LG o岩o岩出左部投影手機 GW825v，令好多人提番起上年 N 記出果部投影 DC S1000pj。係喎，唔知呢部機而家點呢？等我落場睇下先！問過幾個 DC 舖老闆，原來晨早冇賣，再去白蘆薈望下，都已經賣緊陳列機，準備收爐唔賣。
其實部 S1000pj o係上年 8 月出，而家停產都算正常，問題係佢o岩o岩出果陣，已經係個個 DC 舖老闆都話唔賣得，D 客連問都唔問。好彩果時多數舖只係入住一、兩部睇下反應先，擺一排都總算走到貨，但入多幾部果 D 就慘啦，後尾要鑑平鑑賤咁賣，但都未必有人吼，真係一「鶴」眼淚架！
邊 D 舖咁講，就唔好開名啦，費事影響佢o地同 N 記o既關係，但大家諗下有冇見過人o係街用呢部機，都知班老闆講o既o野唔會假得去邊。佢o地更狠o既評語仲有「多X魚」、「呢D花臣o野，引到人望o下囉，唔會有人買」、「冇o野搵o野o黎搞」……對牌子或人作人身攻擊o個D，係度就無謂引述啦！
S1000pj 初出定價係 $3,980，而家 GW825v 賣幾錢話？嘩！$4,980 喎！佢話晒只係一部手機，多個投影機用o黎做 Present，係比較合理o既，咁祝 LG 好運啦！
白蘆薈賣 S1000pj 陳列機，開價 $2,590，但其實有 D DC 舖o既全新行貨只賣 $2,780，佢部機俾咁多人輪過，你制唔制先！
LG GW825v，祝你好運啦！
