由於最近小妹轉左工，已經冇係數碼港返工喇（cry），而家我由呢個山區轉到去另一個山區工作，都係離屋企有啲距離，所以呢度要係咁易改一改個名喇… 數碼港的朋友，多謝你地一直照顧 ? 我會繼續係度寫文的，有睇開的朋友，歡迎繼續支持 ?
上個月咪同大家分享左我「戒毒」的心路歷程嘅，真係講你都唔信，我今個月就用爆左數據喇，直情自動脫毒一個星期。常言道，電同上網係人生基本需要，低過物理層架嘛，而家（截稿前）係呀部電話用左一日返到屋企仲有 80％ 電呀，但就好似俾人廢左武功咁，冇得上網，想 Call Uber 又唔得，想睇下架巴士幾時到都唔得，搞到成日送車尾。唉，都市人的煩惱呀！
我一向係用開 5GB LTE 的數據服務，享受高速上網，唔窒睇片，24 小時無間斷連線工作，隨時隨地有 Google 及 Facebook 大神的眷顧。而且，我就係知道 5 GB 其實唔係幾夠用，已經裝左個 Widget 可以成日睇住數據用量。點知今個月，由於公司 Wi-Fi 唔穩定（好似唔係 XD），用爆左，服務供應商就即刻 send 個 message 「提醒」你，再用就要收費架喇，跟手 cut 左數據，強制性脫毒。
開頭諗，其實都冇咩嘅，一日都係用少幾個鐘啫，平時都冇乜人搵我架啦，好似係。
果然！梅菲定律施展佢神奇的能力，偏偏就有好多人係呢個星期 whatsapp / LINE / FB Message / KakaoTalk 我，真係好日都唔見佢地搵我，硬係係我冇數據的時候先黎（其實我係開心嘅，只係唔好意思唔讀唔回啫～）。
返到屋企阿媽問，做咩唔覆我機？阿妹問，send 左去冰島旅行啲資料俾你呀，做咩唔睇？朋友 A 問，係咪睇戲架，係就買飛架喇？朋友 B 問，你係咪唔開心，定係 block 左我？老細問，你份野做好未？男朋友問：I love you! Stephanie BB, will you marry me?
我只係冇 DATA！如果啲野咁重要，又見我冇睇冇覆，點解唔打俾我？雖然我一日接嘅電話有 9 成都係騙案或推銷，但你都可以打黎講聲架嘛，我分得出係咪有人盜用你電話架！
我知，其實呢個世界仲有樣野叫做 Wi-Fi，仲周街都有添，但醒目的港女係唔會亂咁連線的，因為可以好容易連到線，冇加密的 Wi-Fi 好容易俾人 hack 到，萬一俾人睇到我張絕密大腸照咪死火！蝦蝦。
分享到 :
最新影片
