現在款款穿戴式裝置都標榜針對運動，但實際可能只有計步功能。不過 FitBit 今日發佈的 Charge HR 及 Surge 就提供心率量度等更豐富功能，而且 Surge 外形更成隻智能手錶，唔知功能上會有咩特別呢？(以下有更多資料。)
有得睇時間！可量度心率
小編 好耐之前已經使用 FitBit Flex，功能唔錯，但缺點係冇屏幕連時間都睇唔到，而今日發佈的 Charge HR 改進係添置 OLED 屏幕，除了顯示時間，仲可以睇埋步數、消耗卡路里、步行距離，來電顯示及計時等等，使用體驗更方便。當然加屏幕對運動冇乜關係，因此背面還增設了心率感應器，可顯示用戶做運動時心率波幅，功能比單純計步實際。手感方面，Charge HR 雖然比 Flex 闊身，但佩帶時感覺仍很輕便，睡眠偵察不再需要手動切換，電量維持太約 5 日，續航力總算比智能手錶長一點，但充電仍需要專用線，跟 Flex 比較是有所改善，不用拆本體就可直接充電。
有 GPS 定位 可遙控聽歌
至於 Surge 外形似足智能手錶，錶面配備 1.25 吋黑白 LCD 屏幕，驟眼睇有點似 Pebble 類產品。功能上，佢同 Charge HR 一樣配備心率感應器，而重點係加入 GPS 定位及 8 重感應器，可以更準確顯示步速、距離及海拔等資料，而且還可分辨出運動種類，用途上比 Charge HR 更專業。此外，Surge 都有一些智能手錶功能，包括來電顯示、訊息顯示及遙控手機播放音樂，而電量就維持到 7 日左右。手感方面，Surge 佩帶都仍然很輕便，但操作時需時習慣，因為 Touch Screen 只供轉換選項，選取就要靠旁邊按鍵，感覺唔太方便。
▲ 可收看手機訊息。
▲ Fitbit 介面跟之前差唔多，除了顯示計步資料及輸入食物餐單，這次加入心率資料。
小編 ：手帶都好夠用！
今日試過 Charge HR 及 Surge 兩款穿戴式裝置後，小編 覺得 Charge HR 功能及價錢相對較抵玩，「Pro」少少跑手有測心率已經好夠用，而且有屏幕又可以睇埋時間。而 Surge 其實主要多了 GPS 定位，數據可更準確，但個人比較擔心 GPS 在香港的準確性。其次，智能手錶功能不及 Android Wear 或 Apple Watch，當中僅支持遙控播放音樂，即係使用時必須帶備手機，咁其實手機都可 GPS 紀錄等功能，感覺佢會同其他裝置重疊，因此估計運動發燒友唔想帶住手機跑步的玩家才會考慮 Serge。
售價：$1,398 ( Charge HR) 、$2,098 (Serge)
查詢：LRT (2395-3913)
分享到 :
最新影片
