今日Sony Moblie HK 舉辦 Xperia M5 Dual 和 C5 Ultra Dual 記者發佈會，而其中 C5 Ultra Dual 以6吋大螢幕和22mm 廣角＋LED 補光的自拍來進軍自拍手機市場，少女一定 like ！小編試過後覺得依部機買黎送俾女朋友岩晒！因為價錢適中，又唔會太肉赤，女朋友又唔會嫌Cheap。（不過都係嗰句，首先要有個女朋友先）。
6吋幼邊芒可單手操作
C5 Ultra Dual共推出三種顏色，分別是黑、白、綠，當中以閃銀綠最為突出，近似tiffany blue，應該好多女仔會鍾意。C5 Ultra Dual 的全高清 6 吋大螢幕邊框採用 Sony 稱之為極近無邊框的設計（即係超幼框囉），官方資料顯示螢幕邊框只有 0.8mm，小編我睇過，條邊真係接近無框，為C5 Ultra Dual 額外添加一陣日本機味道，兼且極幼邊框令身懷6 吋巨芒嘅C5 Ultra Dual闊度唔會太過份，單手操作我就勉強OK，女仔就未必得。
▲C5 Ultra Dual共推出三種顏色，分別是黑、白、綠。
▲極幼邊框令身懷6 吋巨芒嘅C5 Ultra Dual闊度唔會太過份，單手操作我就勉強OK，女仔就未必得。
單手模式縮至 4 – 5 吋
大芒的缺點就是單手難操控，雖然幼邊框有少許幫助，但正如我以上所講，女仔手就未必可以做到，因此Sony 就加入單手模式，可以將 6 吋畫面縮細，並唧埋一邊，手細嘅人即時可以輕鬆單手操作，縮左之後打打字就可以按到邊位鍵，方便好多。
▲加入單手模式，可以將6吋畫面縮細，並唧埋一邊，手細嘅人即時可以輕鬆單手操作
22mm 三人自拍都夠 wide
C5 Ultra Dual前鏡同後鏡都有1,300萬像素，自拍或者叫人幫你影都有超高細緻度。22mm廣角前鏡可以影到88度嘅廣角範圍，相比一般30mm前鏡手機只有72度廣角範圍，影到更大嘅範圍，唔洗用棍，以我目測，C5 Ultra Dual 喺一隻手嘅距離，至少可以俾 3 個人合照，加埋自拍神棍可以影到 4 – 5 個，無論係去旅行想同一大塊花田自拍定係同一大班朋友自拍都超輕鬆。
▲因為有 22m wide 的前鏡，就咁已經影到 2 個人，唔使迫埋一舊
自動 HDR / LED 補燈臉不會黑
光線不足嘅環境影相，有前置嘅LED閃光燈幫你打燈，補光範圍仲要比其他手機更大；另外，背光環境下自拍，前鏡都有HDR功能幫你拍下清?嘅自拍照，唔會淨係影到後面光位而搞到成個人黑晒。無論光定暗，都可以影到靚靚自拍。
▲背光環境下自拍，前鏡有HDR功能，唔洗開閃光燈都唔會成個人黑晒
▲呢 D VR 得意面具公仔，對女士們黎講就最殺食
▲C5 Ultra Dual的電源鍵、音量鍵、實體快門鍵都在機身的右側。
▲唔好以為部機咁大部，手細嘅女仔就好難自拍，C5 Ultra Dual有獨立快門鍵，就算機大自拍都好好揸手。
▲C5 Ultra Dual 前鏡試相，可見前鏡質素真係好好
▲Zoom大後每一條眼睫毛都清楚分明，下次有機會可以實測下依隻Mascara
▲光線不足嘅環境影相，有前置嘅LED閃光燈幫你打燈
▲前置閃光燈光度好足夠，以上兩圖可見喺陰暗環境有開同冇開前置閃光燈嘅分別
▲後鏡都有1,300萬像素，但只有25mm廣角效果，比前鏡少3mm。
▲後鏡雖然無同場 Xperia M5 Dual 嘅Hybird AF，但對焦速度亦唔差。
真・雙卡雙待 電池續航力成疑
支援中港 4G 雙卡雙待嘅 C5 Ultra Dual，Sim1、Sim2同SD卡都係完全獨立，市面上有啲機Sim2卡槽同SD卡槽共用，兩個只能活一個，C5 Ultra Dual 做到真正支援雙Sim卡。配置八核心1.7GHz 64-bit處理器，加上咁大個芒，而電池只有2930 mAh，以後出街記得帶尿袋。
▲市面上有啲機Sim2卡槽同SD卡槽共用，兩個只能活一個，而C5 Ultra Dual Sim1、Sim2同SD卡都係完全獨立，真正支援雙Sim卡。
總結：捉正女仔愛自拍 + 大芒心理
C5 Ultra Dual 兩鏡1,300萬像素＋6吋巨芒只賣三千頭，絕對係超值之選，前置鏡頭又夠wide又有補燈好明顯是為一眾愛自拍的用家而設，再加上大芒機女仔非常愛用，因為用來追劇。
但在日常打在地鐵想單手 whatsapp 的話，就有點難度，所以 Sony 用幼邊同單手模式黎解決問題，令本來 15 16 的女士們可以安心入手。
售價：$3,298
分享到 :
最新影片
