hi-fi 世界好多「心理」補品，原本無作用但被店主吹到天上有地下無，新手又覺得似曾曾就會破費。這幾年間 Hi-Res 音樂盛行，又爆發一論 DSD 格式係咪靚聲之戰，不過多年來討論得最多都係數碼音樂，中間得 1 同 0，靚線靚機係咪真係有用 ? 天恩在這裡有少少個人分享

數碼 1 同 0 ，有需要用貴野嗎?

其實到左 Hi-Res 年代，乜都講數碼，買碟反為仲麻煩直接去買 Digitial Format 好過。現時大大小小的 CAS 設備都離不開使用 USB 作傳輸媒界，可是天恩覺得 USB 實在太多干擾，尤其手機呢類 GSM 又 Wi-fi 的信號干擾同大，攪到 D 聲好硬好無音樂感。所以自己有啲好無謂的堅持，一就係唔用電話聽歌，連 DAC 都唔會用佢入；第二就係堅持唔用 USB 直入 DAC ，但係呢個年代開始好少 Player 有同軸輸出，光纖我都覺得聲唔太啱口味。當然你會話 3 皮野買部 Player 一部 KO 攪掂唔使煩，但老實我聽過唔敢話佢唔夠抽，但對比起 Chord Hugo 出黎 D 聲，Hugo 啱自己口味多D 。

數碼轉數碼?

最近迷上左一樣叫 DDC 的野，Digital to Digital Convertor ，可能科技派會覺得數碼 1 同 0 ，你點換線攪咁多野咪又係 1 同 0 ，unwire 唔好導人迷信 ! 我都想事實如此可以慳番唔少錢，係電子世界唔係 1 同 0 咁簡單。原本個音樂 File 係就係得出 1 同 0 ，但你本身做唔好屏障，會跟隨好多微弱的電波訊號走入去解碼度，尤其係手機,比多左一 D 本來唔存在的垃圾比你。

同一 DAC，加個 DDC 兩個世界

個人聽 Hi Fi 好睇重 Source ，因為你後面果 Part 耳機點靚解碼點靚，前面唔靚的話就 Bye bye ，浪費晒 D 錢。所以就算 budget 唔夠，你都要在 Source 部份先投資，反為耳機可以跟隨自己的口味慢慢去調節。DDC 雖然係數碼轉數碼，以剛入手呢部藍色機仔做例子，佢主要結構係兩邊獨立線路， 隔開左 USB 入黎多餘的垃圾干擾，再掉過去轉換成同軸比 DAC 。

究竟效果係點 ? 同事艾域寫開呢d 野，佢都試過聽得出聲音變化，而且比佢想像中大。如果要我形容使用後的改變，就是「順耳」「耐聽」「感情」，不過有一些有微少的 detail 還是原本的接駁法比較保留得好。Hi-Fi 野不嬲都「多隻香爐多隻鬼」，detail 經多一重就少一重，所以你要取捨，少左少少 detail 換唔換到你想要的嘢返黎。所以 Hifi 野乜都好，耳聽為實，一大堆技術聽落好勁，但最尾 outcome 可能唔啱你聽。

隨身器材利申 :
Source : iMac /  Pioneer XDP-100R (USB OUT Mode only)
USB Cable : wireworld Ultraviolet 7
Coaxial Cable : micromega
DDC: audiophilleo AP1
DAC : Chord Hugo
EarPhone :EarSonic S-EM9
Earfit : Spinfit