近年有唔少品牌都主打平價平板市場，希望從 iPad 系列手上取回市場佔有率。不過唔少平價平板都係採用 Android OS，而且一般都係只支援 WiFi 網絡，對於需要經常在街上做文書處理的用家來講，就唔太方便。HP 最近就推出 3G Windows 平板 Stream 8，機仔細細又方便文書處理，而且去到邊都上到網，都算方便。以下就為大家帶來此機的評測啦。
機身頗厚但唔算重
HP Stream 8 是一部 8 吋 Windows 8.1 平板，機身接近 8.9mm，其實以今時今日的平板來講都算厚（iPad mini 3 厚度只係 7.5mm，Samsung GALAXY Tab S 厚度仲要得 6.6mm），好彩佢部機雖然規格上寫住 408g，比其他平板都要重，但勝在重量分佈夠平均，所以拿係手都唔算太重，加上邊框粗幼都算適中，拿出街用都仲 OK。
▲機身重量平均，而且邊框粗幼適中，拿住出街都唔算重。
▲不過機身就比較厚，Edward 用手上的 LG G3 來比較，感覺仲要厚幾 mm。
▲USB 端子設在機頂比較少有，3.5mm 耳機插孔都係係機頂，而喇叭就係機底。
▲開關制同埋音量制都係機身右側。
▲機背同成部機的機殼都係用塑膠做，「膠」感都幾重，但平機係咁架啦，想點？
支援 3G 隨時上網
作為 Windows 8.1 平板，對於平時都係用 Windows 電腦的用家來講，好處係唔洗重新適應全新的 OS，加上配合預載送贈的一年 Office 365 個人版同埋一年 1TB OneDrive 雲端儲存空間，即使 Stream 8 內存只得 32GB，但其實都好夠用（就算真係唔夠都可以支援插 microSD 記憶卡儲存文件、相片等，最高支援 128GB）。
▲採用 Windows 8.1 配合 Intel Atom 處理器，平時文書處理都算夠用，最大缺點係只有 1GB RAM，run 多兩三個 APP 部機都會窒窒地。
▲內存得 32GB，其實都唔太夠用（裝完 Windows 其實得番 20GB 左右可用……），好彩可以插 microSD 記憶卡儲存文件、相片等，Edward 插張 64GB 卡入去都順利讀到。
▲加埋內建 OneDrive，而且送 1 年 1TB 容量用，基本上都好夠用，唯一唔好就係要成日駁住上網 save 野。
而 Edward 覺得 Stream 8 最好的地方，就係支援 3G 網絡，令大家可以隨時隨地都上到網，唔洗用手機 share 網絡浪費手機電力，或者要周圍搵邊度有免費 WiFi 熱點。
▲平到千中的平板都支援 3G 上網其實都算少有，但如果支援 4G 就更好啦。
▲Edward 用 csl. 台，係 6 點幾放工時間係牛頭角觀塘道行人路上網，上載、下載分別都只係 0.47Mbps 同埋 1.08Mbps，upload 或者 download 文件都仲算夠用，但如果上下載相片或者影片就有 D 慢啦……
不過今時今日係香港，4G 都已經普及，而 Stream 8 只可以支援 3G，就真係有點失色（話說 HP 在美國推出的 Stream 8 已支援 4G 網絡，仲要每個月有 200MB 免費 4G 送……）。
▲美國 HP 賣 Stream 8 支援 4G 架，Edward 真係好葡萄……
相關文章:
【評測】HP EliteBook Ultra G1q 開箱評測 機身纖薄易外攜 + 配色有型專業 + 配置齊全不俗 + ARM 架構電量算「長氣」 大專手提電腦優惠計劃 2024 各電腦品牌學界獨家優惠 HP 擬撤一半電腦生產線出中國 大部分將遷移至泰國新工廠
熒幕一般可視角度不足
既然作為流動文書處理入門平板，很多用家應該都幾重視熒幕表現。HP Stream 8 採用了 8 吋 1,280 x 800 解像度 IPS 熒幕，色彩還原度都算唔錯，解像度亦有最低限度的高清（720p）以上質素，對於一般人來講都算夠用。不過呢個熒幕可視角度，Edward 就稍嫌有點不足，只要側 D 睇熒幕，已經出現反白情況，而細字字體如果太幼，仲有可能睇唔清楚。不過作為入門平板，相信大家都唔會有太大期望掛……
▲採用 8 吋 1,280 x 800 解像度熒幕，用來睇 720p 質素的 Unwire TV 啱哂！
▲就算用來睇網頁都算啱啱好。
▲不過可視角度就差 D 啦，側 D 熒幕都會呈反白狀態。
4,000mAh 內建電池用一日都夠
作為出街用的平板，另一項大家都會重視的元素，就係使用時間。根據官方表示，HP Stream 8 內建左 4,000mAh 容量電池，足夠使用 8 小時 20 分鐘。而 Edward 亦嘗試拿部機真係出街工作，又真係用到呢個時間，斷斷續續咁用一日一充都勉強足夠，所以使用時間方面，只要大家唔係狂睇片或者用來打機（得個 32GB 儲存空間都好難打到咩靚畫面 game 啦，雖然理論上係裝到……），基本上都唔洗太擔心。
總結：「平機有 3G 文書唔錯，但可惜未有 4G……」
整體來講，如果大家唔講外觀（因為用塑膠外殼，所以「膠」感都幾重，而且機背都易痴手指膜），HP Stream 8 以一部千中價位的 Windows 8.1 平板來講，仲要支援 3G + WiFi 上網，基本上都好難唔滿意。不過當 Edward 眼見美國已推出支援 4G 的版本，而香港同價位就只可以用 3G（美國 4G 版淨機售價為 US$179.99 未連稅，即約 HK$1,400 左右，香港套裝價就賣 $1,550），就覺得心裡不是味兒……如果香港用呢個價位，推出 4G 版本，就真係無得輸啦！希望 HP 可以聽到用家心聲，快 D 推出 4G 版本啦！
售價：$1,550（連 HP Stream 8、原裝智能保護套及原裝熒幕保護貼）
查詢：HP（800 938 833）
相關文章:
【評測】HP EliteBook Ultra G1q 開箱評測 機身纖薄易外攜 + 配色有型專業 + 配置齊全不俗 + ARM 架構電量算「長氣」 大專手提電腦優惠計劃 2024 各電腦品牌學界獨家優惠 HP 擬撤一半電腦生產線出中國 大部分將遷移至泰國新工廠
分享到 :
最新影片
