自拍幾乎是今年入門「無反」必備功能，所以 Olympus 今日發佈的 E-PL7 也具備「反芒」設計，介面更針對自拍而設，想知佢自拍有幾方便就要留意「小編 試」。（以下有更多資料）
向下反芒 自拍更順手！
PEN Lite (E-PL) 向來印象都是平機，小編 起初以為 E-PL7 純粹是 E-M10 平價版，因為佢個樣同 E-PL6 很似，但兩機分別是屏幕，除了可揭起 80 度取景，還可向下反 180 度自拍。雖然向下反設計感覺奇怪，但實際拍攝時角度反而更易遷就，唯一缺點是用腳架或自拍棒屏幕會被檔住。
▲ E-PL7 擁有「反芒」設計，可向下 180 度方便自拍。
▲ 向下反的唯一缺點是用腳架會檔住屏幕。
自拍 Touch 個芒就得
相機自拍最煩是每次都要按快門，而 E-PL7 最體貼是屏幕可變成快門鍵。每當屏幕反至 180 度後，畫面底部會有 3 個熱鍵，除了快門及美顏，還有一個新增的「自訂 Timer」，它的用途是自訂時間進行每秒拍攝，自拍時未準備好都有多幾張緩衝，不用重再新拍過。
▲ 相機自拍好煩？用 E-PL7 「掂」下個芒就得。
▲ 屏幕反至 180 度時，畫面底部會多了 3 個熱鍵。
玩「部分取色」 唔洗再 PS
當然相機唔可能齋玩自拍，因此 E-PL7 今次再加 2 款 Art Filter，第一款是「復古」讓大家不用任何後製都就拍攝懷舊菲林味道。第二款是「部分取色」，唔知係咩來？相信大家都會睇過一些全張黑白只有主體有顏色的相片，以前可能要用 PhotoShop 慢慢執，現在用 Art Filter 就可隨意選擇相片僅顯示那種顏色，真正「撥個輪」就搞掂。（點解我部 E-M10 冇的？）
▲ 「復古」讓相片變得好像 70-80 年代菲林相片味道。
▲ 「部分取色」會彈出介面讓用家選擇想要的顏色。
▲ 小編 選用 「部分取色」紅色後，拍攝芝士蛋糕就只剩下士多啤梨有顏色。
WiFi 遙控可拍片、加 Art Filter
Olympus 相機的 WiFi 功能都介紹過好幾次，但 E-PL7 就可配合新版 Olympus Image Share，新版加入遙控拍片及 Art Filter 兩項新功能，前者每次只能拍攝十幾秒短片作用不大，但後者可完全操作 Art Filter 令遙控影相功能更完美。
▲ 新版 OI Share 新增 Art Filter 拍攝模式。
▲ 期待很久的遙控拍片功能終於都有，但暫時每次只限拍十數秒作用不大。
反應比 E-M10 慢少少、ISO 3200 仍很滑
這次 E-PL7 規格會跟 E-M10 很接近，除了外殼分別，E-M10 還欠新的 Art Filter（小編 作為 E-M10 用家表示遺憾）。不過，實際使用 E-PL7 介面反應感覺比 E-M10 慢少少，加上不設雙轉盤，改 Setting 自然冇咁爽。拍攝方面，E-PL7 對焦反應跟 E-M10 差不多，而且 ISO 表現都很接近，可用範圍都是 ISO 3200 – ISO 6400 左右。
▲ ISO 測試原圖
▲ 左 ISO 3200 ；右 ISO 6400
▲ 左 ISO 12,800 ；右 ISO 25,600
▲ ISO 400 / F5.6 / 1/1250s。
小編 評：自拍方便、新 Filter 好玩！
E-PL7 配備 E-M10 規格，而且機身又有 180 度「反芒」及新 Art Filter 功能，如果純玩小編 都會選 E-PL7。不過 E-PL7 缺點是零售只限 Kit 套裝選擇，最平依然跟 14-42mm II R 鏡頭，而新款「電動 Zoom」14-42mm EZ 套裝就只限網上店發售。
售價：
$4,990（跟 14-42mm IIR 鏡頭）
$5,990（跟 14-42mm EZ 鏡頭）
$6,990（跟 14-42mm EZ + 14-150mm 鏡頭）
查詢：Olympus（2376 2150）
分享到 :
最新影片
