係今日上映既《職業特工隊：叛逆帝國》，相信好多人對呢套系列電影都唔陌生，黎到第五部仍舊同上集係無乜連繫的，不過小編仍然會推薦各位讀者睇。想知點解？就緊係要留意以下既影評！

故事平平無奇 勝在無支線夠清晰

今次第五部講既就係 IMF 受到 Syndicate 「組織」既威脅，佢地就好似「Anti-IMF」咁，無處不在，無從攻破。 Ethan (Tom Curise演) 不斷去追尋關於「組織」既消息，即使係 IMF 被國會解散以 CIA 取以代之後…… 成個故事線由頭帶到落尾非常簡單清晰，觀眾並唔會覺得好難 follow ，對於睇電影係純娛樂性質既讀者可能係好事，可惜正正因為故事線得一個而又無其他特別元素，難免令人覺得失望。老實講句，唔係睇 Tom Curise 唔係睇特效，淨睇劇情小編睇預告都夠。

打鬥場面豐富 睇足兩個鐘值回票價

咁既然係咁點解仲要推薦？皆因入場觀眾一早知，根本唔係為故事情節，而係個啲刺激既打鬥場面。小編有睇過上一部《鬼影約章》，而今次《叛逆帝國》的確會更多動作畫面更震撼。 Ethan 經常要同唔同既「組織」特工對手，會係唔同既場景打鬥，有「組織」基地﹑ 歌劇院﹑ 倫敦街頭等等，係視覺上的確係加翻唔少分的。而且好多特效場面，而且夠逼真（聽聞 Tom Curise 捉住飛機門外個幕親身上陣），單單係睇呢啲都夠值回票價。

緊張幽默互換 氣氛節奏拿挰精準

成套電影足足兩個鐘，如果一直 keep 住緊張氣氛對觀眾黎講都幾攰，所以中間有唔少既幽默位比觀眾笑下；而小編覺得今次《叛逆帝國》終於係兩者之間攞到一個好好既平衡，既唔破壞之後既緊張刺激畫面，亦可以有一啲輕鬆笑位帶到比觀眾。再者，音效對成個緊張氛圍可以話加分唔少，尤其係歌劇院中邊做歌劇邊打鬥，以及倫敦街頭準備打鬥前無聲既屏氣凝神，兩者同成個氣氛都好夾，出黎效果的確唔錯。

Billy：「只要摒除劇情 一切都很好」

對於睇慣睇熟既小編黎講，睇足咁多部都係只要咪理劇情，純計音效特效打鬥呢啲視覺同聽覺上既享受，已經係「抵到爛」。雖然一貫過往作風，不過今次唔囉嗦一開場就已經有精彩既 Tom 佬捉住飛機，之後故事都唔拖泥帶水，雖然同過往片長差唔多，但感覺打鬥同電腦特效既場面豐富左好多，捉得實觀眾想要睇既野，抵 Mission Impossible 開足咁多部！