Sanrio 迷呢幾個月應該都大出血啦！九展既 Sanrio Game Master 8月 6號先開，依家有話 10月 4 號有個 Sanrio 家族全能運動會係亞洲國際博覽館舉行。除左可以同心愛既卡通人物一齊做運動，仲有個好豐富既紀念包拎走。活動已經開始左網上報名啦，身為 Sanrio 迷唔係唔去呢個盛事掛？

 

7 大運動關卡

講得運動會，當然唔止得 D 裝飾俾你影相咁少兒科。係超過 35 萬平方呎既展區內會有 7個戶外及戶內運動項目包括路跑、充氣障礙、充氣競技、球類活動等等，到時仲有 6 個 Sanrio 家族成員，包括：Hello Kitty、Dear Daniel、XO、My Melody、Little Twin Stars 同埋 布甸狗 同大家一齊玩。但點解係 7個分區，得 6個家族成員呢？睇嚟應該係蛋黃哥覺得運動唔岩佢，所以無出賽啦！

1. Sanrio Magic Run

整個運動會既重點就係全程 1.8公里既歡樂跑，途中有唔同既家族成員係三個特色區域等緊你。只要圍繞亞洲國際博覽館跑一圈，就可以得到紀念獎牌作鼓勵。

 

2. Hello Kitty 長氣全能賽

為考驗各位 Hello Kitty 迷既鬥志，佢準備左一個長 40米，闊 12米既超長充氣障礙關卡俾大家挑戰。想見 Kitty 一面就要做出攀爬、攔截、閃避、穿越等高難道動作，盡顯自己既誠意啦！

 

3. My Melody 迷魂陣

My Melody 就設計左一個約 2500平方呎既巨型迷宮等大家同佢捉迷藏。邊個最快搵到出口就可以得到紀念禮品啦！

4. Little Twin Stars 彩虹飛行

成日望住 Little Twin Stars 兩個係雲間穿梭得咁開心，今次佢地就準備左一條長約 9米既充氣飛行競技滑道同大家一齊飛。

 

5. PomPomPurin 布甸平衡床

有無幻夢過可以係布甸狗既大肚腩度跳呢？今次佢就化身成長26米，闊10米既彈床，俾大家跳番夠本！

 

6. Bad Badtz-Maru X ’噢’！入樽王

XO 一直渴望能夠像 NBA球員一樣，可以一跳入籃。今次佢就特製左充氣籃球架，讓各位都可以輕輕鬆鬆一嚐入樽既滋味。

 

 

7. Dear Daniel 足智賽

Dear Daniel 既腳法你可以未見識過，今次佢就以不同既守門員造型把守龍門，如果你都仲可以入到波既，佢就會送番份紀念品俾你！

 

運動員紀念禮品包

雖然報名費有 D 貴，要成 $680 ，不過每個運動員都可以得到一個豐富既禮品包，入面有紀念版Tee、號碼布、掛頸繩、紋身貼紙、頭帶、耳筒、水壺、鞋袋及儲物腰帶等。為左各運動員可以做足準備，活動日前一星期就可以拎啦！

▲ 紀念包有成 9樣野，咁計番入場費都唔會太令人卻步既。

▲ 紀念包係用紙盒裝，夠晒硬淨，平時可以用嚟裝野都得！

 

▲ 鞋袋印有 Sanrio 咁多個卡通角色，只係睇設計圖都覺得靚。

▲ 紀念 Tee 係用速乾質料製造，通風透汗，咁做運動做到幾大汗都唔怕啦，而且 XXXS 到 XXXL 都有，包你岩 size！

▲ 做運動出得汗多，自然要補充下水份。紀念包就有埋水樽俾大家，非常貼心。