋企通常都會買多過 list 的要求。就好似人人都用緊條 6色的水彩，就總會有會同學係用 12色一樣，令人羡慕。

▲ 買得少顏色通常都要自己溝色，最怕就係唔小心將支白色掂到其他色，結果變到灰灰白白，又要買過支。

▲ Log-on 最近有個文具展就展示咗新的文具，而呢款就打破平時的水彩個蓋都會顯示咗係咩色，以三原色的混合原理，表達水彩的顏色，十分特別。

12) 木顏色

除咗水彩，木顏色都係經常用的畫具，由以前的紙盒包裝，慢慢變成用鐵盒，不過封面一樣係色彩繽紛。

▲ 70-80年代的木顏色包裝都係有大眼女仔做封面呢！

▲ 依家的木顏色都改用鐵盒裝，上面都係卡通公仔。

13) 簿

簿方面，依家學校都會自己印有校徽做封面的簿，文具店賣的厚皮簿、單行簿都愈來愈少人用了。

 

▲ 平時用的單行簿都係學校買，已經愈來愈少人接觸呢款簿了。

▲ 唔好話依家的學生，我都只係讀會計的時候用過一本厚皮簿咁多咋！

▲ Copy book 都放到好陳舊了。

 

14) 釘書機

近呢幾年多咗人用無釘釘書機，不過普通釘書機仍然係一樣不可缺少的工具。

▲ 有一段時間，迷你釘書機係好多公司的紀念品首選，我都拎咗唔少番屋企。

▲ 至於無釘釘書機近呢幾年流入香港，甚至發展到唔洗整穿張紙都釘到。

 

15) 書包

每年開學之前都會買一個新書包，記得小學自己第一書包係小丸子的布書包，果陣仲好開心，諗住終於有得揀，點知一個星期都無，老師就派咗集體訂購 SPI護脊書包的表單。面對大部份同學都有一個，總係會羨慕別人，想跟下風。

▲ 其實依家諗番起，都覺得個書包幾樣衰，但果陣個個都有，又真係好想有一個。

 

▲ 至於依家最 hit 當然係小丸子都孭的硬皮書包啦！好多媽媽特登去日本搶購架！