一年一度情人節又嚟，年年講買乜買物點樣準備，筆者都講到厭，又唔諗下無伴侶既點算。今年就轉個話題講講單身過情人節攻略！
1. 學地主君自拍
一支公，情人節一定唔多想上 Facebook，廢事比閃光彈閃死。不過如果你學到地主君又唔同講法，買套西裝打扮到型型仔仔，Chok 到暈咁一個人影攝情侶相。甚至情人節 Post 番張影婚紗相，實行閃番轉頭 (但係後果自負….)。
2. 一個人睇《格雷的五十道色戒》
情色小說《格雷的五十道陰影》電影版竟然趕到情人節上映，而且香港都有得上。電影 III 級之餘內容仲要係男方愛玩 SM。可能有唔少情純情侶會「中伏」(不過都可能專登去睇…)，識睇既就梗係一個人去睇，霸埋個單人位。
3. 玩《Evolve》做怪獸，屠殺藍星人
開發 Left 4 Dead 嗰間公司嘅《Evolve》終於推出，玩法係 4 名人類 Hunter 對 1 隻巨型怪獸，全可由玩家自己控制。一個人玩當然要揀做怪獸，殺盡可惡既人類啦。
4. Youtube 24 小時狂聽《愛與誠》
呢道講既當然唔係古巨基首《愛與誠》啦，而係用佢首歌來改歌詞既網上改編作《毒男》，未聽過好自己搵來聽 (注意內含粗口)。識聽既一定每年聖誕情人都開來聽，Loop 住 24 小時播。
5. 開 Steam 玩《Sakura Angel》
想追尋 2 次元「真愛」可以上 Steam 玩老外製作既《Sakura Angel》。你問點解要上 Steam 玩唔搵隻日本 PC Game？因為 Steam 玩緊咩 Game 都可以比朋友仔睇到嘛，情人節睇到「你個名 is playing Sakura Angel」，一定受萬人景仰 (注意隻 GAME 18 禁)。
6. 升 Level 做極端份子
每年情人節，世界各地其實都有反對運動，話情人節係商業活動毫無意義之類。因愛成恨可能就係咁既意思，好似下圖咁仲變成魯魯修咀咒所有情侶。不過如果唔係受太大刺激，筆者都唔多推薦你咁樣做。
7. 《哈利波特》、《魔戒》、《哈比人》連住睇
星期六既情人節其實都可以當做平日咁如常消遣，最好就一早準備定成套《哈利波特》同《魔戒》連住睇，唔夠就補埋《星球大戰》或者《多啦 A 夢》劇情版 (最好粵語啦)，再唔係《One Piece》動畫搭套《柯南》，未睇完都已經天光。另外，支持下 HKTV 亦得。
8. 番工
情人節最完美既消遣可能就係番工！有咩未做完或者嚟緊要做既野，就等情人節專登番工清晒佢，之後想放假都輕輕鬆鬆。人生真係充滿意義呀。
分享到 :
最新影片
