Edward 作為 unwire 編輯，經常也要出去搵料搵新機做 review 俾各位 unwire 讀者睇，所以都唔算是坐定定在 office 工作的人。而近年隨住 tablet 熒幕解像度突破 2K，比做野主力機 MBA 的解像度仲要高，所以用 tablet 打稿的時間仲多過用電腦，因此之前就入手了一部 iPad Air 2。點知 Google 的 Nexus 9 又殺到來，同事拿番公司覺得好鬼吸引。究竟兩部機點揀？就等我同大家分享一下啦。
Nexus 9 更好揸手
作為一部出去做野用的主力機，手感自然最為重要啦！所以先比較一下 Nexus 9 的手感相比 iPad Air 2，究竟有無令 Edward 我變心的感覺。講真，單睇 spec，Nexus 9 同 iPad Air 2 比較，前者熒幕比較細，當然機身都較窄（iPad Air 2：196.5mm；Nexus 9：153.7mm），單手拿住 Nexus 9 無論點拎都比較好揸手。
另外，Nexus 9 機邊採用了斜面設計，切合手掌弧形位的人體工學，而且厚度適中（7.9mm），拿上手十分舒服；相比 iPad Air 2 採用圓形設計，本來是不錯的，但因為機身太薄（6.1mm）令拿在手上的感覺很不實在，長時間拿會有點辛苦。所以在手感上，Nexus 9 是比較好的。
▲Nexus 9 用單手拿住雖然有 DD 重，但都算可能接受，而且適的的厚度加上機身設計，手感幾好。
▲相反 iPad Air 2 雖然好處是十分薄，但敗筆就在於太薄，雖然機身重量分佈得都算平均，但單手拿得耐始終都比較累。
iPad Air 2 整體感覺較高貴
既然成日都要帶出帶入做野，Edward 就驚就當然係刮花部機啦，偏偏我就唔太鐘意用保護殼，因為一來唔想加重部機的重量，二來鐘意「裸機」個種摸到真機機背個種實在感覺。仲記得上代 Nexus 7 的機背，雖然軟軟地但就好易黏上指紋，令小編用了個零月就頂唔順換機；今代改由 HTC 代工，Nexus 9 雖然仍然採用塑膠外殼，但就解決了易黏指紋的問題，令小編十分歡喜。而與 iPad Air 2 的金屬外殼相比，兩機機背都採用了霧面設計，相對來講，Nexus 9 因為採用膠殼，反而不太易被刮花。不過 iPad Air 2 的金屬機殼，睇落就靚點而且高貴一點，但就相對易刮花一點。呢部分，小編就真係唔識比高低啦，大家按自己喜好揀啦。（小編比較膚淺，鐘意高貴的感覺，所以呢部分比較鐘意 iPad Air 2！lol）
▲Nexus 9 採用膠殼，比較無咁易花；而且今代霧面膠殼都無上代 Nexus 7 咁易附上指紋。
▲至於 iPad Air 2，機背用金屬殼，觀感就比較高貴，不過就比較易刮花囉。
相關文章:
【教學】iOS 18.1 如何用 Apple Intelligence 只需 2 個設定 + 香港免 VPN 也可用 M4 MacBook Pro 開箱影片流出 3 個 USB-C + 標準 16 GB RAM + 跑分結果 【教學】iOS 18 延長電池壽命幫到手 一個設定保養電池
熒幕色準：iPad Air 2 色較準確•Nexus 9 少許偏黃
之前提過 Edward 曾經打算用 Nexus 7 出街做野用，主要貪佢夠輕唔洗咁重負擔，不過問題在於它的 16：9 比例熒幕，打直睇網頁或文件的時候，左右兩邊未必夠闊出曬所有內容；而打橫睇的時候，上下又太短，要撥十幾次先至睇得完。今次 Nexus 9 令小編鐘意的一點，就係好似 iPad Air 2 咁，改用番 4：3 比例熒幕，而且熒幕解像度完全相同（2,048 x 1,536），但就細了接近 1 吋（iPad Air 2：9.7 吋；Nexus 9：8.9 吋），令處理文書工作、甚或睇網頁、文件、電子書、雜誌、甚至用布卡 APP 睇漫畫，都比較舒服（因為一般雜誌、電子書、漫畫等的頁面長闊比例都是 4：3）。
▲Nexus 9 改用 4：3 比例熒幕，下載布卡漫畫 HD 用來睇漫畫，一流！
▲睇網頁，都係 4：3 感覺更好。
至於熒幕色準方面，Edward 用過兩代 Nexus 平板（Nexus 7 2012 及 2013 版本），感覺都有偏色的問題（Nexus 7 偏冷色一點），而到今代 Nexus 9，好似改善左，但是仍然有偏黃情況，相對而言 iPad Air 2 顏色就比較自然，出白色都比較準確。所以如果你是十分執著於色準，iPad Air 2 點計都比較好；但如果阿 Q 一點諗，有少許偏黃芒的 Nexus 9，長時間睇會比較舒服，但理論歸理論，現實情況下，Edward 覺得分別唔大。
▲相比之下，左邊的 Nexus 9 較右邊的 iPad Air 2 較黃一點。
▲睇 1080p 影片的時候，Nexus 9（上圖）的熒幕也見到比 iPad Air 2（下圖）黃一點點，但不算明顯。但在黑房比較兩機熒幕時，反而俾 Edward 見到 Nexus 9 有輕微漏光情況，反而 iPad Air 2 就無呢個問題。
▲至於可視角度，Nexus 9（上）同 iPad Air 2（下）比較其實差唔多。
▲從機頂睇埋去，Nexus 9（上）同 iPad Air 2（下）的可視角度都係差唔多。
iPad Air 2 比較容易在戶外太陽下使用
反而有一點要留意的，就是相比之下，Nexus 9 在強光下，似乎較 iPad Air 2 反光，兩機一比就可以見到 Apple 在設計 iPad Air 2 熒幕時的誠意。尤其是 Edward 經常要出外工作，在街上睇資料的情況極普遍，所以按自己需要，就覺得 iPad Air 2 更適合自己用了。
▲Nexus 9 始終係採用一般的 IPS LCD 熒幕，未有特別為反光情況特別更改熒幕結構，所以在強光下顯得十分反光，甚至連字都可能睇唔清楚。
▲ 相反熒幕經過改善設計的 iPad Air 2，在相同強光環境下就顯得無咁反光了，仍然可以睇到字同埋圖。
音質：iPad Air 2 音量大但人聲較散•Nexus 9 人聲較實無低音
作為網媒，平時的工作確實好忙，為左趕 review 稿俾大家睇，做到三更半夜個時飲咖啡提神已經幫唔到手，反而有一個獨特的提神方法，就係開住 KKBOX「焚」歌邊打稿。既然聽歌係部 tablet 咁「主力」的功能，當然要試埋兩部機的喇叭音質點啦。
先試 Nexus 9，仲記得之前用 Nexus 7，可能因為個喇叭係機背，用緊個時感覺個喇叭要將音量開到最大先至夠聲，轉用 Nexus 9 後，第一時間的感覺就係：大聲左少少喎！因為開到 3/4 音量，已經同之前 Nexus 7 開到最大聲差唔多，可能係因為今次由 HTC 代工，用上了 HTC 自家技術的 BoomSound 前置喇叭，加上內置有 amplifier 晶片，所以唔止音量，音質感覺上都好左，比 Nexus 7 的音質實在，無咁散。
不過如果同 iPad Air 2 比較起來，iPad Air 2 始終有佢的優點，就是音量更大聲，唔止 KKBOX 聽歌時大聲，就連一向出名音量較細的《Now TV 新聞》APP，音量都好夠「力水」，而且相比 Nexus 9，仲明顯有 bass 效果，而在 Nexus 9 上面，bass 音效基本上是聽唔到的。這優點，Edward 平時聽開的 Jazz、Opera 或者古典音樂方面可能唔太明顯，但當聽演唱會、Rock 音樂甚至睇戲的時候，iPad Air 2 的優勢就明顯出曬來。
不過可能係 iPad Air 2 太薄的關係，當聽歌或睇戲的時候如果用內置喇叭，機身會明顯震動，唔知係咪因為呢個原因，令人聲感覺有點震散左的感覺，相反 Nexus 9 雖然音量不及 iPad Air 2，但聲就比較實，而且因為喇叭在前面，所以唔洗開到好大聲，就算在室外都可以聽得夠清楚。所以總括來講，iPad Air 2 同埋 Nexus 9 兩部機在音質方面，iPad Air 2 音量較大而且有低音，但人聲就比較散；Nexus 9 前置喇叭唔洗開到好大聲都夠用，而且人聲比較實，但音量就相比 iPad Air 2 細聲，而且 bass 可以講係無。點揀，就睇大家自己的喜好了，我就覺得 Nexus 9 都夠用的。
▲iPad Air 2 喇叭音量較好「力水」，但人聲就比較散。
▲至於 Nexus 9，喇叭採用前置設計，加上 BoomSound 技術，音量比上代 Nexus 7 好唔少，人聲都好夠實，唯一就是幾乎完全無 bass，用來睇戲效果一般。
iPad Air 2 成像抑雜訊完勝
雖然 tablet 影相質素唔係個個都會重視（始終手機像素較高，同埋都方便 D 啦），但在最後一部分，Edward 都為對平板相機有追求的 unwire 讀者測試一下啦。結果就是，雖然兩部機的鏡頭都是 800 萬像素，但是成像方面，尤其是在雜訊抑制及表現現場氣氛方面，iPad 始終較好（應該是用上最少 iPhone 5 級數的鏡頭）。當然，一般應用的話，Nexus 9 表現都可以接受的，但如果兩機真要 vs，iPad Air 2 可說是完勝。
試相區
▲iPad Air 2（室內光源充足環境）
▲Nexus 9（室內光源充足環境）
▲iPad Air 2（室內較低光源環境）
▲Nexus 9（室內較低光源環境）
▲iPad Air 2（室外夜景環境）
▲Nexus 9（室外夜景環境）
相關文章:
【教學】iOS 18.1 如何用 Apple Intelligence 只需 2 個設定 + 香港免 VPN 也可用 M4 MacBook Pro 開箱影片流出 3 個 USB-C + 標準 16 GB RAM + 跑分結果 【教學】iOS 18 延長電池壽命幫到手 一個設定保養電池
總結：難揀，Nexus 9 都好用，但始終都係 iPad Air 2 好
整體來講，Nexus 9 算係一部比較理想的 Android 平板，唔單止尺寸岩岩好夠在街做野或者睇片聽歌打機當娛樂機用，就連整體表現感覺都比之前的 Nexus 7 好，尤其是熒幕改用 4：3 比例，睇文件、網頁甚至漫畫都好舒服（唯一唔好的就係熒幕大了，機身都重左囉）。不過如果講整體表現來講，始終都係 iPad Air 2 好 D，一來音量較大岩哂「焚」歌時用，二來 iOS 平台上面到呢一刻為止，有的 tablet 專屬 APP 仍然更多（Android 原罪……），可以盡用大芒優勢。所以真係要比，iPad Air 2 會仍然係 Edward 我的首選，但如果你是堅持用 Android 機，Nexus 9 都真係買得過。
最後想提一提的，就是今次 Nexus 9 配合 Android 5.0 Lollipop OS 是首部在香港推出，無論硬件及軟件都係支援 64-bit 處理的裝置，情況就與 iPad Air 2 配合 iOS 8.1 一樣。但又係個句啦，64-bit APP 在 Android 上真係少之又少，點都唔夠已經出了 64-bit 裝置一排的 iPad 多，呢個都算係 iPad Air 2 現時的優勢吧。
售價：$3,088（16GB Wi-Fi）；$3,688（32GB Wi-Fi）；$4,288（32GB 4G LTE；暫未推出，預計十一月底）
查詢：HTC（3077 5588）
[divider]
番外篇（一）：Nexus 9 開箱睇真 D
相信應該唔多 unwire 讀者已經在今日拿到 Nexus 9 真機，就等 Edward 帶俾大家 Nexus 9 的開箱直擊啦。
▲翻轉盒背，見到包裝盒感覺比上代 Nexus 7 簡潔。
▲打開盒蓋，就可以見到 Nexus 9 了。
▲拿起 Nexus 9，就見到說明書、保養卡的文件。
▲而最底就可以見到充電火牛及 USB 線，值得一提的是這款 HTC 充電火牛，電量輸出是 1.5A 的。
番外篇（二）：Nexus 9 專用配件上手感受
除了 Nexus 9 外，今次 Edward 都體驗過專為 Nexus 9 而設的保護 cover 及鍵盤保護套。究竟用落感覺係點？就等 Edward 而家同大家分享一下。
配件一：熒幕保護蓋
首先出場的是熒幕保護蓋，佢類似 iPad 的 Smart Cover，不過用途就多 D，以下就為大家介紹一下。
▲擁有 Smart Awake 智能熒幕喚醒功能，一揭開保護蓋熒幕就會自動亮起。
▲當然使用 Nexus 9 時，只要將保護蓋「貼」在機背就得，因為保護蓋有磁石設計，可以吸附在機身正面及背面。
▲保護蓋有兩種座架模式，較高角度可以用來睇戲睇網頁用，較低角度就方便打字。
▲而保護蓋蓋在機背時，只要揭開角落，就可以避免鏡頭被遮蓋，就可以影相了。
▲除了全黑色外，仲有顏色版，首先推出的是這款藍綠色（好似係……），而另一面是黑色的，兩邊都可以用。
售價：$298
配件二：鍵盤保護套
至於另一款就是鍵盤保護套，除了可以保護機身外，亦擁有實體鍵盤可以打字。而鍵盤與 Nexus 9 就透過 NFC 配對。
▲只要開了 Nexus 9 的 NFC 功能，再如上圖般放置，就可以進行配對。
▲保護蓋背同樣有磁石功能，可以將 Nexus 9 吸附在保護殼上，如上圖這角度就可以方便打字。
▲按鍵都是實體按鍵，禁上去手感唔錯。
▲想低 D 角度用都得。
▲重點係個鍵盤保護套都唔算太重，就算好似 Edward 咁樣單手托住都 ok。
售價：待定
需要一提的是，這兩款保護蓋 / 鍵盤保護套都未推出的，如果想知道什麼時候推出就要密切留意我們的報導了。
相關文章:
【教學】iOS 18.1 如何用 Apple Intelligence 只需 2 個設定 + 香港免 VPN 也可用 M4 MacBook Pro 開箱影片流出 3 個 USB-C + 標準 16 GB RAM + 跑分結果 【教學】iOS 18 延長電池壽命幫到手 一個設定保養電池
分享到 :
最新影片
