唔知有冇朋友都同我一樣，成長經歷隨住屋企有的電器而改變呢？小妹掹車邊都算係個九十後，屋企唔算富裕，屋企人亦唔特別吹捧玩什麼環迴立體聲、追求高畫質等等，所以由細到大，屋企主要都只係得部電視係主要娛樂。其實諗返轉頭咁多年，自己的娛樂習慣除左有部電視，原來仲有好多電器，哈哈！

卡式帶年代

我好記得讀幼稚園個陣，學校每個學期有個音樂「考試」，其實即係唱歌仔，我地圍圈圈上堂，跟住每個同學輪流係中間獨唱。老師彈琴，我地攞住支咪，駁住架錄音機，走晒音咁唱「鵝悶屎塊落滴耗耳痛」。學期完左，就會派返餅 cassette 帶返屋企，媽媽就會一路聽一路陰陰嘴笑，而我個時淨係想去公園玩同睇卡通片。

 

擺美少女戰士 POSE

讀幼稚園開始，電視已經幫我養成左一個良好的習慣，更加令我好早就學識睇時間，因為電視好準時播卡通片同埋放學 ICU 閃電傳真機，小小電視迷為左爭取準時坐定定係度睇電視，會好乖咁做好晒啲功課，訓埋晏覺差足電，準備好要變身打怪獸。個陣時的卡通片簡直就係風靡一個世代，睇返細個影個啲相，一隊隊美少女戰士棟係度，個個女仔都擺個「替月行道，儆惡懲奸」甫士，同而家cosplay有得揮。

^ 我5歲個陣，唔會問「大個住邊？」，但係會問「禮服幪面俠係邊？」

 

 

卡通片係小朋友的溝通橋梁

幼稚園養成的良好習慣繼續延伸去我的小學年代。好可惜，我小學個陣係讀下午班，5 點半先放學，返到屋企已經做完卡通片，跟手就播新聞，超級慘慘豬。夜晚冇卡通片，所以就好專心做好晒啲功課，雖然以前都有 10 幾樣，都一定唔會留過夜，第二朝雖然仲有時間補做，但因為會重！播！卡通片，我唔會俾自己錯失睇卡通片的機會囉 XD  第二朝好準時九點鐘開電視，睇晒重播閃電傳真機，仲有媽媽錄低的卡通片（係呀，媽媽對我好好，會用錄影機錄低一餅餅卡通片帶，俾我重睇），仲可以睇埋教育電視，先返學。

點解卡通片咁重要？其實同而家小朋友玩電話一樣啫，為左同同學傾計有話題，追潮流囉。後來，已經進化到睇電視劇，最難忘係《西遊記》定係《小寶與康熙》係會有一啲重重覆覆的台詞，例如：「yo！打妖精，使乜驚呀？／涼風有信，秋月無邊…」，經常係上堂嘅時候就會有人講，一講就會俾老師罰「UM」嘴，哈哈哈！以前「UM」嘴唔係因為咳或者打乞嚏，而係因為傾計。除左睇電視，個時最興係玩 GameBoy 同埋他媽哥池同埋 chok 數碼暴龍，但係學校唔會玩，亦冇聽過有人被沒收。以前好癲，有朋友係可以背到寵物小精靈圖鑑，至叻小人類仲會搞比賽叫小朋友挑戰。

^個人珍藏，以前淨係放假先準玩，但都可以打爆機，哈哈！

我的童年冇手提電話，冇電腦，搭車係入大餅，冇八達通，信係用筆手寫，同朋友玩係玩 007 入子彈同 123 紅綠燈，冇 whatsapp，冇 candy crush，但係好開心。

未講完，下個星期繼續。