最近人氣平機「紅米 2」正式在港發售，不過「平機」又唔單單只有小米一個選擇，因為 Lenovo 原來都打算 4 月引進內地熱賣的 A6000 (樂檬手機)，規格同「紅米 2」貼近，而且外殼更用了超搶眼的檸檬黃色，唔知佢用起來感覺如何呢？（以下有更多資料。）
「紅米 2」同級配置、有 4G + 2G 雙卡
能與「紅米 2」相提並論，條件當然要配置差唔多，而 Lenovo 這款 A6000 就配備 5 吋 720p 屏幕，並搭載 Qualcomm Snapdragon 410 處理器及 1GB RAM，規格跟「紅米 2」相同，只要屏幕再大少少，而性能上於 Antutu 大約有 20,000 分，成績同屬入門機水平。此外，機內提供 8GB 儲存空間，支持 MicroSD 擴充，而且此機亦對應 4G LTE 網絡及雙卡雙待，主卡除了 FDD 仲支持內地 TD 制式，即中港兩地適用，而副卡就純粹支援 2G 網絡。
▲ 搭載 Qualcomm Snapdragon 410、1GB RAM 及 8GB 儲存空間。
▲ 預載 Android 4.4 及一貫「樂」系列程式。
▲ 機內可插入 2 張 Micro SIM 卡及 MicroSD 記憶卡。
外表似 Zenfone 5 但可換電
A6000 最深印象應該係黃色底殼，因為極少手機會用「檸檬黃色」，遠睇已很搶眼。不過黑色機面加顏色機背，這種風格令我想起 Asus 的 ZenFone 5，大家同屬 5 吋手機，拿起手感差唔多，單手操作亦冇難度，但兩者最大分別是 A6000 支持可換電設計。
▲機背除了黃色夠搶眼，表面還用了 3 層 Sabic PU 物料，有效防指紋及鉛筆痕。
▲ 內裡 2,300mAh 電池可替換。
▲ 此機支持 Waves MaxxAudio 及 Dobly Digital Plus 認證，但可惜是喇叭位於機背，睇片時總要「就住」，或許用耳機可能會更佳效果。
相機質素一般、勝在曝光準！
相機方面，A6000 (唔係 Sony) 用了 800 萬像素 Sony 感光元件，並使用 Lenovo 自家拍攝介面，微調選項多得有點複雜，相機對焦速度頗快，還懂不停自動對焦(不停 DoDo 聲)。相片質素只是一般，原因是細節有點「鬆散」及「油畫」，而它強項是曝光非常準確，對焦黑色物件已懂加強曝光。
▲ 搭載 Lenovo 自家拍攝介面，微調選項非常豐富。
▲相片唔算可銳利，但勝在曝光準確！
小編 ：一千蚊 4G、雙卡都玩得過！
Lenovo A6000 (樂檬港版) 配置同「紅米 2」差唔多，又支援 4G LTE 及雙卡雙待，兩者最唔同係屏幕大少少及黃色背殼，而售價就比「紅米 2」貴 $100 即 $999，價錢都算抵玩，最起碼唔洗「搶」，但預計 4 月才正式發售。
分享到 :
最新影片
