7月就快到，又係暑假的來臨！今年全身佈滿氣孔的海綿寶寶取代熊大的工作，嚟到海洋公園係夏水禮同大家玩濕身。今日我依莉詩就率先去咗玩啦！來吧！Let’s get wet！
濕身必玩怡慶坊大本營
今年其實同上年夏水禮差唔多，主要活動都係怡慶坊舉行，地方唔大，而且設施無乜新意，只係將 Line Friends 換成海綿寶寶。不過如果上年未玩過，又或者暑假打算約班 Friend 入海洋公園的話，都不失為一個好節目。
1) 濕身前做足熱身 －激光迷陣
係濕身之前，不如先做下熱身。進入漆黑的房間內，在激光中穿梭，以最好的新手、用最快的速度，按下發光按鈕。雖然個人賽要係限時 30秒內避開縱橫交錯的激光陣，按下多個按鈕都幾特別，而且好有新鮮感，不過既唔會濕身，又無海綿寶寶，好似同夏水禮無乜關係。相反，房間的冷氣都幾凍，如果玩到濕晒身先入去都幾易病。我玩完都打咗幾個乞痴。
▲ 要在激光中穿梭，真係無番咁上下身手都唔得。不過記住，如果濕晒身先嚟玩呢過，幾好身手都未必敵得過病魔啊！
相關文章:
Microsoft 夥拍動畫《海綿寶寶》 推出特別版 Xbox Series X 遊戲主機
2) 享受被泡泡包圍的感覺 － 珍寶肥皂泡工場
外國不時都有巨型泡泡表演，利害的仲可以同時用泡泡包住幾個人，睇到都好想試下被泡泡包圍的夢幻感覺呢！而今年夏水禮另一個新設施就係「珍寶肥皂泡工場」。只要企定定係中間，一拉手掣就可以自製巨型泡泡包圍自己。雖然泡泡範圍不算大只係包到一個人，但我無論慢慢拉，定係好快咁拉，泡泡好快就爆了。我睇要成功包住自己，應該需要很多耐性。
▲ 泡泡瞬間即逝的速度比起相機快門還要快，要成功捕捉真係超有難度！
3) 最原始的沖擊 － 超級巨沖
幾乎每個水上樂園最受歡迎又最原始的一定係水桶，係下面靜靜等待水桶注滿水，再好似瀑布咁一次過倒落個身到，果種衝擊同快感真係會愈玩愈過癮。而今年的「超級巨沖」旁邊仲放咗海綿寶寶同派大星，小心影影下 selfie 被照頭淋啊！
▲ 雖然呢個水桶的規模同水上樂園相差一大截，不過已經算係夏水禮入面最刺激的遊戲。
4) 狂浸泡泡浴 － 泡泡狂熱
另一個上年受歡迎，今年仍然有的就係「泡泡狂熱」。係強勁音樂節拍和動感燈光下玩泡泡池，令人心情都興奮起來。不過泡泡要少到某一個程度先會再落泡，所以想有被泡泡包圍的感覺就要睇彩數啦！
5) 純粹為濕而濕 － 幻彩噴泉陣
呢個七彩的噴水其實無乜特別，純粹為濕而濕，不過小朋友就好鍾意玩啦！
相關文章:
Microsoft 夥拍動畫《海綿寶寶》 推出特別版 Xbox Series X 遊戲主機
6) 水戰大激鬥
上年必玩的射水彈今年繼續！不怕神一般的對手，遇著高技術敵人避得切都未必會濕，但只怕豬一般的隊友，事關水彈射唔出去隨時自爆，就一定濕晒。所以係度俾個 tips 大家，一上好水彈就好立即微微向上拉，唔係個水彈碌咗落地就會砰一聲了。
夏日童樂手作坊
濕完身，小朋友可以到威威天地以 $50-90 ，參加「夏日童樂手作坊」，同輕黏土製作獨一無二的海綿寶寶鎖匙扣。因為大部份組件都可以用模具整出嚟，所以唔會走樣走得去邊，所以整要都幾有成功感架！
▲ 除咗海綿寶寶，仲有派大星揀架！
▲ 威威天地的遊戲攤位就有海綿寶寶同派大星毛公仔仲獎品，我就覺得中間的掟波最易玩。掟咗兩籃波，中咗一個細獎一個珍寶獎啊！
▲ 彩繪方面，當然唔少得加咗海綿寶寶圖案比大家揀啦！
海綿寶寶主題美食
而園內多間餐廳同小食亭亦換上海綿寶寶主題的繽紛佈置，同推出多款賣相精美的海綿寶寶主題素食菜式，不但健康清新，同時滿足相機和肚皮。
▲ 海綿寶寶奇幻歷險美食套餐 $198 元
▲ 香芒三重奏、咖啡朱古力布甸、木糠布甸、楊枝甘露布甸 $35/each
▲ 海綿寶寶芒果慕絲蛋糕 $358/2lb
相關文章:
Microsoft 夥拍動畫《海綿寶寶》 推出特別版 Xbox Series X 遊戲主機
依莉詩：「無咗滑梯似小朋友樂園」
坦白講，今年夏水禮其實同上年差唔多，只係將 Line Friends 換成海綿寶寶，設施上不但無乜新意，連刺激的滑水梯同好玩的水韆鞦都無埋，換來的激光迷陣同肥皂泡工場與夏水禮又好似無乜大關係。不過如果上年未玩過，又或者暑假打算約班 Friend 入海洋公園的話，都不失為一個好節目。但都想提提大家，根據上年的經驗 (因為今日更衣室未有開放) ，更衣室非常簡陋，而且臨時儲物都比較貴，所以我會建議大家先到海洋公園正門入口的洗手間換衫後，再到對面的儲物櫃租 locker，容量比較大之餘，可以多次存取啊！
海洋公園夏水禮
日期：2016年 7月1日 至 8月28日
地點：海洋公園 (3923 2323)
相關影片:
相關文章:
Microsoft 夥拍動畫《海綿寶寶》 推出特別版 Xbox Series X 遊戲主機
分享到 :
最新影片
