有 人會覺得：買個袋咪又係拿來裝野，做乜要花萬幾二萬蚊買個 LV、Gucci 袋？但迷名牌的人總會回答：靚 D 嘛！襟 D 嘛！同埋貴氣 D 少 D 機會同人撞款嘛！換轉在手機上，情況都係一樣。近來 6、7 千蚊部 Android 手機，大家已經覺得貴；如果 5 萬幾蚊買部手機，又覺得點？其他牌子可能無人理，但如果換上 Vertu，唔同曬哩？究竟呢部最新 Aster 系列點解咁貴氣？就等 Edward 同大家介紹一下。
貴氣因為用料
一般的手機，外殼唔係用塑膠就係金屬，前者手感自己較 cheap，而後者係高貴少少，但係同貴氣都係拉唔上太大關係。今次呢部 Vertu Aster 系列，5 萬幾蚊機價就完全反映左係機身物料上：首先機背、頂同埋底都用左真皮物料，仲有鴕鳥皮（上圖左）、蛇皮（上圖中）同埋小牛皮（上圖右）3 種任君選擇。
▲機頂、底都係用左真皮物料。
▲機身前方聽筒位有 Vertu 手機專屬的「V」字標誌。
▲另外機邊又用左鈦金屬，大家都知道呢種「太空物料」主要用來製造飛機、太空船、戰艦等，可見它的耐用度十分高。單此兩種機殼物料，已讓大家感受到個種與眾不同的貴氣！
如果大家以為「已完」，那就實在太天真了，因為 Vertu Aster 的貴氣唔止反映在機殼上，仲反映埋係熒幕上，它的 4.7 吋 1080p 熒幕，雖然唔算屬於主流的大芒種類，但就採用左 117 克拉、5.1 吋第五代藍寶石水晶玻璃，去保護顯示熒幕本身以及機背的 1,300 萬像素鏡頭，令熒幕及鏡頭面不易被刮花。
多色新潮易襯衫
除左本身手機設計夠貴氣之外，Edward 覺得如果你是願意花上 5 萬幾蚊買部電話的用家，應該會對手機設計可唔可以配襯新潮貴氣時裝有很高要求。而今次 Vertu 推出的 Aster 系列，唔止有 3 種皮俾大家揀，每種皮仲有各 2 種顏色俾用家選擇：瑪瑙黑 / 湖藍色小牛皮、深棕色 / 柑橘橙蛇皮、深琥珀色 / 桃紅色鴕鳥皮，Edward 係現場都睇過所有顏色，真係幾靚，而且顏色都算大路，用來襯衫，相信絕大部份人都唔會感到有難度。
手感舒服單手操控無問題
當然，幾萬蚊買部手機，手感肯定好重要，尤其是今時今日，手機已經係隨身必備而且用得最多既裝置，成日要拿係手度用，自然更加重視。Edward 拿過部 Aster 一陣，同其他 5 吋手機既機身手感差唔多，無論單手掌握或者操控都問題唔大；另外機背用真皮、機邊用鈦金屬，手機拿在手上時令 Edward 感到十分舒服。基本上，純以手感來講，Aster 可以講得上係無投訴。
1,300 萬像素「哈蘇」認證鏡頭質素唔錯
此外，Vertu Aster 就連鏡頭都係用「名牌」，佢既鏡頭雖然只係 1,300 萬像素，但就有著名相機品牌「Hasselblad」哈蘇認證，具備相當質素。小編亦試用過它的相機，介面相對簡單易用，而且影出來的相片質素都算唔錯，不過你話係咪超高質素？Edward 覺得同其他主流手機牌子既 6、7 千蚊旗艦機款差唔多，唔算有極突出既表現。
▲手機影相介面設計算簡單。
▲相片最高支援 1,300 萬像素，而且設有 HDR 模式。
▲拍片就最高支援 1080p。
試相區
支援 Dolby 音效聽歌效果唔錯
除左相機外，Aster 仲內置左 Dolby Digital Plus 虛擬全方位立體聲音響，配合內建的 11mm x 15mm 立體聲高保真前置喇叭，可以為用家無論在聽歌、睇戲或者打機時，提供唔錯既音效體驗。Edward 就係現場試聽過，感覺都算唔錯，只係用內置喇叭聽歌，一來喇叭係前置設計，唔洗開到好大聲都夠音量欣賞音樂；二來出來既效果都算幾立體，對於鍾意聽歌睇戲既朋友來講，應該都滿足到需要。
支援 4G•配備「貴氣」Vertu 服務
除了相機外，Aster 其他功能亦算頂級，首先網絡方面，支援最高 4G LTE，而且支援 Band 1-5, 7, 8, 17, 20 及 25，基本上去到好多國家都可以用得到佢地既 4G 網絡，十分適合需要經常都世界各地不同地方工幹，但又需要極速網絡隨身的用戶使用。此外，Aster 本身亦支援雙頻段 Wi-Fi 802.11 a/b/g/n/ac 制式，而且 Vertu 用戶亦可以享用 6 個月免費 Wi-Fi 上網服務，可以係全球 123 個國家、超過 1,300 個由 ipass 免費 Wi-Fi 熱點上網，就算去到其他國家無無限 4G 上網，都唔驚上唔到網啦。
除左硬件之外，Vertu 亦提供唔少「貴氣」服務俾用家，例如：6 個月免費 24 x 7 私人助理服務，可以全天候與客戶服務職員以話音、電斤或 online 服務連繫，查詢手機維修、保養、甚至查詢資料服務；此外，Aster 亦內建「Vertu 生活」APP，可以讓用家在手機中獲悉重要事件及活動，其中包括可進出世界各地頂級私人會所、水療中心及 gym room，更可根據用家的所在位置，邀請用家參與頂級盛會及享受私人尊享購物體驗。
▲Vertu 生活服務可讓用家專享世界各地既尊貴生活享受服務。
另外，Vertu 還提供「Vertu 周全保障服務」，為用家提供全面的數據信息安全保護，可享有免費 12 個月為通話、SMS 及視頻加密的服務。亦會提供 12 個月 Kaspersky 反病毒及手機反盜竊手機防毒服務，照顧極為全面。
▲Vertu 周全保障服務亦都係對於尊貴用家的回饋，可惜只有 12 個月免費。
▲而其他手機功能，作業系統方面採用左 Android 4.4.2 KitKat，算係幾新。
▲亦支援 NFC 功能。
▲基本上介面係採用 Google Android 原生介面，再加入 Vertu 服務及部分由 Vertu 重新設計的程式圖示。
▲想要中文輸入法？看來大家要自行下載了，內建係無既。
Edward：貴氣！這些機會不是我的
Vertu 的智能手機，一向都係咁貴，並非主攻主流市場，而只係主打追求品味及尊貴享受的高階客群。今次推出呢部 Aster，無論用料、規格定係服務都認真「貴氣」，好滿足到呢班高要求客群的需要，如果 Edward 有呢個「身家」，相信都會買番部來玩玩哩！
Vertu Aster 規格簡介：
- CPU：Qualcomm Snapdragon 801 2.3GHz 四核心
- 儲存空間：64GB
- 熒幕：4.7 吋 1080p
- 鏡頭：1,300 萬像素 Hasselblad 認證（後置）+ 210 萬像素（前置）
- 電池：2,275mAh
- 使用時間：最長 930 小時（WCDMA 使用時間）；最長 380 小時（待機）
- 支援網絡：4G LTE + WCDMA
- 作業系統：Android 4.4.2 KitKat
售價：$55,000 起
查詢：Vertu（vertu.com）
分享到 :
最新影片
